ប្រធានាធិបតីកេនយ៉ា ចុះទស្សនកិច្ចស្ពានមិត្តភាពចិន ស្រាប់តែ ១១ថ្ងៃក្រោយស្ពានបាក់រលំ

2017-07-03 03:51:45
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅរយៈពេលប៉ុន្មានទសវត្សចុងក្រោយ ប្រទេសចិនបានព្យាយាមសាងសង់ស្ពានមិត្តភាពជាមួយបណ្ដាប្រទេសជាច្រើននៅអាហ្វ្រិក ក្នុងនោះស្ពាននៅប្រទេសកេនយ៉ា មួយបានបាក់រលំ ខណៈមិនទាន់បញ្ចប់ការសាងសង់នៅឡើយ។

រដ្ឋាភិបាលប្រទេសកេនយ៉ា បានប្រកាសផ្អាកការសាងសង់ស្ពាន Sigiri បន្ទាប់ពីមនុស្ស ២៨នាក់ បានរបួសដែលភាគច្រើនជាកម្មករ ក្រោយស្ពានបាក់ជាកំណាត់ៗកាលពីសប្ដាហ៍មុន។

ស្ពាននេះមានប្រវែង ១០០ម៉ែត្រ ស្ថិតនៅភាគខាងលិចប្រទេសកេនយ៉ា ត្រូវបានសាងសង់ឡើងដោយក្រុមហ៊ុនចិន China Overseas Engineering Co ដែលជាផ្នែកមួយរបស់ក្រុមហ៊ុនរថភ្លើងចិន China Railway។

ក្រុមហ៊ុនចិនមិនទាន់មានវិធានការចំពោះការបាក់រលំទេ ប៉ុន្តែអះអាងថា នឹងសងជំងឺចិត្តដល់កម្មករ។ មន្ត្រីកេនយ៉ា បានបញ្ជូនក្រុមវិស្វករជាន់ខ្ពស់មួយក្រុមទៅស្វែងរកមើលមូលហេតុធ្វើឲ្យស្ពានបាក់ដែលគ្រោងនឹងសម្ពោធនៅខែក្រោយនេះ។

អ្វីដែលធ្វើឲ្យគេចាប់អារម្មណ៍ គឺការបាក់រលំ កើតឡើងនៅរយៈពេលត្រឹមតែ ១១ថ្ងៃ បន្ទាប់ពីប្រធានាធិបតីកេនយ៉ា លោក Uhuru Kenyatta បានចុះទៅទស្សនកិច្ច និងជាផ្នែកមួយនៃយុទ្ធនាការឃោសនារកសំឡេងឆ្នោតសម្រាប់ការបោះឆ្នោតនៅខែសីហាខាងមុខ។ ស្ពាននេះសម្រាប់ឆ្លងទន្លេ River Nzioia ដោយចំណាយប្រាក់សាងសង់ប្រមាណ ១១,៥លានដុល្លារអាមេរិក។

ការសង់ស្ពាន Sigiri គឺក្រោយកើតមានឧបទ្ទវហេតុលិចទូកក្នុងទន្លេដែលបានឆក់យកជីវិតមនុស្ស ១១នាក់ កាលពីឆ្នាំ ២០១៤៕