នាយកប្រតិបត្តិក្រុមហ៊ុន Google រួសរាយ យកអាសារខុសពីរូបរាងខាងក្រៅ

2017-06-22 04:51:28
ចំនួនមតិ 0 | ចំនួនចែករំលែក 0

ចន្លោះមិនឃើញ

Sundar Pichai បុរសសញ្ជាតិឥណ្ឌាជានាយកប្រតិបត្តិ (CEO) របស់ក្រុមហ៊ុន Google Inc.។ បច្ចុប្បន្នលោកមានវ័យ ៤៤ ឆ្នាំហើយ។ លោកមានភរិយាឈ្មោះ Anjali Pichai ហើយទ្រព្យសម្បត្តិរបស់លោកគិតត្រឹមថ្ងៃទី ២៨ មេសាឆ្នាំ ២០១៧ មាន ៤០ ពាន់លានដុល្លារអាមេរិក។

កើតក្នុងទីក្រុង Chennai ប្រទេសឥណ្ឌា Pichai ត្រូវបានគេស្គាល់ ពោរពេញទៅដោយគំនិតច្នៃប្រឌិតតាំងពីវ័យជំទង់។ ធ្លាប់ទទួលបានការសិក្សាពីស្ថាប័នធំៗជាច្រើន និងទទួលមុខតំណែងជាវិស្វកម្មនិងអ្នកគ្រប់គ្រងនៅក្រុមហ៊ុន Applied Materials និងបន្តជាអ្នកសម្របសម្រួលការគ្រប់គ្រងនៅក្រុមហ៊ុន McKinsey & Comapny មុនក្លាយខ្លួនជាចំណែកមួយរបស់ Google។

Pichai បានបោះជំហានប្រលូកចូលក្រុមហ៊ុន Google ក្នុងឆ្នាំ ២០០៤ ក្នុងមុខតំណែងដំបូងជាប្រធានគ្រប់គ្រងផលិតផល ហើយបានខិតខំប្រឹងប្រែងលើកស្ទួយរហូតធ្វើឱ្យកម្មវិធី Google Chrome និងប្រព័ន្ធ Chrome OS មានឈ្មោះល្បីល្បាញពេញពិភពលោក។

+កុមារភាព

-Sundar Pichai ដំបូងមានឈ្មោះ Pichai Sundararajan កើតនៅថ្ងៃទី ១២ កក្កដាឆ្នាំ ១៩៧២ ក្នុងទីក្រុង Chennai រដ្ឋ Tamil Nadu ប្រទេសឥណ្ឌា។ មានឪពុកឈ្មោះ Regunatha Pichai ប្រកបរបរវិស្វករអគ្គិសនីឱ្យក្រុមហ៊ុនអង់គ្លេស GEC និងគ្រប់គ្រងរោងចក្រទទួលផ្គត់ផ្គង់អគ្គិសនី។

-Pichai ជាសិស្សពូកែម្នាក់នៅសាលា PSBB ក្នុងទីក្រុង Chennai និងមានឱកាសបានសិក្សានៅវិទ្យាស្ថានបច្ចេកវិទ្យាផ្នែកវិស្វកម្មដ៏ល្បីមួយនៅឥណ្ឌា។

+អាជីព

-ដំបូង Pichai មានគម្រោងទៅបន្តការសិក្សាថ្នាក់បណ្ឌិតនៅសាលា Stanford ប៉ុន្តែបោះបង់ចោល ហើយចូលមកធ្វើការក្នុងក្រុមហ៊ុន Applied Materials វិញ ប៉ុន្តែធ្វើបានមួយរយៈខ្លីប៉ុណ្ណោះ។

-លោកបានបញ្ចប់ថ្នាក់អនុបណ្ឌិតពីសាលា Wharton School នាឆ្នាំ ២០០២ ហើយជាប់ឈ្មោះក្នុងបញ្ជីអ្នកដែលមានសមត្ថភាពបំផុត Siebel Scholar និងPalmer Scholar។

-ឆ្នាំ ២០០៤ ប្រលូកចូល Google ក្នុងក្រុមបង្កើត Google Search Toolbar ដែលធ្វើការស្រាវជ្រាវសម្រាប់សម្រួលដល់ការប្រើប្រាស់កម្មវិធី Internet Exploerer និង Firefox។

-ដោយការខិតខំប្រឹងប្រែង ស្ថាបនិក Google លោក Larry Page និង Sergey Brin បានផ្ដល់ឱកាសឱ្យ Pichai ដើរតួយ៉ាងសំខាន់ក្នុងការរុករកបង្កើតនូវ Browser សម្រាប់ក្រុមហ៊ុន រហូតបានជោគជ័យចេញសមិទ្ធផលនៃ Google Chrome នាឆ្នាំ ២០០៨។

-Chrome បានក្លាយជា Browser លំដាប់ទី ១ ក្នុងលោកនាពេលនោះ យកឈ្នះលើ Internet Explorer និង Firefox។ ផ្នែកផ្សេងទៀតនៃ Chrome រួមមាន Chrome OS, Chromebooks និង Chromecast។

-នាឆ្នាំ ២០០៨ លោក Pichai ត្រូវបានគេតែងតាំងជាអនុប្រធានផ្នែកអភិវឌ្ឍផលិតផល។ ពេលនោះPichai បានលេចមុខជាញឹកញាប់ក្នុងការធ្វើបទបង្ហាញរបស់ Google ហើយឆ្នាំ ២០១២ ក៏បានឡើងដំណែងបន្ថែមទៀត ក្លាយជាអនុប្រធានជាន់ខ្ពស់អភិវឌ្ឍកម្មវិធី Chrome។

-នៅឆ្នាំ ២០១២ លោក Andy Rubin ដែលជាអ្នកបង្កើតប្រព័ន្ធប្រតិបត្តិការ Android បានចាកចេញទៅធ្វើការលើគម្រោងផ្សេង។ ម្ល៉ោះហើយ Larry Page ក៏បានចាត់តាំងឱ្យ Pichai ទទួលបន្ទុកបន្ថែមទៀតក្នុងប្រព័ន្ធ Android ។ ឥទ្ធិពលនៃការខិតខំប្រឹងប្រែងរបស់លោកបានបន្តរហូតក្លាយជាប្រធានផលិតផលនាខែតុលា ឆ្នាំ ២០១៤។

-នៅឆ្នាំ ២០១៥ Sundar Pichai បានតំណែងជានាយកប្រតិបត្តិ Google គាប់ជួន Google បានប្តូរទៅក្រុមហ៊ុន Alphabet Inc។

+សមិទ្ធផលសំខាន់

ជាមនុស្សពោរពេញទៅដោយគំនិតច្នៃប្រឌិតខ្ពស់ Sundar Pichai ត្រូវបានគេស្គាល់សម្រាប់ការបង្កើតយ៉ាងជោគជ័យ Google Chrome នាឆ្នាំ ២០០៨ ដែលនេះជាស្នាដៃការងារដ៏ធំធេងបំផុតក្នុងជីវិត។

+ជីវិតផ្ទាល់ខ្លួន

ភរិយារបស់លោកមានឈ្មោះ Anjali Pichai ហើយបច្ចុប្បន្នមានកូន ២ នាក់។

+ទ្រព្យសម្បត្តិ

គិតត្រឹមចុងឆ្នាំ ២០១៥ Sundar Pichai មានទ្រព្យសម្បត្តិ ៦៥០ លានដុល្លារ ហើយនៅខែមេសាឆ្នាំ ២០១៧ ទ្រព្យសម្បត្តិរបស់លោកឡើងដល់ ៤០ ពាន់លានដុល្លារ។

+រឿងរ៉ាវសំខាន់ៗ ១០ ដែលអ្នកអាចមិនដឹង Pichai

-Pichai ជាអ្នកគាំទ្រដ៏ងប់ងុលកីឡា Circket ហើយលោកក៏ជាអ្នកដឹកនាំក្រុម Cricketប្រចាំសាលាផងដែរ។

-គ្រួសាររបស់លោកមិនមានទូរសព្ទប្រើរហូតដល់លោកអាយុ ១២ ឆ្នាំ

-មិត្តភ័ក្ដិរបស់លោកធ្លាប់មិនគាំទ្រឱ្យចូល Google មុននឹងលោកសម្រេចចូលធ្វើដោយខ្លួនឯង

-Pichai ចូលធ្វើការនៅ Google តាំងពីក្រុមហ៊ុនមិនទាន់ល្បី

-លោកមានការចងចាំយ៉ាងល្អនៅរាល់លេខទូរសព្ទរបស់អ្នកដទៃ

-លោកតែងតែប្រាស្រ័យទាក់ទងជាមួយសិស្សនៅសាលា IIT-Kharagpur តាមរយៈកម្មវិធី Skype

-Pichai ធ្លាប់ជាអ្នកប្រជែងដ៏ធំបំផុតមួយនៅតំណែងជា CEO របស់ Microsoft មុនត្រូវបានទៅលោក Satya Nadella វិញ

-លោកតែងតែចេញមុខធ្វើបទបង្ហាញនៅកម្មវិធី Google I/O ប៉ុន្មានឆ្នាំចុងក្រោយនេះ

-ធ្លាប់មានពាក្យចចាមអារ៉ាម Twitter ព្យាយាមទាក់ទាញលោកឱ្យទៅធ្វើការក្រុមហ៊ុនខ្លួន អំឡុងធ្វើការនៅ Google ប៉ុន្តែ Google ក៏បានដំឡើងប្រាក់ខែឱ្យលោកខ្ពស់ជាងមុនដើម្បីស្ទាក់ចិត្ត។

-លោកជាមនុស្សរួសរាយនិងចេះជួយយកអាសាគ្នា មិនដូចរូបរាងខាងក្រៅទេ។

បន្តចុចអាន៖

ប្រភព៖ thefamouspeople ប្រែសម្រួល៖ ប៊ុណ្ណារ៉ា