មកស្គាល់បុរសឥណ្ឌាចាប់ «ស្ដេចពស់វែក» ជាង ១០០ក្បាល តែធ្លាប់ត្រូវពស់ចឹករាប់ពាន់ដង

2017-08-04 04:58:32
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជនជាតិឥណ្ឌាម្នាក់ មានសមត្ថភាពពិសេសចម្លែកខុសគេ ព្រោះអាចចាប់សត្វអាសិរពិស ដោយមិនមានឧបករណ៍ជំនួយ គឺចាប់ផ្ទាល់ដៃឆៅៗ។ សកម្មភាពចាប់ពស់វែកបែបជួយសង្គ្រោះនេះ បានធ្វើឲ្យលោកទទួលបានការកោតសរសើរពីប្រជាជនយ៉ាងច្រើន។

លោកមានឈ្មោះ Vava Suresh អាយុ ៤២ឆ្នាំ ជាអ្នកអភិរក្សសត្វលេចធ្លាម្នាក់ ហើយតែងតែទទួលទូរសព្ទឲ្យចុះទៅជួយចាប់ពស់វង្វេងសំបុកចេញពីផ្ទះពលរដ្ឋ។ ជាញឹកញាប់ ពស់ដែលលោកចាប់ជាប្រភេទពស់មានពិសអាចសម្លាប់មនុស្សបានដូចជា ស្ដេចពស់វែក ពស់វែកធម្មតា និងពស់គ្រោះថ្នាក់ផ្សេងៗទៀត។

បើតាមប្រភព បុរសរស់នៅរដ្ឋ Kerala រូបនេះ បានជួយសង្គ្រោះស្ដេចពស់វែកចំនួន ១១៣ក្បាលមកហើយ ដោយពស់នេះត្រូវបានគេចាត់ទុកជាពស់ដ៏គ្រោះថ្នាក់បំផុតមួយក្នុងការប្រហារជីវិតមនុស្ស។

ទោះយ៉ាងណា លោកអះអាងថា ខ្លួនធ្លាប់ត្រូវពស់ចឹកចំនួន ៣ ៨៨៣ដង ក្នុងនោះពស់មានពិសចំនួន ៣៨៧ដង ក្នុងអាជីពជាអ្នកចាប់ពស់រយៈពេលពេលជាង ២៨ឆ្នាំ។ លោកត្រូវបានគេដាក់រហស្សនាមបុរសពស់ ឬ Snake Man។

លោកបានបញ្ជាក់ប្រាប់សារព័ត៌មានឥណ្ឌា Indiatimes ថា ខ្លួនបានចាប់ពស់ដោយដៃទទេលើកដំបូងតាំងពីរៀននៅបឋមសិក្សាមកម្ល៉េះ ហើយជាពស់វែកទៀងផង គឺខណៈពេលត្រលប់ពីរៀនដើរមកផ្ទះវិញ ស្រាប់តែឃើញពស់កំពុងវេននៅគែមផ្លូវ។ កាលនោះ ព្រោះតែចង់ដឹងថា វាជាសត្វអ្វីក៏ទៅចាប់ដោយដៃទទេ យកមកផ្ទះតែម្ដង។ ចំណែកមិត្តភ័ក្ដិលោកភ័យខ្លាច រត់គ្រប់គ្នា ហើយក៏ស្រែកប្រាប់ឲ្យបោះចោល តែលោកមិនព្រម។

ពេលរៀនចប់នៅសាលា លោកបានសិក្សាស្វែងយល់ពីសត្វពស់ រួចសម្រេចចិត្តដើរជួយសង្គ្រោះពស់ និងសត្វព្រៃផ្សេងទៀត ដែលវង្វេងផ្លូវ ឬមកយាយីជាមួយមនុស្ស។ មកទល់ពេលនេះលោកមិនដែលគិតថា ចង់បោះបង់របរមួយនេះនៅឡើយទេ ថែមទាំងចង់អប់រំមនុស្សពីសារសំខាន់នៃវត្តមានសត្វពស់ក្នុងធម្មជាតិទៀតផង៕