គ្រូពេទ្យចិត្តធម៌អូស្ត្រាលី នាំបុរសខ្មែរមានដុំសាច់ជាង៣០ឆ្នាំ ទៅវះកាត់ទទួលជោគជ័យ

2017-08-04 10:21:18
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូពេទ្យអូស្ត្រាលីបានវះកាត់លើបុរសកម្ពុជាម្នាក់ដែលមានដុំសាច់ដុះក្នុងមាត់ដ៏ធំរយៈពេលជាង ៣០ឆ្នាំ ដោយទទួលបានជោគជ័យជាប្រវត្តិសាស្ត្រ។

លោកតា អេង ខេង ជាអ្នកភូមិម្នាក់រស់នៅខេត្តកំពង់ចាម បានជួបជំងឺបែបនេះរយៈពេលជាង ៣០ឆ្នាំ ហើយមិនដែលទទួលការព្យាបាលម្ដងណាឡើយ។

ថ្ងៃមួយ លោកវេជ្ជបណ្ឌិត Andrew Cheng រស់នៅទីក្រុង Adelaide ប្រទេសអូស្ត្រាលី បានទទួលដំណឹងពីករណីរបស់លោកតា ខេង ពេលលោកធ្វើដំណើរមកកម្ពុជាបែបមនុស្សធម៌ លោកក៏ចង់ជួយលោកតាតែម្ដង។ លោក Andrew Cheng និយាយថា "ខ្ញុំមិនដែលឃើញករណីបែបនេះទេពីមុនមក ហើយមិនដែលគិតថាមានអ្នកកើតដុំសាច់ដ៏ធំអីចឹងដែរ"។

គ្រូពេទ្យចិត្តធម៌ជនជាតិអូស្ត្រាលីរូបនេះ បានស៊ើបដឹងកន្លែងនៅរបស់លោកតា ខេង ក៏ចុះទៅដល់ភូមិលោកតា នៅកំពង់ចាមតែម្ដង។ គ្រូពេទ្យដដែល បាននាំលោកតាទៅគ្រូពេទ្យកម្ពុជាស្កេនមើល ដើម្បីប្រាកដថាវាមិនមែនជាដុំសាច់កាច រួចក៏ត្រៀមរៀបចំទៅវះកាត់នៅប្រទេសអូស្ត្រាលី។

យោងទៅតាមគ្រូពេទ្យខាងលើ ដុំសាច់នេះជាករណីកម្រមួយឈ្មោះថា Gingival Hyperplasia និងកើតឡើងមួយក្នុងចំណោម ៧៥ម៉ឺនករណី។

ដោយសារស្ថានភាពរបស់លោកតាធ្ងន់ធ្ងរ គ្រូពេទ្យ Cheng សម្រេចទាក់ទងមន្ទីរពេទ្យ Ashford Hospital ក្នុងទីក្រុង Adelaide ហើយគេក៏យល់ព្រម។ ក្រោយមក ការវះកាត់ទទួលបានជោគជ័យ លោកតាខេង ក៏ជាសះស្បើយ សុខភាពធម្មតា និងបន្សល់ទុកស្លាកស្នាមតិចតួចប៉ុណ្ណោះ៕