ប្លែកណាស់! ភ្លោះទាំងកាមេរ៉ា ភ្លោះទាំងអេក្រង់

2017-07-27 02:02:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនទូរសព្ទចិន Meizu បានបង្ហាញចេញស្មាតហ្វូនពីរម៉ូដែល Meizu Pro 7 និង Pro7 Plus មានរចនាបថប្លែកខុសពីស្មាតហ្វូនដទៃបន្តិច ដោយមានទាំងកាមេរ៉ាភ្លោះ និង អេក្រង់ក៏ភ្លោះដែរ។

ដំបូងនិយាយពីអេក្រង់ភ្លោះដែលជាចំណុចគួរឲ្យចាប់អារម្មណ៍តែម្ដងទៅ។ អេក្រង់នេះជាប្រភេទអេក្រង់ AMOLED អាច Touch បាននឹងអាចប្រើសម្រាប់មុខងារមួយចំនួនដូចជាសម្រាប់មើល Notification, គ្រប់គ្រងលើការចាក់ចម្រៀង ឬ ប្រើជាអេក្រង់សម្រាប់មើលពេល Selfie ដោយប្រើកាមេរ៉ាក្រោយ។

ស្មាតហ្វូនពីរនេះជាស្មាតហ្វូនដំបូងសម្រាប់ Meizu ដែលមានបំពាក់កាមេរ៉ាភ្លោះ។ កាមេរ៉ាភ្លោះនេះមានជាប្រភេទថតរូបពណ៌ និង ថតរូប ស-ខ្មៅ ដោយមានកម្រិត ១២ MP។ យ៉ាងណាក្ដីចំណុចខ្លាំងគឺនៅត្រង់កាមេរ៉ាខាងមុខឯណោះដោយមានទំហំ ១៦ MP ដែលផលិតដោយប្រើរូបមន្ត "៤ ក្នុង ១" អាចឲ្យ Selfie ក្នុងទីងងឹតបានស្អាតល្អ។

នៅពីក្រោមកាមេរ៉ា Selfie គឺមានបំពាក់អេក្រង់ពីរប្រភេទផ្សេងៗគ្នាដោយ Pro 7 បំពាក់អេក្រង់ Super AMOLED ទំហំ ៥,២ អ៊ីញ កម្រិត FullHD និង Pro 7 Plus បំពាក់អេក្រង់ទំហំ ៥,៧ អ៊ីញកម្រិត QuadHD។

ចំណុចខុសគ្នាខ្លាំងបំផុតនៃស្មាតហ្វូនទាំងពីរម៉ូដែលគឺនៅខាងក្នុងឯណោះដោយ Pro 7 បំពាក់ឈីប MediaTek Helio P25 អមនឹង RAM ទំហំ ៤ GB និង មានអង្គផ្ទុកទិន្នន័យទំហំ ៦៤ GB។ Pro 7 នេះក៏មានមួយប្រភេទទៀតប្រើឈីប MediaTek Helio X30 ដែលមានអង្គផ្ទុកទិន្នន័យទំហំ ១២៨ GB ហើយថ្មមានទំហំ ៣០០០ mAh។

ចំណែក Pro 7 Plus វិញមានបំពាក់ឈីប MediaTek Helio X30 គួបផ្សំនឹង RAM ទំហំ ៦ GB ហើយមានអង្គផ្ទុកទិន្នន័យទំហំ ៦៤ GB ឬ ១២៨ GB។ ចំពោះថ្មមានទំហំ ៣៥០០ mAh ហើយទាំងពីរម៉ូដែលក៏មានបំពាក់បច្ចេកវិទ្យាសាកថ្មបានលឿនរបស់ Meizu mCharge 4.0។ ស្មាតហ្វូនទាំងពីរដើរដោយប្រព័ន្ធប្រតិបត្តិការ Flyme 6 របស់ Meizu ផ្ទាល់។