ការងារថ្មី ១០ ប្រភេទ ដែលគ្មានឡើយកាលពី ១០ ឆ្នាំមុន

2017-07-28 06:46:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្រឹមរយៈពេល ១០ ឆ្នាំចុងក្រោយនេះ ពិភពលោកមានការប្រែប្រួលយ៉ាងខ្លាំង ព្រោះការវិវត្តនៃបច្ចេកវិទ្យានានា ដែលបណ្ដាលឲ្យមានការបង្កើតការងារថ្មីៗប្រមាណ ១០ ប្រភេទ ដែលមិនដែលមានពីមុនមក។

១. អ្នកសរសេរកម្មវិធីសម្រាប់ស្មាតហ្វូន (App developer)

កើតឡើងអមនឹងការបង្ហាញខ្លួនរបស់ iPhone ម៉ូដែលដំបូងក្នុងឆ្នាំ ២០០៧ និង Android ចេញពេលក្រោយ ហើយដល់ឆ្នាំ ២០១៥ កំណើននៃ App ក្នុង App Store មានដល់ ១,៦ លាន និងក្នុង Play Store មានដល់ ១,៥ លាន។

២. អ្នកគ្រប់គ្រងបណ្ដាញសង្គម (Social media manager)

ការគ្រប់គ្រងទំព័រ Facebook ឬបណ្ដាញសង្គមនានាឲ្យត្រូវតាមបច្ចេកទេស គឺអាចជួយជំរុញអាជីវកម្មនានាឲ្យរីកចម្រើនបានយ៉ាងរហ័ស។

៣. អ្នកបើកឡានរបស់ UBER

UBER ជាក្រុមហ៊ុនឡានតាក់ស៊ីទំនើប និងធំបំផុត តែមិនប្រើឡានផ្ទាល់របស់ក្រុមហ៊ុនច្រើនឡើយ គឺរាល់ប្រតិបត្តិការទាំងអស់អ្នកបើកបរអាចប្រើប្រាស់ឡានខ្លួនឯង ហើយរកអតិថិជនតាម App របស់ UBER និងចែកភាគរយគ្នា។

៤. វិស្វករឡានបើកស្វ័យប្រវត្តិ (Driverless car engineer)

ស្ទើរតែគ្រប់ក្រុមហ៊ុនផលិតរថយន្តទាំងអស់ បានងាកមកផលិតបច្ចេកវិទ្យារថយន្តបើកបរដោយស្វ័យប្រវត្តិដែលគេជឿថាអាចកាត់បន្ថយគ្រោះថ្នាក់ចរាចរណ៍តាមផ្លូវសាធារណៈ។

៥. អ្នកឯកទេសកុំព្យូទ័ររក្សាទិន្នន័យក្នុងអ៊ីនធឺណិត (Cloud computing specialist)

កំណើននៃការប្រើប្រាស់ តម្លៃធូរថ្លៃ និងប្រសិទ្ធភាពនៃបណ្ដាញអ៊ីនធឺណិត ដែលធ្វើការការរក្សាទិន្នន័យទាំងប្រភេទឯកជន និងសហគ្រាសធំៗងាកយកប្រភេទ Cloud computing។

៦. អ្នកវិទ្យាសាស្ត្រ និងស្រាវជ្រាវទិន្នន័យកុំព្យូទ័រ (Big data analyst/data scientist)

ទិន្នន័យ គឺជាបេះដូងនៃបណ្ដាញអ៊ីនធឺណិត ហើយការទុកដាក់ វិភាគ និងប្រើប្រាស់ទិន្នន័យទាំងនោះឲ្យបានត្រឹមត្រូវ ជាអ្វីដែលពិភពលោកត្រូវការបំផុត។

៧. អ្នកគ្រប់គ្រងផ្នែកអភិវឌ្ឍដោយនិរន្តរភាព (Sustainability manager)

ការងារ មានតួនាទីរកវិធីដឹងនាំឲ្យគម្រោង ឬស្ថាប័ននានាអាចរក្សាលំនឹង រីកចម្រើន និងឈរជើងបានឋិតថេរដោយប្រើប្រាស់ធនធានមិនខ្ជះខ្ជាយ ដែលមានផលអវិជ្ជមានដល់បរិស្ថាន។ ឧទាហរណ៍ ៖ អាគារមួយត្រូវបានសាងសង់ ដោយឲ្យពន្លឺថ្ងៃចូលគ្រប់គ្រាន់ ដែលអាចជួយកាត់បន្ថយការប្រើប្រាស់ថាមពលអគ្គិសនី (អំពូល)។

៨. អ្នកបង្កើតមាតិកាក្នុងបណ្ដាញសង្គម YouTube (YouTube content creators)

ពួកគេបង្កើតជាវីដេអូនានាទៅតាមគណនី YouTube ផ្ទាល់ខ្លួន ហើយអាចរកចំណូលពីការវិភាគលើផលិតផលនានា។

៩. អ្នកបើកបរ Drone

ប្រជាប្រិយភាព និងសមត្ថភាពរបស់ Drone បានសម្រួលដល់វិស័យជាច្រើនទាំងកសិកម្ម កម្សាន្ត វិទ្យាសាស្ត្រ និងយោធាជាដើម ដូចនេះភាពចាំបាច់វត្តមានអ្នកបញ្ជា គឺជាកត្តាសំខាន់។

១០. អ្នកជំនាញវ័យក្មេង (Millennial generational expert)

Millennial ចង់សំដៅលើក្រុមមនុស្សដែលកើតចន្លោះទសវត្ស ៨០ ដល់ ៩០ ឬហៅថា GenY ។ បច្ចុប្បន្នក្រុម GenY មានអាយុចន្លោះជាង ៣០ ឆ្នាំចុងក្រោម ធ្វើឲ្យពួកគេមានភាពរហ័សរហួន និងយល់ច្បាស់ពីតម្រូវការមនុស្សជំនាន់ដូចគ្នា ដែលងាយស្រួលប្រកបការងារ និងពិភាក្សាគ្នាដែលអាចសម្រេចបានការងារជាច្រើន ជាពិសេសក្នុងការស្រាវជ្រាវ និងបង្កើតថ្មី៕