ប្រញាប់ឡើង! ពិព័រណ៍កុមារដ៏ធំបំផុតប្រចាំឆ្នាំ សល់តែថ្ងៃនេះទៀតទេ

2017-06-18 04:18:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិព័រណ៍កុមារ និងគ្រួសារលើកទី ៤ កំពុងប្រព្រឹត្តទៅនៅអគារពិព័រណ៍កោះពេជ្រ នៅសល់តែថ្ងៃនេះទៀតទេ។ ដូច្នេះលោកឪពុកអ្នកម្ដាយទាំងឡាយ ប្រសិនបើចង់នាំកូនលម្ហែថ្ងៃចុងសប្ដាហ៍កុំភ្លេចទៅជុំគ្រួសារទាំងអស់គ្នានៅទីនោះ។ នៅក្នុងពិព័រណ៍ទាំងមូលមានកម្មវិធីកម្សាន្តសម្រាប់កុមារជាច្រើន ហើយបង្កប់ការអប់រំក្នុងនោះ ដើម្បីឱ្យកុមារមានភាពក្លាហាន ហ៊ានបញ្ចេញសមត្ថភាព ដូចជាការប្រឡង ច្រៀងរាំ បង្ហាញម៉ូត សូត្រកំណាព្យ អានរឿងនិទានជាដើម។

ក្រៅពីកម្មវិធីកម្សាន្តសម្រាប់កុមារដ៏សម្បូរបែបហើយនោះ ក៏មានការលក់បញ្ចុះតម្លៃផលិតផលយ៉ាងពិសេស រាប់រយមុខពីសំណាក់ក្រុមហ៊ុនធំៗ ក្នុងប្រទេសកម្ពុជាចាប់ពី ៥០%ទៀតផង។

គួរបញ្ជាក់ផងដែរថា នេះជាលើកទី៤ហើយ ដែលក្រុមហ៊ុនអនុស្សារៀបចំពិព័រណ៍បានបង្កើតកម្មវិធីនេះឡើង ដើម្បីឱ្យឪពុកម្ដាយ និងកូនៗមានឱកាសបានជុំគ្នា បង្កើតភាពស្និទ្ធស្នាល និងភាពកក់ក្ដៅក្នុងគ្រួសារ។ នេះបើតាមការបញ្ជាក់ពីលោក សេង ពិសិដ្ឋ នាយកប្រតិបត្តិក្រុមហ៊ុននេះ បានលើកឡើងកន្លងមក។

ទន្ទឹមនឹងនោះដែរ ឯកឧត្ដម ខៀវ កញារិទ្ធ រដ្ឋមន្ត្រីក្រសួងព័ត៌មានក៏បានអញ្ជើញជាគណៈអធិបតីក្នុងពិព័រណ៍នេះទៀតផង ហើយឯកឧត្ដម បានគាំទ្រ និងធ្វើការកោតសរសើរខ្ពស់ចំពោះគំនិតផ្ដួចផ្ដើមបង្កើតកម្មវិធីដ៏ល្អនេះឡើង ដើម្បីផ្ដល់ការកម្សាន្តដល់កុមារ និងបំផុសឱ្យឪពុកម្ដាយបានយល់ច្បាស់ពីតម្លៃសុភមង្គលក្នុងគ្រួសារស្ថិតនៅត្រង់ណា។ ជាពិសេសនោះ ឯកឧត្ដម ក៏បានសំណូមពរដល់សាលាទូទាំងក្នុងប្រទេសកម្ពុជា ធ្វើការអប់រំកុមារឱ្យយល់ដឹងពីបរិស្ថាន និងសុវត្ថិភាពចរាចរណ៍ពីថ្នាក់ក្រោមឱ្យហើយ នៅពេលដែលពួកគេធំឡើងគឺបានយល់ច្បាស់ជុំវិញបញ្ហាទាំងនេះតែម្ដង៕