SCG Muangthong United មកប្រកួតជាមួយ All Stars ម្ដងទៀត គឺដោយសារសន្ធឹកអ្នកគាំទ្រកម្ពុជា

2017-06-20 03:20:43
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Pramote Techasupatkul ទីប្រឹក្សារបស់ SCG បានបញ្ជាក់ថាក្រុម SCG Muangthong United សម្រេចមកប្រកួតមិត្តភាពជាមួយក្រុម K-Cement Cambodian All Stars ម្ដងទៀតគឺដោយសារតែសន្ធឹកនៃអ្នកគាំទ្រកម្ពុជាដ៏ច្រើនលើសលប់កាលពីឆ្នាំមុន។

នៅថ្ងៃទី១៦ខែក្រោយនេះ បងប្អូនអ្នកស្រលាញ់វិស័យកីឡានឹងបានឃើញការប្រកួតដ៏ធំមួយទៀតហើយ គឺជាការប៉ះគ្នារវាងក្រុម K-Cement Cambodian All Stars ជាមួយ SCG Muangthong United របស់ប្រទេសថៃ ក្នុងព្រឹត្តិការណ៍ SCG Muangthong United ASEAN Tour 2017។ ដោយការប្រកួតនេះទៀតសោត គឺជាការប៉ះគ្នាលើកទី២ហើយ សម្រាប់ក្រុមទាំងពីរ។

មុនការប្រកួតនេះចាប់ផ្ដើម លោក Pramote Techasupatkul ទីប្រឹក្សារបស់ប្រធានក្រុមហ៊ុន SCG បានលើកឡើងដូច្នេះថា៖ “ដោយសារតែអ្នកគាំទ្រ ៤៥ ០០០នាក់កាលពីឆ្នាំមុន ទើបយើងសម្រេចរៀបចំការប្រកួត SCG Muangthong United ASEAN Tour ម្ដងនៅទៀតនៅកម្ពុជាឆ្នាំនេះ។ SCG ជឿជាក់ថា បាល់ទាត់ជាកីឡាពេញនិយម សម្រាប់ប្រជាជននៅតំបន់អាស៊ាន។ វាមិនត្រឹមតែនាំមកនូវការលើកទឹកចិត្តដល់យុវជនប៉ុណ្ណោះទេ ប៉ុន្តែវាក៏បានជួយឱ្យជីវិតល្អប្រសើរផងដែរ”។

ដូចគ្នានេះដែរ ក្នុងសន្និសីទសារព័ត៌មានដែលបានធ្វើឡើងនៅក្នុងពហុកីឡដ្ឋាន SCG លោក សុខា រ៉ានាថ ប្រធានផ្នែកទីផ្សារ និងទំនាក់ទំនង FFC បាននិយាយដែរថា៖ “ការប្រកួតកាលពីឆ្នាំ២០១៦កន្លងទៅ ទទួលបានការគាំទ្រច្រើន និងបានជួយដល់វិស័យបាល់ទាត់នៅកម្ពុជា។ ខ្ញុំសូមអរគុណដល់កម្មវិធីមួយនេះ ហើយសហព័ន្ធបាល់ទាត់កម្ពុជា បច្ចុប្បន្នកំពុងតែអភិវឌ្ឍឈានទៅរកកម្រិតស្ដង់ដារមួយ ហើយយើងសូមស្វាគមន៍ដល់ការប្រកួត SCG Muangthong United ASEAN Tour នៅឆ្នាំនេះ”។

សូមបញ្ជាក់ថា កាលពីឆ្នាំ២០១៦កន្លងទៅ ក្រុម Muangthong United ប្រកួតចាញ់ K-Cement Cambodian All Star ក្នុងលទ្ធផល ៣-៤ នៅពហុកីឡដ្ឋានជាតិ ក្រោមក្រសែភ្នែកអ្នកគាំទ្រកម្ពុជារាប់ម៉ឺននាក់។ ខណៈដែលឆ្នាំនេះវិញ គឺជាការជួបគ្នាសងសឹកហើយ ចាំមើលនរណាជាអ្នកទទួលបានជ័យជម្នះ?