បើកឆាកពានមហាជនក្រចេះ ក្រុមគាតឈន់លត់ក្រុមកន្ទួត១០-០

2017-07-31 03:02:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់វិទ្យាល័យគាតឈន់នៅស្រុកឆ្លូងបានលត់ក្រុមវិទ្យាល័យកន្ទួតយ៉ាងចាស់ដៃក្នុងលទ្ធផល ១០-០ នៃសប្តាហ៍បើកឆាកការប្រកួតបាល់ទាត់មហាជនខេត្តក្រចេះកាលពីចុងសប្តាហ៍កន្លងទៅនេះនៅទីលានខេត្ត។

ថ្ងៃសៅរ៍ ទី២៩ ខែកក្កដា បើកឆាកមាន២គូនៅពូល A គឺក្រុមបាល់ទាត់មហាជនក្រុងក្រចេះបានយកឈ្នះក្រុមវិទ្យាល័យសណ្តាន់មកពីស្រុកសំបូរក្នុងលទ្ធផល ៥-១។ កីឡាករពាក់លេខ៧ រស់ រ៉ាវី បានស៊ុតចូល Hart-Trick ក្នុងតង់ទី២ បន្ទាប់ពីកីឡាករនាំសំណាង ពៅ ពិសិដ្ឋ ពាក់អាវលេខ១១ រកបានគ្រាប់ទី១ ក្នុងតង់ទី១។ ទោះបីជាយ៉ាងណា សណ្តាន់បានបំបែកពងមាន់១គ្រាប់វិញមុនពេលមុនពេលខ្សែការពាររបស់ក្រុមក្រុងក្រចេះទាត់បញ្ជូលទីគ្រាប់ចុងក្រោយ។ មួយគូទៀតក្នុងពូល A នេះដែរ ស្រុកស្នួលបានយកឈ្នះ ក្រុមវិទ្យាល័យថ្មគ្រែក្នុងលទ្ធផល២-១។

ការប្រកួតពូល B នៅថ្ងៃអាទិត្យទី៣១ ខែកក្កដា ក្រុមវិទ្យាល័យគាតឈន់មកពីស្រុកឆ្លូងរកគ្រាប់បាល់បានច្រើនជាងគេតាមរយៈការទម្លាយសំណាញ់ទីរបស់ក្រុមវិទ្យាល័យកន្ទួតដោយមិនឲ្យតដៃបានក្នុងលទ្ធផល ១០-0។ ចំពោះក្រុមមហាហង្សឆ្លូងដែលមកពីស្រុកឆ្លូងដែរនោះរកបានត្រឹម១ពិន្ទុប៉ុណ្ណោះ បន្ទាប់ពីស្មើក្រុមវិទ្យាល័យសុម្ភៈបុរ ០-០។ មែនទែនទៅក្រុម មហាហង្សឆ្លូង ទទួលបានឱកាសមាសទាត់បាល់ពិន័យ១១ម៉ែត្រ ប៉ុន្តែធ្វើមិនបានសម្រេច។