កាន់តែច្បាស់ ស្ដាប់ការរៀបរាប់របស់ក្មេងស្រី ដែលឪពុកអះអាងថាគេចាប់

2017-07-13 09:47:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ព័ត៌មានពីការចាប់ក្មេងស្រី ដែលឪពុកម្នាក់បានបង្ហោះលើបណ្ដាញសង្គម និងមានការចែកចាយបន្តជាច្រើនដង តាមពិតជារឿងយល់ច្រឡំ។ ក្មេងស្រី បានរៀបរាប់ដោយផ្ទាល់ថា តាមពិតខ្លួនវង្វេង តែមិនហ៊ាននិយាយប្រាប់ឪពុកតាមត្រង់។

បន្ទាប់ពីមានព័ត៌មានចែកចាយពេញបណ្ដាញសង្គម កម្លាំងនគរបាលប៉ុស្តិ៍បឹងទំពុន បានស្រាវជ្រាវរកឃើញក្មេងស្រីនោះ កាលពីថ្ងៃទី១២ កក្កដាម្សិលមិញ។ ក្មេងស្រីដែលល្បីថាត្រូវគេចាប់ មានអាយុ ១០ ឆ្នាំ ជាសិស្សសាលាភាសាជេនសាណា រស់នៅសង្កាត់បឹងទំពុន ខណ្ឌមានជ័យ។

បន្ទាប់ពីសួរនាំ ក្មេងស្រីបានរៀបរាប់ថា នៅថ្ងៃទី១១ ខែកក្កដា ឆ្នាំ២០១៧ វេលាម៉ោងប្រហែល ៤កន្លះ រូបនាង និងប្អូនស្រី, ម្ដាយមីង, ព្រមទាំងមិត្តភ័ក្ដិម្នាក់ បាននាំគ្នាជិះកង់ទៅលេងនៅវិហារយេស៊ូ នៅម្តុំស្ពានទី៣ ក្នុងសង្កាត់ បឹងទំពុន។ ពេលទៅដល់មានស្ត្រីជនជាតិបារាំងម្នាក់ នៅក្នុងវិហារនោះបានមកគូររូបលើថ្ពាល់ពួកគេទាំង ០៤នាក់ ព្រមទាំងឲ្យហូបនំ និងលេងហ្គេមរហូតដល់ម៉ោង ៥កន្លះថ្ងៃដដែល ទើបស្ត្រីជនជាតិបារាំងនោះឲ្យត្រឡប់ទៅផ្ទះវិញ។

ពេលនោះ ពួកគេបានជិះកង់វង្វេងផ្លូវ រកផ្ទះមិនឃើញក៏បានជិះទៅជិតដល់ផ្សារស្ទឹងមានជ័យជួបអ្នកជិតខាងម្នាក់ បាននាំពួកគេត្រឡប់មកផ្ទះវិញ។ ពេលដល់ផ្ទះវិញ ក្មេងស្រីនោះមិនហ៊ាននិយាយប្រាប់ឪពុកម្ដាយថាវង្វេងផ្លូវទេ គិតតែពីយំខ្លាំង ទើបធ្វើឲ្យគ្រួសារយល់ច្រឡំថាត្រូវគេចាប់ និងមានគួរសញ្ញាផ្កាចំណាំផង៕

ទស្សនាវីដេអូរៀបរាប់របស់ក្មេងស្រី៖