ភ្ញាក់ផ្អើលខ្លាំង! ពេលឃើញទិដ្ឋភាពក្នុងកសិដ្ឋានដ៏ធំអស្ចារ្យ របស់កំពូលតារាកំប្លែងដ៏ល្បីថៃរូបនេះ

2017-06-22 04:28:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តមួយចំនួនធំច្បាស់ជាស្គាល់តារាកំប្លែង និង ជាតារាសម្ដែងជើងចាស់ Jaturong Mokjok ដែលតែងកំដរអារម្មណ៍លោកអ្នក តាមរយៈរឿងកុនបែបកំប្លែងជាច្រើន។ ប៉ុន្តែលោកអ្នកនឹងភ្ញាក់ផ្អើលនៅពេលដឹងថា ក្រៅពីជាតារាថៃដ៏មានកេរ្តិ៍ឈ្មោះ លោកក៏ជាម្ចាស់កសិដ្ឋានដ៏ធំមួយផងដែរ។

កសិដ្ឋានរបស់តារាថៃរូបនេះ មានឈ្មោះថា "កសិដ្ឋាន Jaturong” មានទីតាំងស្ថិតនៅស្រុក Photharam ខេត្ត Ratchaburi ភាគខាងលិចនៃផ្ទៃប្រទេសថៃ ហើយដើម្បីទៅដល់ទីនោះ ត្រូវចំណាយពេល ២ម៉ោង ពីទីក្រុងបាងកក។

ទីនោះពិតជាស្រស់ត្រកាល ធំល្វឹងល្វើយ ធ្វើឲ្យគ្រប់គ្នាឃើញហើយចង់ទៅរស់នៅបំផុត ព្រោះព័ទ្ធជុំវិញទៅដោយភ្នំ និងទេសភាពធម្មជាតិពិតៗ ស្រស់ត្រកាលបំផុត។ វិបសាយ Post Today បានបង្ហាញថា ការងារកសិកម្មនេះ គឺជាក្ដីស្រមៃរបស់តារាកំប្លែងម្នាក់នេះតាំងពីតូចមកម្ល៉េះ តែលោកក៏មិនគិតថា ខ្លួនមានចម្ការ មានកសិដ្ឋានផ្ទាល់ខ្លួនដែរពីមុន ព្រោះតែលោកកើតក្នុងគ្រួសារអ្នកជំនួញទេ។

បើនិយាយពី "កសិដ្ឋាន Jaturong” នេះបានកកើតតាំងពីឆ្នាំ ២០០២ មកទល់ពេលបច្ចុប្បន្ន វាមានអាយុកាល ១៥ឆ្នាំទៅហើយ ហើយមានទំហំប្រមាណ ៣រ៉ៃកន្លះ (ប្រហែល ៥៦០០ម៉ែត្រការ៉េ) និងទើបពង្រីករហូតដល់ ១០រៃ កាលពីពេលថ្មីៗនេះ។ កសិដ្ឋានមួយនេះ មានតាំងពីកន្លែងចិញ្ចឹមជ្រូក មាន់ទា ស្រះចិញ្ចឹមត្រី កន្លែងដាំផ្សិត និងចម្ការដំណាំផ្សេងទៀត។ ក្រៅពីបងប្អូន លោកក៏បានជួលអ្នកខាងក្រៅមកធ្វើការដែរ ព្រោះដោយសារមានការងារត្រូវធ្វើច្រើន ហើយអ្នកទាំងនោះសុទ្ធតែជាអ្នកជំនាញ ខាងការងារនេះ។

កាន់តែពិសេស លោក Jaturong ក៏បានបើកជាភោជនីយដ្ឋានមួយជាប់នោះ ជាមួយសាច់ញាតិផងដែរមានឈ្មោះថា "ផ្ទះបាយពូរ៉ុង”។

ថ្លែងពីអារម្មណ៍ពិត តួប្រុសក្នុងរឿង "Oh My Ghost" រូបនេះបាននិយាយថា ការងារសិល្បៈ លោកតែងធ្វើឲ្យទស្សនិកជនសើចគ្រប់ពេល ប៉ុន្តែការងារកសិកម្ម វាខុសគ្នា ដោយសារត្រូវប្រើកម្លាំងច្រើន តែធ្វើឲ្យលោកសប្បាយចិត្ត ណាមួយវាជាការងារដែលខ្លួនស្រលាញ់តាំងពីក្មេង។

លោក Jaturong ប្រាប់ទាំងទឹកមុខញញឹមថា៖ "តាមរយៈសមិទ្ធផល ១៥ឆ្នាំមកនេះ ខ្ញុំពិតជាមានមោទនភាពណាស់ ដែលបានធ្វើឲ្យតំបន់នេះ ក្លាយជាទីកន្លែងពោរពេញដោយធម្មជាតិស្រស់បំព្រង ហើយលោកនឹងអភិវឌ្ឍបន្ថែមទៀត ដើម្បីទុកជាកន្លែងសម្រាប់ភ្ញៀវទេសចរចូលមកទស្សនាកម្សាន្តឲ្យបានច្រើន៕

ប្រភព៖ posttoday ប្រែសម្រួល៖ យី សុធារី