វៀតណាមទើបបង្ហាញស្មាតហ្វូនថ្មី សមត្ថភាពខ្លាំង តម្លៃខ្ទង់ ៤០០ ដុល្លារ

2017-08-09 05:05:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្សិលមិញនេះក្រុមហ៊ុន Bkav របស់វៀតណាមបានធ្វើឲ្យកក្រើកទីផ្សារក្នុងស្រុក ក្រោយពីបានប្រកាសចេញស្មាតហ្វូនស៊េរីថ្មីរបស់ខ្លួនដែលមានសមត្ថភាពខ្លាំង រូបរាងស្អាត ថែមមានតម្លៃធូរថ្លៃទៀត។

ស្មាតហ្វូនដែលក្រុមហ៊ុនបានបង្ហាញមានឈ្មោះថា Bphone 2017 ដែលរចនាខ្លួនពីសារធាតុលោហៈ និង មានប្រើប្រាស់សារធាតុកញ្ចក់នៅផ្នែកខាងក្រោយ មើលទៅរលោងស្អាត។ ស្មាតហ្វូននេះដើរដោយបន្ទះឈីប Qualcomm Snapdragon 625, RAM ទំហំ ៣ GB, អង្គផ្ទុកទិន្នន័យទំហំ ១៦ GB និង មានថ្មទំហំ ៣០០០ mAh អាចទ្រាំទ្រនឹងបច្ចេកវិទ្យាសាកថ្មបានលឿន Quick Charge 3.0។

កាមេរ៉ាខាងក្រោយមានកម្រិត ១៦ MP, មានមុខងាររក្សាលំនឹង, អាច Focus បានលឿន និង អាចថតវីដេអូកម្រិត 4K បានទៀតផង។ កាមេរ៉ាខាងមុខវិញមានកម្រិត ៨ MP ដែលមានបញ្ចូលមកស្រាប់នូវ Filter ស្អាតជាច្រើនប្រភេទ។ Bphone 2017 នឹងមានដាក់លក់លើទីផ្សារក្នុងស្រុកនាថ្ងៃទី ១៩ ខែសីហានេះក្នុងតម្លៃ ៩,៧៨៩ លានដុង (ប្រហែល ៤៣០ ដុល្លារ)។

ក្រុមហ៊ុនខាងលើក៏បានផ្ដល់ភាពភ្ញាក់ផ្អើលបង្ហាញពីម៉ូដែលមួយទៀតមានកម្លាំងម៉ាស៊ីនខ្លាំងប្រើឈីប Snapdragon 835, RAM ៤ GB និង មានកាមេរ៉ាភ្លោះ ដែលមានឈ្មោះថា Bphone 2017 Gold។ យ៉ាងណាក្ដីស្មាតហ្វូនកម្លាំងខ្លាំងនេះមិនបានបង្ហាញខ្លួនក្នុងកម្មវិធីឡើយ ហើយក្រុមហ៊ុនមិនមានគម្រោងលក់វាសម្រាប់ទីផ្សារក្នុងស្រុកនោះទេ ផ្ទុយទៅវិញផលិតសម្រាប់លក់លើទីផ្សារបរទេសជាពិសេស។

បញ្ជាក់ថាគ្រប់ផ្នែក និង ដំណើរការផលិតទាំងអស់សុទ្ធតែធ្វើឡើងដោយក្រុមហ៊ុន Bkav ផ្ទាល់ រួមជាមួយនឹងដៃគូផ្គត់ផ្គង់ក្នុងប្រទេសវៀតណាម៕

រូបភាព និង លក្ខណៈសម្បត្តិផ្សេងទៀត ៖

អេក្រង់ ៖ ទំហំ ៥,៥ អ៊ីញ កម្រិត Full HD (1920 x 1080 ភីកសែល) និង ដង់ស៊ីតេរូបភាព ៤៤១ ភីកសែលក្នុងមួយអ៊ីញ
កាមេរ៉ា ៖ ក្រោយទំហំ ១៦ MP មានមុខងារ OIS អាចថតវីដេអូ 4K និង ខាងមុខទំហំ ៨ MP មានមុខងារ Auto-Focus
ម៉ាស៊ីន ៖ ឈីប Snapdragon 625, RAM ទំហំ ៣ GB, អង្គផ្ទុកទិន្នន័យ ៣២ GB
ប្រព័ន្ធប្រតិបត្តិការ ៖ Android 7.1
ថ្ម ៖ ទំហំ ៣០០០ mAh អាចសាកថ្មបានលឿន Quick Charge 3.0
ចំណុចពិសេស ៖ មុខងារស្កេនខ្ចៅដៃលើប៊ូតុង Home និង អាចដាក់ស៊ីម 4G បានពីរ