គួរតាំងវត្ថុអ្វីខ្លះក្នុងផ្ទះ ដើម្បីនាំលាភសំណាង?

2017-07-06 09:03:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ការដាក់តាំងដើមឫស្សី ថូផ្កា ឆ្មាបក់ដៃ ឫវត្ថុផ្សេងៗនៅក្នុងផ្ទះ មិនត្រឹមតែជួយលំអទិដ្ឋភាពផ្ទៃបន្ទប់ ឫផ្ទះ ឲ្យកាន់តែមានសោភ័ណភាពមួយកម្រិតទេ បើតាមក្បូនហុងស៊ុយ ការដាក់តាំងវត្ថុមង្គលនៅក្នុងផ្ទះ អាចនាំលាភសំណាងដល់អ្នកនៅក្នុងផ្ទះផងដែរ។

ដើមឫស្សី៖ ដាំដើមឫស្សីនៅមុខផ្ទះ ឫដាក់ផើងឫស្សីក្នុងផ្ទះ ដើម្បីហៅលាភសំណាង។ ឫស្សី តំណាងឲ្យការនាំលាភសំណាង មាសប្រាក់ សេចក្តីសុខ ត្រជាក់ត្រជុំ និងភាពរលូនល្អូកល្អិន ដល់មនុស្សក្នុងផ្ទះ។

ផ្កាប៉ូយសៀន៖ ប៉ូយសៀន ជាដើមមង្គលនៃទេវតាទាំង ៨ ដែលការពារ ឃុំគ្រង និងនាំលាភសំណាងចូលផ្ទះ។

ថូផ្កា៖ តាំង ថូផ្កា នៅគ្រប់ជ្រុងផ្ទះ ឫដាក់ថូរូបរាងស្រស់ស្អាតខ្នាតធំក៏បាន ព្រោះថូផ្កាតំណាងឲ្យសិរីមង្គល ទាញស្រូបយកលាភសំណាង មិត្តភាព ឱកាស និងសេចក្តីស្នេហា។

រូបតំណាង

ត្រីប្រាក់ ត្រីមាស៖ ចិញ្ចឹមត្រីប្រាក់ ត្រីមាសនៅក្នុងទូរស្អាត និងជួយជំរុញថាមពលមនុស្សបានល្អ ចំណែកអ្នកនៅក្នុងផ្ទះ តែងតែមានលាភសំណាង និងសេចក្តីស្នេហា។

ឆ្មាបក់ដៃ៖ ឆ្មាបក់ដៃពីដំបូងឡើយ កើតនៅប្រទេសជប៉ុន។ ក្បួនហុងស៊ុយ និយមណែនាំឲ្យដាក់តាំងឆ្មាបក់ដៃនៅជិតខាងមុខហាងលក់ទំនិញ ដើម្បីបក់ដៃហៅមាសប្រាក់ចូលផ្ទះ ប៉ុន្តែអ្នកក៏អាចដាក់តាំងឆ្មាបក់ដៃ នៅក្នុងផ្ទះបានដែរ ព្រោះឆ្មាបក់ដៃ តំណាងឲ្យមាសប្រាក់ ឫជោគលាភ (ដាក់ឲ្យបែរមុខទៅរកទ្វារ)។

កង្កែបជើង៣ គីង្គក់ពាំកាក់៖ ដាក់កង្កែបជើង៣ ឫគីង្គក់ពាំកាក់ នៅជិតខាងមុខហាងលក់ទំនិញ លើតុធ្វើការ ឫលើធ្នើរក្នុងបន្ទប់ទទួលភ្ញៀវ ដើម្បីហៅភាពមានបាន និងទ្រព្យធនចូលផ្ទះ (ដាក់បែរមុខមុខទៅរកទ្វា)។

គំនូរទេសភាព៖ គំនូរទេសភាព តំណាងឲ្យសិរីមង្គល ដែលនាំឲ្យអ្នកនៅក្នុងផ្ទះ មានសេចក្តីសុខស្ងប់។ រូបភាពគូរជាមួយរូបភាពទន្លេ បឹងបួ ភ្នំ សមុទ្រ ឫវាលស្មៅ ដែលមើលទៅស្អាតត្រជាក់ភ្នែក។

សេះ សិង្ហ តោ ខ្លា៖ តុក្កតា និងរូបចម្លាក់សត្វទាំងនេះ នឹងជួយចម្រើនអំណាច បារមីក្នុងផ្ទះ។ គួរដាក់តាំងនៅក្នុងបន្ទប់ទទួលភ្ញៀវ ដែលស្រស់ស្អាត រស់រវើក និងគួរតាំងរូបសត្វទាំងនេះ មួយមុខបានហើយ ព្រោះប្រសិនជ្រុងបន្ទប់ ជាទីប្រជុំសត្វជាច្រើនប្រភេទនោះ អាចនាំជោគលាភអាក្រក់ ច្រើនជាងជោគលាភសំណាង។

អណ្តើក ក្រសា៖ តុក្កតា រូបភាពគំនូរអណ្តើក និងសត្វក្រសា ជាមង្គលសិរីលើភាពស្ងប់សុខ អាយុយឺនយូរ និងមានសុខភាពល្អ។

ឃ្លោក ៖ ឃ្លោកជាវត្ថុមង្គលហៅមាសប្រាក់ លាភសំណាងចូលក្នុងផ្ទះ។ ប្រសិនបើព្យួរឃ្លោកនៅក្នុងបន្ទប់ អ្នកជំងឺឆាប់ជាសះស្បើយ។

ក្រូច ទទឹម ចេក៖ ចូររកពពួកផ្លែឈើទាំងនេះ មកដាក់ក្នុងកន្ត្រកទុកលើតុអាហារជាប្រចាំ ព្រោះវត្ថុទាំងនេះនាំភាពមានបាន ស្តុកស្តម្ភ សម្បូរបែប៕

អត្ថបទ៖ អ៊ុំ សុភក្តិ