វ៉ាត់ ចំរើន រំលឹកអត្តពលិកទៅស៊ីហ្គេម កុំភ្លេចពាក្យផ្ដាំរបស់សម្ដេច ២ចំណុច

2017-08-05 04:49:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្ដម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា បានក្រើនរំលឹកទៅកាន់អត្តពលិក ដែលត្រូវចេញទៅប្រកួតព្រឹត្តិការណ៍ស៊ីហ្គេមទាំង ២៤ប្រភេទកីឡាថា កុំភ្លេចពាក្យបណ្ដាំរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាចំនួន ២ចំណុច។

១- បញ្ហាដូប៉ាដូពីង
២- ចាញ់ឬឈ្នះរក្សាកិត្តិយសជូនប្រជាជនខ្មែរទាំងអស់

ក្នុងឱកាសជួបជុំជប់លៀងជូនដំណើរអត្តពលិកចេញទៅប្រទេសម៉ាឡេស៊ីកាលពីយប់មិញនេះ ឯកឧត្ដម វ៉ាត់ ចំរើន បានឲ្យដឹងថា សូមអត្តពលិកទាំងអស់កុំភ្លេចបណ្ដាំផ្ដាំផ្ញើរបស់សម្ដេចចំនួនពីរឃ្លាសំខាន់ៗខាងលើ។ បញ្ហាដូពីងនេះ គឺកីឡាករ-កីឡាការិនី ត្រូវជៀសវាងឲ្យបាន ពិសេសគឺថ្នាំជំនួយកម្លាំងតែម្ដង។

ឯកឧត្ដម វ៉ាត់ ចំរើន

លោកបន្ថែមថា ចំណុចមួយទៀតគឺប្រសិនបើកីឡាករ-កីឡាការិនីរូបណា មានជំងឺប្រចាំកាយ ដែលត្រូវប្រើថ្នាំជាប្រចាំ សូមលោកគ្រូបង្វឹកទាំងអស់ រាយការណ៍ទៅកាន់គណៈកម្មាធិការជាតិអូឡាំពិកជាបន្ទាប់ ដើម្បីឲ្យគណៈកម្មាធិការជាតិអូឡាំពិកកម្ពុជារៀបចំបញ្ជូនដំណឹងទៅកាន់គណៈកម្មាធិការជាតិអូឡាំពិកម៉ាឡេស៊ី។ ចំពោះករណីរក្សាកិត្តិយសជូនប្រជាជនកម្ពុជាវិញ គឺលោកសំដៅចង់ឲ្យកីឡាកររក្សាភាពថ្លៃថ្នូរពោលគឺរក្សាតម្លៃទោះចាញ់ឬឈ្នះក៏ដោយ ពោលគឺចាញ់ ចាញ់ដោយភាពថ្លៃថ្នូរ ហើយឈ្នះគឺឈ្នះដោយភាពថ្លៃថ្នូរក្នុងនាមជាអ្នកកីឡា។

ព្រឹត្តិការណ៍កីឡាស៊ីហ្គេមនៅប្រទេសម៉ាឡេស៊ី នឹងចាប់ផ្ដើមដំណើរការប្រកួតចាប់ពីថ្ងៃទី១៩ ដល់ថ្ងៃទី៣០ ខែសីហា ឆ្នាំ២០១៧៕