ឧកញ៉ា សៀ ឫទ្ធី ប្រាប់ឲ្យប្រជាពលរដ្ឋប្រុងប្រយ័ត្នរឿង ដី ផ្ទះ លក់ថោកៗពេញហ្វេសប៊ុក
- 2017-08-07 05:19:10
- ចំនួនមតិ 0 | ចំនួនចែករំលែក 0
ឧកញ៉ា សៀ ឫទ្ធី ប្រាប់ឲ្យប្រជាពលរដ្ឋប្រុងប្រយ័ត្នរឿង ដី ផ្ទះ លក់ថោកៗពេញហ្វេសប៊ុក
ចន្លោះមិនឃើញ
តាមរយៈបទសម្ភាសន៍ដោយផ្ទាល់ជាមួយ Sabay ឧកញ៉ា សៀ ឫទ្ធី ស្ថាបនិកក្រុមហ៊ុន WorldBridge ដ៏ធំមួយក្នុងប្រទេសកម្ពុជា បានប្រាប់ឱ្យប្រជាពលរដ្ឋប្រុងប្រយ័ត្នរឿង ដី ផ្ទះប្រកាសលក់ថោកៗពេញហ្វេសប៊ុកត្រឹម១ម៉ឺនដុល្លារ ២ម៉ឺនដុល្លារ គ្មានការប្រាក់ គ្មានលុយកក់ ប្រយ័ត្នយកលុយឱ្យគេទទេៗ។
អ្នកជំនួញដ៏ល្បីល្បាញក្នុងវិស័យអចលនទ្រព្យនេះ បន្តទៀតថា ប្រជាពលរដ្ឋគួរប្រយ័ត្នពីព្រោះបើនិយាយពីវិស័យអចលនទ្រព្យ មិនដឹងថានរណាជានរណាទេ។ ឧទាហរណ៍ថា អ្នកលក់មានដីមួយឡូត៍ពុះលក់នៅក្នុងប្លង់មេមិនបានដាក់ថា កន្លែងណាលូ? កន្លែងណាផ្លូវទេ? ហើយនៅពេលដែលរដ្ឋចេញច្បាប់មកត្រូវថយចេះ ត្រូវកាត់ អ្នកដែលប៉ះពាល់គឺអ្នកទិញនោះហើយ។ ដូច្នេះនៅពេលមានបញ្ហាតើទៅសួរអ្នកណា? តើអ្នកណាជាអ្នកដោះស្រាយ?
មកដល់ចំណុចនេះលោក ឧកញ៉ា សៀ ឫទ្ធី មានប្រសាសន៍យ៉ាងដូច្នេះថា៖ បើសម្រាប់ខ្ញុំ ខ្ញុំមិនលើកទឹកចិត្តគាត់ឱ្យទៅទិញដី ផ្ទះទាំងនោះទេ មុននឹងទិញត្រូវពិនិត្យមើលក្រុមហ៊ុនឱ្យបានច្បាស់លាស់ បើគ្រាន់តែជាបុគ្គលម្នាក់ប្រជាពលរដ្ឋមិនគួរប្រថុយនោះទេ បើប្រថុយមនុស្សម្នាក់យកលុយយើងបាត់ តើយើងទៅរករឿងអ្នកណា? បើជាក្រុមហ៊ុនមានរដ្ឋជាអាណាព្យាបាលការពារ ហើយចំពោះបុគ្គលពន្ធក៏មិនបង់ ឈ្មោះក្រុមហ៊ុនក៏មិនមាន។
លោកឧកញ៉ា សៀ ឫទ្ធី បានផ្ដល់ជាយោបល់ថា ដើម្បីជៀសវាងករណីទិញដី ឫផ្ទះចាញ់បោកគេ ត្រូវសិក្សាទៅលើបញ្ហាមួយចំនួនដូចខាងក្រោម៖
១. ត្រូវសិក្សាផ្លូវច្បាប់ឱ្យបានច្បាស់លាស់ ថាតើដីនៅតំបន់នោះ ស្ថិតនៅក្នុងដីប្រភេទណា? ជាដីស្ថិតក្នុងគម្រោងអភិវឌ្ឍរបស់រដ្ឋាភិបាលឬទេ? តើមានច្បាប់អនុញ្ញាតឱ្យពុះលក់ឬក៏អត់?
២. ប្រជាពលរដ្ឋត្រូវសិក្សាមើលថា ជាក្រុមហ៊ុនអ្វី? មានចុះបញ្ជីច្បាស់លាស់ឬក៏អត់?
៣. ត្រូវពិចារណាថា ដី ឫផ្ទះលក់ថោកៗគ្មានការប្រាក់ គ្មានប្រាក់កក់នោះ ប្រាកដជាមិនអាចទុកចិត្តបានទេ ទោះតម្លៃត្រឹម ៥០០០ដុល្លារ ឫ៦០០០ដុល្លារ តែនេះជាលុយដែលប្រជាពលរដ្ឋខំរកដោយលំបាក ជាញើសជាឈាមយកឱ្យគេស្រួលៗម្ល៉េះ?