កីឡាវ៉ូស៊ូកម្ពុជាត្រៀមរួចហើយសម្រាប់ស៊ីហ្គេមឆ្នាំនេះ

2017-08-01 01:53:22
ចំនួនមតិ 0 | ចំនួនចែករំលែក 0

ចន្លោះមិនឃើញ

អគ្គលេខាធិការសហព័ន្ធកីឡាវ៉ូស៊ូកម្ពុជា ថាកីឡាករ កីឡាការិនី របស់ខ្លួនត្រៀមរួចរាល់ហើយដើម្បីត្រៀមចេញទៅប្រកួតប្រជែងយកមេដាយនៅព្រឹត្តិការកីឡាស៊ីហ្គេម ឯប្រទេសម៉ាឡេស៊ី ចុងខែសីហានេះ។

លោក ម៉ៅ ចន្ថាវុធ

លោក ម៉ៅ ចន្ថាវុធ ដែលជាអគ្គលេខាធិការសហព័ន្ធកីឡាវ៉ូស៊ូកម្ពុជាបានឲ្យដឹងថា ចំពោះកីឡាករ កីឡាការិនី វ៉ូស៊ូ ទាំងអស់បានធ្វើការហ្វឹកហាត់តាំងពីមុនការប្រមូលផ្ដុំកីឡាករជម្រើសជាតិកាលពីខែកុម្ភៈមកម្ល៉េះ។ សហព័ន្ធអនុវត្តន៍បានយ៉ាងល្អតាមផែនការរបស់ក្រសួងអប់រំក៏ដូចជា មជ្ឈមណ្ឌលជាតិហ្វឹកហ្វឺនកីឡាដាក់ឲ្យមាន៣ដំណាក់ការ ទី១ ដំណាក់រៀបចំ ទី២ ដំណាក់ការត្រៀម និងទី៣ ដំណាក់ការប្រកួត ហើយនៅពេលនេះគឺឈានដល់ដំណាក់ការចុងក្រោយនេះហើយ។

កីឡាករកំពុងហ្វឹកហាត់

អគ្គលេខាធិការខាងលើបន្តថា កីឡាករ កីឡាការិនីមួយចំនួនបានចេញទៅហ្វឹកហាត់នៅឯប្រទេសចិននាពេលកន្លងមកផងដែរ ហើយមើលឃើញថាពួកមានការយល់ដឹងច្រើនពីការចេញទៅហ្វឹកហាត់ផងដែរ។ សមត្ថភាពកីឡាករ កីឡាការិនីនាពេលបច្ចុប្បន្ននេះមានការរីកចម្រើនជាងឆ្នាំមុនៗទៅទៀត ដូចជាកម្លាំងកាយ ចលនាផ្សេងៗមានភាពរហ័សរហួន ប៉ុន្តែលោកក៏បានតាមដានពីការរីកចម្រើនរបស់ប្រទេសជិតខាង ដែលជាដៃគូប្រកួតប្រជែងផងដែរ ដើម្បីបង្កើនសមត្ថភាពកីឡាករបន្ថែមទៀត។

កីឡាករកំពុងហ្វឹកហាត់

លោក ម៉ៅ សុវណ្ណបញ្ញា

លោក ម៉ៅ សុវណ្ណបញ្ញា ដែលជាគ្រូបង្វឹកជម្រើសជាតិកីឡាវ៉ូស៊ូបានឲ្យដឹងដែរថា លោកបង្ហាត់៦ថ្ងៃក្នុង១សប្ដាហ៍ គឺចាប់ពីថ្ងៃចន្ទដល់សៅរ៍ ចាប់ពីម៉ោង ៦-៧ព្រឹកម្ដង ១០-១១:៣០នាទីថ្ងៃត្រង់ម្ដង និងល្ងាចម៉ោង ៤-៦។ ចំពោះសមត្ថភាពរបស់ពួកគេមានការរីកចម្រើនពីមួយកម្រិតទៅមួយកម្រិត ហើយគុណផលល្អជាងមុនទៅទៀត។ បើនិយាយពីចំណុចខ្វះខាតវិញសម្រាប់កូនសិស្សលោកក៏មានដែរ គឺកង្វះខាតសម្ភារហ្វឹកហាត់ ព្រោះសម្ភារទាំងនោះមានតម្លៃថ្លៃហើយត្រូវទិញមកពីក្រៅទៀត ដូច្នេះជាការលំបាកដល់ពួកគេហ្វឹកហាត់ផងដែរ។

កីឡាករ ហេង វាសនា

កីឡាករ ហេង វាសនា ដែលជាជម្រើសត្រៀមចេញទៅស៊ីហ្គេម ក៏បានលើកឡើងដែរថា ខ្លួននឹងប្ដេជ្ញាចិត្តថានឹងខំប្រឹងប្រកួតយកមេដាយជូនប្រទេសកម្ពុជាឲ្យបានសម្រាប់ស៊ីហ្គេមនៅប្រទេសម៉ាឡេស៊ីឆ្នាំ២០១៧នេះ។ បច្ចុប្បន្ននេះកីឡាកររូបនេះខិតខំហ្វឹកហាត់រៀងរាល់ថ្ងៃដើម្បីបង្កើនគុណផល ហើយព្យាយាមកែប្រែចំណុចខ្វះខាតចំនួនដែលនៅធ្វើមិនទាន់បានល្អ។ សម្រាប់ស៊ីហ្គេមលើកទី២៩ នៅប្រទេសម៉ាឡេស៊ី ដែលចាប់ផ្ដើមពីថ្ងៃទី១៩ ដល់ ថ្ងៃទី៣០ ខែសីហា នេះ ប្រទេសកម្ពុជាបញ្ចូល២៤ប្រភេទកីឡាដើម្បីប្រកួតប្រជែងយកមេដាយ។ ក្នុងនោះកីឡាវ៉ូស៊ូកម្ពុជាបញ្ចូនកីឡាករ៣រូប និងកីឡាការិនី១រូប ហើយពួកគេនឹងចេញទៅនៅថ្ងៃទី១៨ សីហានេះ៕ ស្រាបៀរអង្គរមានមោទនភាពគាំទ្រអត្តពលិកជាតិចូលរួមប្រកួតកីឡាស៊ីហ្គេម ២០១៧ #ឆន្ទៈយើងបេះដូងយើង។

អត្ថបទ៖ នួន ស៊ីណា