• ប្រកួតប្រជែងកុមារថ្នាក់អាស៊ានលើកទី៤
• សិស្សខ្មែរអាយុ ១២ឆ្នាំ ពីររូប នឹងចូលរួមប្រកួត
• ប្រធានបទការធ្វើស្ពតអប់រំ ពាក់ព័ន្ធនឹងបរិស្ថាន

សិស្សខ្មែរ អាយុ ១២ឆ្នាំ ពីររូប នឹងចូលរួមប្រកួតប្រជែងកុមារថ្នាក់អាស៊ានលើកទី ៤ នៅប្រទេសហ្វីលីពីន ក្រោមប្រធានបទ Asean Cyberkids 2017។ នេះជាលើកទី ២ ហើយដែលកម្ពុជា បានចូលរួមប្រកួតប្រជែងកុមារថ្នាក់អាស៊ាន ខណៈលើកទី ១ កម្ពុជា បានទទួលជ័យលាភីលេខ ៤។

លោក សម្យ កំសាន្ត នាយករងនៃវិទ្យាល័យព្រះស៊ីសុវត្ថិ បានឲ្យដឹងថា៖ «យើងបានចម្រាញ់សិស្សអាយុក្រោម ១២ឆ្នាំ ពីសាលាជំនាន់ថ្មីក្នុងវិទ្យាល័យព្រះស៊ីសុវត្ថិចំនួនពីរនាក់ទៅប្រកួត ជាមួយសិស្សនៅប្រទេសក្នុងតំបន់អាស៊ានចំនួន ១០ ក្រោមប្រធានបទចំនួន ១០០ ដោយ ១ ប្រទេសកំណត់យក ១០ប្រធានបទ» ដោយឡែកកូនសិស្សកម្ពុជាចំនួនពីររូប ម្នាក់ឈ្មោះ ហាក់ មុនីន្ទវរលក្សណ៍ និងម្នាក់ទៀតឈ្មោះ ហង់ ចាន់សុភារី ពួកគេទាំងពីរសុទ្ធតែប្រកួតប្រជែងចម្រាញ់ និងមានកម្រិតភាសាអង់គ្លេសខ្ពស់»។

លោកបន្តថា នៅក្នុងការប្រកួតប្រជែងនោះ គឺ​តម្រូវឲ្យសិស្សធ្វើស្ពតអប់រំ ទាក់ទងនឹងបរិស្ថាន ជាគំនិតច្នៃប្រឌិតជារូប Animation ​ ឬជាកម្មវិធីតុក្កតា ដែលការធ្វើនេះ មានរយៈពេល ៥ ទៅ ១០នាទី សម្រាប់សិស្សមួយក្រុម។

គួរជម្រាបថា ការប្រកួតនឹងចាប់ផ្ដើមថ្ងៃទី ១៩ ដល់ ថ្ងៃទី ២១ ខែកក្កដា ឆ្នាំ ២០១៧ នៅទីក្រុងម៉ានីឡា ប្រទេសហ្វីលីពីន៕

អត្ថបទ៖ ស៊ិន សាវ៉េត