គ្រូ U23 កម្ពុជា បង្ហើបចំណុចខ្លាំងរបស់ចិន មុនប៉ះគ្នាបីថ្ងៃទៀតនេះ

2017-07-17 07:26:53
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Leonardo Vitorino គ្រូបង្វឹកក្រុម Cambodian All Stars និងជាគ្រូបង្វឹកក្រុម U23 កម្ពុជាបង្ហើបពីចំណុចខ្លាំងរបស់ចិនដែលត្រៀមប៉ះគ្នានៅថ្ងៃទី១៩ ខែកក្កដា ឆ្នាំ២០១៧ ខាងមុខនេះនៅពហុកីឡដ្ឋានជាតិក្នុងការប្រកួតវគ្គជម្រុះ 2018 AFC U-23 Championship។

ក្រោយក្រុម Cambodian All Stras បរាជ័យក្រោមថ្វីជើងក្រុមខ្លាំងរបស់ថៃ SCG Muangthong United ៤-០ កាលពីយប់មិញ គ្រូបង្វឹកសញ្ជាតិប្រេស៊ីលរូបនេះបានឲ្យដឹងថា លោកបានតាមដានការប្រកួត U23 ចិននាពីរប្រកួតចុងក្រោយ គឺពួកគេមានខ្សែបម្រើកណ្ដាលម្នាក់ ដែលអាចចែកបាល់ច្បាស់ និងមានភាពឆ្លាតវៃក្នុងការលេង។ ក្រៅពីនេះក្រុមខ្លាំងរបស់អាស៊ីមួយនេះមានខ្សែប្រយុទ្ធដ៏រឹងមាំ ដែលមានបទពិសោធន៍លេងនៅតំបន់អឺរ៉ុប។

គ្រូបង្វឹករូបនេះបន្ថែមថា ហេតុដូចនេះលោកគិតថា គ្រប់កីឡាកររបស់លោកត្រូវតែមានល្បឿនលឿន ដើម្បីតាមប្រកៀកដៃគូក្នុងជំនួបប៉ះចិននារយៈពេលដ៏ខ្លីខាងមុខនេះ។ ក្នុងចំណោមកីឡាករ U23 កម្ពុជាដែលត្រៀមជួបចិនមានចំណុចខ្វះខាតមួយចំនួនដែលត្រូវកែប្រែ ទន្ទឹមនឹងនោះក៏អាចមានកីឡាករដែលត្រូវកាត់ចេញពីបញ្ជីផងដែរ។

ក្នុងជំនួបមិត្តភាព Cambodian All Stars និង SCG Muangthong United គឺជាការប្រកួតធ្វើតេស្តកីឡាករ U23 កម្ពុជា ដើម្បីត្រៀមលេងវគ្គជម្រុះពានរង្វាន់ 2018 AFC U-23 Championship ដែលកម្ពុជាធ្វើជាម្ចាស់ផ្ទះចន្លោះពីថ្ងៃទី១៩ ដល់ថ្ងៃទី២៣ ខែកក្កដា ឆ្នាំ២០១៧ ដែលមានក្រុម U23 ចិន, U23 ជប៉ុន និង U23 ហ្វីលីពីន ចូលរួម៕