មិនធម្មតា សូរ្យ អេនណា នាំម៉ូដែល១ក្រុមទៅដណ្ដើមពាននៅកូរ៉េ ខណៈពានបាន១រួចស្រេចហើយ

2017-06-16 04:30:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានក្រុមម៉ូដែល "តារារះថ្មីកម្ពុជា" កញ្ញា សូរ្យ អេនណា បាននាំ តារាមួយក្រុម ទៅប្រលងកម្មវិធីមួយនៅប្រទេសកូរ៉េ កម្មវិធីមួយនេះទើបចាប់ផ្ដើមសោះ កម្ពុជាដឹងដំណឹងទទួលបានពាន១ទៅហើយ។

ការប្រកួតនោះមានឈ្មោះថា "Asia Model Festival 2017 " ដែលធ្វើឡើងនៅទីក្រុងសេអ៊ូល ប្រទេសកូរ៉េ ចាប់ពីថ្ងៃទី១៤ ដល់ ថ្ងៃទី២៥ខែ មិថុនា ឆ្នាំ ២០១៧ ដោយនៅក្នុងនោះ មានប្រទេសចំនួន២៧ នៅទ្វីបអាស៊ីបានចូលរួម។

សូរ្យ អេនណា បានប្រាប់ថា "Asia Model Festival 2017” គឺជាកម្មវិធីប្រកួតការដើរបង្ហាញម៉ូដ អន្តរជាតិល្បីឈ្មោះមួយ ហើយនេះគឺជាឆ្នាំទី១២ហើយ ដែលកម្មវិធីបានប្រារព្ធឡើង។ "នេះជាឆ្នាំទី១២ហើយដែលគេធ្វើ កម្ពុជាយើងធ្លាប់ទី៤ឆ្នាំជាប់គ្នាហើយតែ agency ផ្សេងៗ សម្រាប់ក្រុមខ្ញុំ ទើបឆ្នាំទី១ទេដែលបានទៅកម្មវិធីនេះ"សូ អេណា ថ្លែងបញ្ជាក់។

មូលហេតុដែលនាំឲ្យក្រុមម៉ូដែល "តារារះថ្មីកម្ពុជា" ដែលទើបបង្កើតមិនបាន១ឆ្នាំស្រួលបួលផង មានឱកាសបានទៅប្រកួតជាលក្ខណៈអន្តរជាតិបែបនេះ ត្រូវបាន អេណា បញ្ជាក់ប្រាប់ថា ក៏ព្រោះតែ កន្លងមក នាងធ្លាប់ចេញទៅប្រកួតក្រៅប្រទេសច្រើនលើកមកហើយ ដូចនេះ agency ស្គាល់នាងទុកចិត្ត ទើបឲ្យនាងរៀបចំតារាទៅចូលរួមប្រកួតកម្មវិធីខាងលើ ដោយមានការជ្រើសរើសត្រឹមត្រូវ។

តារាស្រីសម្បុរស្រអែម បានបន្តឲ្យដឹងថា តារាម៉ូដែលកម្ពុជាទៅចូលរួម"Asia Model Festival 2017" មាន៣រូបក្នុងនោះមានស្រី២រូប និងប្រុស១រូប គឺ លោក ដូ រីកូ កញ្ញា ផល សុផានីកា នឹង កញ្ញា នាង វណ្ឌី។ ចំពោះ សូរ្យ អេនណា នាងមានលក្ខណៈពិសេសជាងតារាទាំង៣ខាងលើ ដោយអ្នករៀបចំបានសម្រេចប្រគល់ពានឲ្យដោយមិនបាច់ចូលរួមប្រកួត ព្រោះអីកម្មវិធីនោះ គេមានពានកិត្តិយស១សម្រាប់ប្រទេសទាំង២៧ដែលបានចូលរួម ។

រូបភាព៖ផ្ដល់ដោយ អេណា

ត្រង់នេះ នាងបញ្ជាក់ថាប្រទេសទាំង២៧នោះ ទទួលបានពាន់ម្នាក់១ដោយស្វ័យប្រវត្តិ ដោយគ្រាន់តែចូលរួមប្រកួត។ កម្មវិធីទទួលពានធ្វើនៅថ្ងៃ២៤ ខែ មិថុនា ឆ្នាំ ២០១៧នេះ ហើយពួកគេ គ្រោងត្រឡប់មកប្រទេសកម្ពុជាវិញនៅថ្ងៃ២៥ ខែ មិថុនា ឆ្នាំ ២០១៧៕

អត្ថបទ៖ ស៊ុនហួត