តារាប្រុសមុខស្រដៀង Kim Soohyun មានប្រវត្តិតស៊ូបែបណាមុនចូលសិល្បៈ?

2017-08-07 23:18:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងប្រុសវ័យក្មេង តេង ហ៊តណារ៉ុង ឬអ្នកគាំទ្រអាចហៅបានថា ឡុង មានដើមកំណើតមកពីខេត្ត ក្រចេះ កើតថ្ងៃ ១០ ខែកញ្ញា ឆ្នាំ ១៩៩៦ អាយុ២១ឆ្នាំ កម្ពស់ ១៧២សង់ទីម៉ែត្រ ទម្ងន់ ៦៤គីឡូក្រាម។

ស្ថានភាពគ្រួសារ៖

ឡុង កើតនៅក្នុងគ្រួសារមធ្យមមួយនៅ ដែលមានបងប្អូន៤នាក់ ស្រី១ប្រុស៣ គេជាកូនពៅ។ ឪពុកម្ដាយរបស់គេជាអ្នករកស៊ី ប្រកបអាជីវកម្ម នៅខេត្តក្រចេះ។

ប្រវត្តិការសិក្សា៖

ថ្នាក់បឋមសិក្សាលោករៀននៅ សាលាបឋមសិក្សាអនុវត្តន៍។ ថ្នាក់អនុវិទ្យាល័យលោករៀននៅ អនុវិទ្យាល័យក្រចេះក្រុង។ ថ្នាក់វិទ្យាល័យរៀននៅ វិទ្យាល័យព្រះកុសុមៈ។ សព្វថ្ងៃលោកជានិស្សិតឆ្នាំទី៤នៃ សាកលវិទ្យាល័យជាតិគ្រប់គ្រង ផ្នែក គ្រប់គ្រង។

ប្រវត្តិការងារ៖

ក្រៅពីការងារសិល្បៈលោកមិនធ្លាប់សាកល្បងការងារអ្វីផ្សេងឡើយ។

បទពិសោធន៍ក្នុងសិល្បៈ និងស្នាដៃថ្មីបំផុត៖

តារាសម្ដែងវ័យក្មេងរូបនេះមានក្ដីស្រមៃតាំងពីតូចចង់ក្លាយជាតារាសម្ដែង និងចូលប្រឡងក្នុងកម្មវិធី Freshie Boy & Girl។ បំណងប្រាថ្នារបស់គេក៏បានសម្រេចនៅពេលគេឡើងមករៀនថ្នាក់សាកលវិទ្យាល័យ នៅទីក្រុងភ្នំពេញ ឡុង និយាយថាមិត្តភ័ក្ដិនិងក្រុមគ្រួសារបានជំរុញលើកទឹកចិត្តឲ្យចូលប្រឡងកម្មវិធី Freshie Boy & Girl ជំនាន់ទី១៣ ដោយគេទទួលបានចំណាត់ថ្នាក់លេខ៤។

ភាពយន្តដំបូងដែលគេបានចូលសម្ដែងនោះគឺ "វីរនារីក្នុងភ្លើងគំនុំ" និងស្ប៉តពាណិជ្ជកម្មមួយចំនួនទៀត។ ស្នាដៃថ្មីបំផុតរបស់គេគឺ ស្ប៉តពាណិជ្ជកម្មផ្សព្វផ្សាយម៉ូតូ ដែលសហការជាមួយតារាចម្រៀងនិងពិធីការិនី ៣រូបទៀត ដោយបានថតនៅប្រទេសថៃ ចំណែកឯភាពយន្តវិញគឺរឿង "ក្រោមមេឃតែ១ ឬ We Are One” របស់ Rooster Kool ដែលគេដើរតួជាជនជាតិ សិង្ហបុរី មករៀនពីវិស័យអេកូទេសចរណ៍នៅកម្ពុជា រឿងនេះនឹងចាក់បញ្ចាំងជូនទស្សនាក្នុងពេលឆាប់ៗខាងមុខនេះហើយ ទាំងលើកញ្ចក់ទូរទស្សន៍ និង តាម Online។

ប្រវត្តិតស៊ូក្នុងវិស័យសិល្បៈ៖

តារាប្រុសវ័យ២១ឆ្នាំរូបនេះប្រាប់ថា គេស្ទើរតែបោះបង់ក្ដីសុបិនម្ដងៗ ជាពិសេសពេលប្រកួត កម្មវិធី Freshie Boy & Girl ដោយសារពេលនោះគេនៅក្មេងនៅឡើយ ប៉ុន្តែត្រូវហ្វឹកហាត់ច្រើន ប៉ុន្តែដោយសារការជំរុញទឹកចិត្តធ្វើឲ្យគេតស៊ូមកដល់សព្វថ្ងៃ។