ដំណឹងល្អ! ខេត្តកោះកុង នឹងមានព្រលានយន្តហោះអន្តរជាតិ តម្លៃរាប់លានដុល្លារ

2017-06-22 07:16:29
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាមការឱ្យពីលោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានប្រាប់អ្នកសារព័ត៌មាននានាក្នុងស្រុកថា ព្រលានយន្តហោះលំដាប់អន្តរជាតិថ្មីមួយនៅខេត្តកោះកុង ដែលវិនិយោគដោយក្រុមហ៊ុនUnion Development Group (UDG) បាននិងកំពុងចាប់ផ្តើមសាងសង់ហើយ។

លោកបានឱ្យដឹងទៀតថា ព្រលានយន្តហោះអន្តរជាតិនេះ ស្ថិតនៅក្នុង ស្រុកបទុមសាគរ ខេត្តកោះកុង តាមគម្រោងព្រលានយន្តហោះនេះ គ្រោងវិនិយោគទឹកប្រាក់ចន្លោះពី ៣០០ទៅ៣៥០លានដុល្លារអាមេរិក។ បច្ចុប្បន្ននេះ កំពុងចាប់ផ្ដើមឈូសឆាយដី ដើម្បីរៀបចំជាការដ្ឋានហើយ។លោកបានបន្ថែមទៀតថា ព្រលានយន្តហោះនេះមានទំហំដី៧៥០ហិកតា ជាលក្ខណៈខ្នាតអន្តរជាតិតែម្ដង ហើយអាចទទួលការចុះចតយន្តហោះមកពីគ្រប់ទិសទី។

អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលរូបនេះបានបញ្ជាក់ថា ព្រលានយន្តហោះនេះអាចចុះចតយន្តហោះប្រភេទ4C ជាយន្តហោះខ្នាតមធ្យមបាន។ ដោយឡែក ចំពោះការបញ្ចប់ការសាងសង់នៅពេលណា លោកមិនទាន់អាចបញ្ជាក់បាននៅឡើយទេ។ ចំណែកឯការសិក្សាពីផលប៉ះពាល់បរិស្ថានស្ថិតក្រោមសមត្ថកិច្ចរបស់ក្រសួងបរិស្ថាន ហើយការសាងសង់ស្ថិតក្រោមក្រសួងរៀបចំដែនដី នគរោបនីយកម្ម និងសំណង់៕

អត្ថបទ៖ ថោ ច័ន្ទឬទ្ធិ

ប្រភព៖ rasmeinews