រឿង សុភ័ណ្ឌ៖ នឹងខំប្រឹងហាត់ថែមទៀត ព្រោះចង់ល្បីដូច Buakaw

2017-08-01 04:24:42
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់លេងកណ្ដាប់ដៃ រឿង សុភ័ណ្ឌ ថាសព្វថ្ងៃនេះគេមិនទាន់ល្អគ្រប់គ្រាន់នោះទេ ហើយនឹងខំប្រឹងហ្វឹកហាត់បន្ថែមទៀតដើម្បីមានកេរ្តិ៍ឈ្មោះល្បីដូចអ្នកប្រដាល់ជួរមុខរបស់ប្រទេសថៃ ប៊ូខាវ ជាដើម។

កីឡាករ រឿង សុភ័ណ្ឌ

កីឡាករ រឿង សុភ័ណ្ឌ បានឲ្យដឹងក្រោយផ្ដួលថៃនៅ PNN ថា សមត្ថភាពប្រកួតនៅកម្ពុជាអាចចាត់ទុកថាល្អហើយនាពេលបច្ចុប្បន្ននេះ ប៉ុន្តែបើប្រៀបធៀបនិងប្រទេសដទៃទៀតដូចជាថៃជាដើមនៅមិនទាន់ដល់គេនោះទេ។ បើនិយាយពីភាពល្បីល្បាញទាល់តែដូច Buakaw ឬ Yodsanklai ពួកគេល្បីដល់អឺរ៉ុបទៅហើយ និងវិស័យប្រដាល់របស់គេមានការរីកចម្រើនខ្លាំង។

កីឡាករ រឿង សុភ័ណ្ឌ ក្រហម

ម្ចាស់ខ្សែក្រវាត់គោជល់រូបនេះបន្តថា ចំពោះសមត្ថភាពប្រកួតរបស់កីឡាករថៃប៉ុន្មាននាក់ខាងលើនេះ ពួកគេខ្លាំងមិនងាយកីឡាករណាម្នាក់យកឈ្នះនោះទេ។ ចំពោះវិស័យប្រដាល់កម្ពុជា ក៏ដូចជាកីឡាករនាពេលបច្ចុប្បន្នក៏ល្អ និងរីកចម្រើនបណ្ដើរៗហើយដែរ។ សុភ័ណ្ឌ ថាខ្លួននៅចង់ល្បីជាបន្តទៀត មិនចង់ឲ្យកេរ្តិ៍ឈ្មោះឆាប់សាបរលាបនោះទេ ដូចនេះអ្នកប្រដាល់រូបនេះនឹងខំប្រឹងធ្វើការហ្វឹកហាត់ឲ្យខ្លាំងតាមដែលអាចធ្វើទៅបាន ដើម្បីគុនខ្មែរផង និងដើម្បីខ្លួនឯងផងដែរ។

កីឡាករ រឿង សុភ័ណ្ឌ ក្រហម

រឿង សុភ័ណ្ឌ ជាអ្នកប្រដាល់ជួរមុខរបស់កម្ពុជាគេជាម្ចាស់ខ្សែក្រវាត់ភេសជ្ជៈគោជល់របស់សង្វៀន CNC ហើយកីឡាកររូបនេះក៏បានប្រកួតឈ្នះខ្សែក្រវាត់១ទៀតកាលនៅប្រទេសបារាំងផងដែរ៕

អត្ថបទ៖ នួន ស៊ីណា