រឿងក្ដីអាថ៌កំបាំង លួចកាត់សក់នារីនៅឥណ្ឌា កំពុងបង្កការភ័យខ្លាច

2017-08-03 06:28:20
ចំនួនមតិ 0 | ចំនួនចែករំលែក 0

ចន្លោះមិនឃើញ

នារីជាង ៥០នាក់ នៅរដ្ឋ Haryana និង Rajasthan ត្រូវបានជនមិនស្គាល់មុខ លួចកាត់សក់យ៉ាងអាថ៌កំបាំង អំឡុងពេលបាត់បង់ស្មារតីដោយមិនដឹងមូលហេតុពិត។ ប៉ូលិសកំពុងព្យាយាមស៊ើបអង្កេតរឿងក្ដីដ៏ចម្លែកមួយនេះ ព្រោះនារីជាច្រើនកំពុងភ័យខ្លាចពីសុវត្ថិភាពផ្ទាល់ខ្លួន។

នារីម្នាក់ដែលមានអាយុ ៥៣ឆ្នាំ ឈ្មោះ Sunita Devi នៅរដ្ឋ Haryana បាននិយាយថា៖ "មានពន្លឺយ៉ាងខ្លាំង ដែលធ្វើឲ្យខ្ញុំបាត់ស្មារតី។ ប្រហែលមួយម៉ោងក្រោយមក ខ្ញុំស្រាប់តែឃើញសក់ខ្ញុំ ត្រូវគេកាត់"។ ហេតុការណ៍មួយនេះ កើតឡើងកាលពីថ្ងៃសុក្រ ដែលធ្វើឲ្យនារីរងគ្រោះ ភិតភ័យមិនទាន់បាត់នៅឡើយ។

ស្ត្រីរងគ្រោះ Sunita Devi

Sunita Devi បានរៀបរាប់ទៀតថា៖ "ពេលនោះខ្ញុំនៅជាន់ក្រោមម្នាក់ឯង ហើយកូនប្រសាស្រី និងចៅប្រុសរបស់ខ្ញុំនៅជាន់លើ ពេលដែលគេធ្វើសកម្មភាពនៅម៉ោងប្រហែល ៩កន្លះយប់"។ នាងបានបន្ថែមថា អ្នកដែលលូចកាត់សក់នាង មើលទៅដូចជាបុរសចំណាស់ម្នាក់ ស្លៀកពាក់សំលៀកបំពាក់ភ្លឺចែងចាំង។

ទោះយ៉ាងណា នៅពេលធ្វើសកម្មភាព ហាក់ដូចជាអាថ៌កំបាំងណាស់ ព្រោះគ្មាននរណាឃើញឡើយ បើទោះបីមានអ្នកជិតខាងច្រើនយ៉ាងណាក៏ដោយ។ អ្នកជិតខាងរបស់ Sunita Devi បានស្នាក់នៅជិតនាងបណ្ដោះអាសន្ន រហូតដល់នារីរងគ្រោះរូបនេះលែងមានអារម្មណ៍ថាភ័យខ្លាច។

ប្រហែលប៉ុន្មានម៉ែត្រពីផ្ទះរបស់ Sunita Devi មាននារីម្នាក់ទៀតឈ្មោះ Asha Devi ក៏បានរងការវាយប្រហារយ៉ាងចម្លែកនេះដូចគ្នា ប៉ុន្តែជនរងគ្រោះក្រោយប្រាប់ថាអ្នកលួចកាត់សក់ជាមនុស្សស្រី។ ហេតុការណ៍នេះ កើតឡើងនៅវេលាម៉ោងប្រហែល ១០យប់ នៅពេលដែលនារីរងគ្រោះចេញក្រៅផ្ទះបាត់ប្រហែល ៣០នាទី។ យ៉ាងណាក្ដី សក់នោះ មិនត្រូវបានអ្នកកាត់យកទៅណាឡើយ គឺកាត់ទម្លាក់នៅនឹងកន្លែងតែម្ដង។

នៅមានរឿងក្ដីស្រដៀងគ្នា កើតឡើងប្រមាណ ៥០ករណីស្រដៀងគ្នា ដែលធ្វើឲ្យប៉ូលិសកើតការងឿងឆ្ងល់យ៉ាងខ្លាំង និងកំពុងតាមប្រមាញ់រកការពិត។ ហេតុការណ៍លួចកាត់សក់នេះ បានកើតឡើងដំបូង កាលពីដើមខែកក្កដានៅរដ្ឋ Rajasthan ប៉ុន្តែក្រោយមកក៏ចាប់ផ្ដើមរាលដាលនៅរដ្ឋ Haryana និងរដ្ឋធានីដេលី៕

ប្រភព៖ BBC ប្រែសម្រួល៖ គង់ វិសាល