ព័រទុយហ្គាល់លត់នូវែលហ្សេឡង់ឡើង Semi Final ខណៈម៉ិកស៊ីកូទម្លាក់ម្ចាស់ផ្ទះរុស្ស៊ី (វីដេអូ)

2017-06-25 01:29:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជើងអឺរ៉ុបព័រទុយហ្គាល់ និងជើងឯកអាមេរិកខាងជើង ម៉ិកស៊ីកូបានកក់កៅអីឡើងទៅវគ្គពាក់កណ្តាលផ្តាច់ព្រ័ត្រពានរង្វាន់ FIFA Confederations Cup 2017 បន្ទាប់ពីយកឈ្នះគូប្រកួតរៀងៗខ្លួនក្នុងការប្រកួតបញ្ចប់ក្នុងពូល A កាលពីយប់មិញ។

ព័រទុយហ្គាល់មិនបានទុកមុខឲ្យនូវែលហ្សេឡង់ឡើយដោយបានលត់រហូតដល់៤-០ ដែលជាគ្រាប់បាល់ចូលទីច្រើនជាងគេក្នុងព្រឹត្តិការណ៍នេះគិតត្រឹមយប់មិញ។ តារាឆ្នើមស្ដេចស Real Madrid គឺ Cristiano Ronaldo បានស៊ុតពិន័យ១១ម៉ែត្របានសម្រេចនៅនាទីទី៣៣ មុនពេល Bernardo Silva ស៊ុតគ្រាប់ទីនៅនាទី៣៨ និង២គ្រាប់ទៀតនៅវគ្គទី២ដោយតារាវ័យក្មេង Andre Silva នៅនាទីទី៨០ និង Nani ដែលដូរចូលជំនួស Ronaldo ស៊ុតចូលនៅនាទីទី៩០។ វគ្គសន្សំពិន្ទុក្នុងពូលនេះមិនស្គាល់បរាជ័យឡើយពោលគឺឈ្នះ២ និងស្មើ១ដោយឈរលើកំពូលតារាងមាន៧ពិន្ទុ។

ចំណែកក្រុមម៉ិកស៊ីកូវិញបានទម្លាក់ម្ចាស់ផ្ទះរុស្ស៊ីតាមរយៈលទ្ធផល ២-១ ក្នុងភារកិច្ចបញ្ចប់ពូល Aនេះ។ តាមពិតទៅម្ចាស់ផ្ទះបានធ្វើឲ្យអ្នកគាំទ្រពេញកីឡដ្ឋានរំភើបរីករាយយ៉ាងខ្លាំងតាមរយៈការនាំមុខ ១-០ មុនដែលជាការធ្វើបានសម្រេចដោយ Aleksandr Samedov នៅនាទីទី២៥។ ប្រសិនបើរុស្ស៊ីរក្សាលទ្ធផលនេះបាន រុស្ស៊ីនឹងឡើងវគ្គពាក់កណ្តាលផ្តាច់ព្រ័ត្រ បន្ទាប់ពីឈ្នះ១ និងចាញ់១កន្លងមក។ ប៉ុន្តែបានហាលអាវទៅវិញ បន្ទាប់ពីម៉ិកស៊ីកូវាយបករហូតរកបាន២គ្រាប់ដោយកីឡាករ Nestor Araujo នៅនាទីទី៣០ និង Hirving Lozano នៅនាទីទី៥២។ លទ្ធផលជ័យជម្នះនេះបានធ្វើឲ្យម៉ិកស៊ីកូមិនទាន់ស្គាល់បរាជ័យដែរគឺមាន៧ពិន្ទុដូចព័រទុយហ្គាល់ បន្ទាប់ពីឈ្នះ២ និងស្មើ១ ប៉ុន្តែចាញ់គ្រាប់បាល់ដែលជាហេតុឈរលេខ២៕