Floyd ទទួលស្គាល់ McGregor មានប្រៀបជាង ព្រោះខ្លួនចាស់ហើយ

2017-08-10 07:46:42
ចំនួនមតិ 0 | ចំនួនចែករំលែក 0

ចន្លោះមិនឃើញ

Floyd Mayweather បានលើកឡើងថា គេមិនមែនអ្នកប្រដាល់ដូច២ឆ្នាំមុនទេ ហើយជឿជាក់ថា Conor McGregor មានប្រៀបជាងនៅថ្ងៃប្រកួតខាងមុខ។

Mayweather កីឡាករមិនដែលចាញ់ ត្រៀមស្វាគមន៍កីឡាករអៀរឡង់ McGregor នៅ T-Mobile Arena ក្នុងទីក្រុង Las Vegas សហរដ្ឋអាមេរិកនៅថ្ងៃទី ២៦ ខែ សីហាខាងមុខ ហើយក៏អាចជាការប្រកួតទទួលបានប្រាក់ច្រើនជាងគេក្នុងប្រវត្តិសាស្ត្រប្រដាល់ផងដែរ។ មុនការប្រកួតមកដល់ កីឡាករទាំងពីរបានធ្វើការផ្សព្វផ្សាយការប្រកួតនៅទីក្រុងធំៗចំនួន៤ និងបានបោះពាក្យសម្ដីដាក់គ្នាជាច្រើន។

យ៉ាងណាក្ដី Floyd ជាម្ចាស់ខ្សែក្រវាត់៥ស្ថាប័នបានទទួលស្គាល់ថា McGregor មានវ័យនិងកម្ពស់លើគេ។ អ្នកប្រដាល់អាមេរិកបានប្រាប់ ESPN ថា៖ "គេក្មេងជាងខ្ញុំច្រើន។ ពេលដែលខ្ញុំមើលខ្លួនឯងនិងគេនៅលើកាសែត គេខ្ពស់និងមានចម្ងាយដៃវែងជាងខ្ញុំ។ គេមានប្រៀបលើវ័យច្រើន។ ខ្ញុំខានវាយ២ឆ្នាំ ហើយពេលនេះខ្ញុំអាយុ៤០ឆ្នាំទៀត ប្រសិនមើលតាមកាសែត McGregor នាំមុខខ្ញុំច្រើន។ ខ្ញុំចាស់ជាង។ ខ្ញុំមិនដូច២ឆ្នាំមុនទេ"។

ក្នុងជំនួប១៦ថ្ងៃខាងមុខ McGrego ទទួលបានតម្លៃខ្លួនមិនតិចជាង៧៥លានដុល្លារ ឯ Floyd បាន១០០លានដុល្លារ៕