ចន្ទគ្រាសនឹងកើតយប់នេះហើយ តាមជំនឿស្ត្រីមានផ្ទៃពោះត្រូវធ្វើរឿងទាំងនេះ ទើបផុតគ្រោះ
- 2017-08-07 07:56:24
- ចំនួនមតិ 0 | ចំនួនចែករំលែក 0
ចន្ទគ្រាសនឹងកើតយប់នេះហើយ តាមជំនឿស្ត្រីមានផ្ទៃពោះត្រូវធ្វើរឿងទាំងនេះ ទើបផុតគ្រោះ
ចន្លោះមិនឃើញ
យប់នេះនឹងមានបាតុភូតច័ន្ទគ្រាសកើតឡើង បើតាមជំនឿដូនតាខ្មែរតាំងពីបរមបុរាណមក មានជំនឿថា បាតុភូតនេះនឹងនាំគ្រោះដល់ស្ត្រីមានផ្ទៃពោះ។ តាមការប្រាប់របស់លោកតាអាចារ្យ ចក់ ឡាង បានឱ្យដឹងថា នៅយប់ថ្ងៃច័ន្ទគ្រាសមកដល់ ចាស់ៗតែងដាស់ស្ត្រីមានផ្ទៃពោះឱ្យភ្ញាក់ និងយកអកកំបោរ ឫដុំថ្ម ដាក់ក្នុងថ្នក់សំពត់។ ចំណែកនៅមុខផ្ទះវិញចាស់ៗ តែងនាំគ្នាយកខ្ទះ យកឆ្នាំង យកប៉ោត វាយឱ្យឭសំឡេងខ្លាំងៗ ដើម្បីបណ្ដេញខ្មោច ព្រាយបិសាច ឧបទ្រពចង្រៃ ឱ្យខ្ចាត់ខ្ចាយពីគ្រួសារ។
តាមជំនឿដូនតាខ្មែរ តែងជឿថា ប្រសិនបើមិនធ្វើបែបនេះទេ ខ្មោចព្រាយបិសាចនឹងចូលសណ្ឋិតក្នុងខ្លួនស្ត្រីមានផ្ទៃពោះនោះ ហើយនៅពេលកូនកើតមក មានលក្ខណៈមិនគ្រប់ កើតមកដៃជើងទន់ល្វតល្វៃ ចាស់ៗចំណាំហៅថា (ស្កន់ជាន់ ឬរាជាន់)។ ដោយសារតែមានជំនឿបែបនេះហើយ ទើបចាស់ៗពីដើមក្នុងសង្គមខ្មែរ ប្រយ័ត្នប្រយែងណាស់ ដើម្បីឱ្យកូនចៅឆ្លងផុតគ្រោះទាំងឡាយ។
គួរឱ្យដឹងដែរថា បាតុភូតច័ន្ទគ្រាសនឹងកើតឡើងនៅយប់ថ្ងៃទី ០៧ ខែសីហានេះ ក្នុងនោះប្រទេសកម្ពុជាអាចមើលឃើញបាតុភូតនេះបានយ៉ាងច្បាស់ ប្រសិនបើមិនមានពពកបាំងនោះទេ ហើយបណ្ដាប្រទេសភាគច្រើននៅទ្វីបអឺរ៉ុប, អាហ្វ្រិក, អូស្ត្រាលី និង ប្រទេសនៅតំបន់អាស៊ីអាគ្នេយ៍ក៏អាចមើលឃើញដូចគ្នា។ យោងតាមវិបសាយ Time and Date បានព្យាករណ៍ថាបាតុភូតចន្ទគ្រាសនេះនឹងចាប់ផ្ដើមចូលពី ម៉ោង ១០៖៥០ នាទីយប់ថ្ងៃទី ៧ រហូតដល់ ម៉ោង ៣៖៥០ នាទីព្រឹកថ្ងៃទី ៨ ម៉ោងនៅប្រទេសកម្ពុជា៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
