Juventus លេងមួយក្បាច់នេះ ក្លឹបអ្នកមានបុណ្យ Barca ដាច់ផ្ងារតែម្ដង!
- 2017-08-10 11:43:46
- ចំនួនមតិ 0 | ចំនួនចែករំលែក 0
Juventus លេងមួយក្បាច់នេះ ក្លឹបអ្នកមានបុណ្យ Barca ដាច់ផ្ងារតែម្ដង!
ចន្លោះមិនឃើញ
ខ្សែបម្រើប្រយុទ្ធសញ្ជាតិអាហ្សង់ទីន Paulo Dybala ពាក់អាវលេខ១០ នារដូវកាលថ្មីនេះ បើតាមការផ្សព្វផ្សាយជាផ្លូវការតាមបណ្ដាញសង្គម Twitter របស់ក្លឹបកាលពីព្រឹកមិញជាសញ្ញាមួយបញ្ជាក់ថា កីឡាករវ័យ ២៣ឆ្នាំរូបនេះនឹងមិនចាកចេញពីក្លឹបយក្សអ៊ីតាលីទៅក្លឹបអ្នកមានបុណ្យ Barcelona ដូចដែលពាក្យចចាមអារាមនោះទេ។
Dybala នឹងប្ដូរលេខអាវពីលេខ២១ ទៅលេខ ១០វិញ នារដូវកាលថ្មីនេះ ដែលលេខ ១០ គឺជាលេខនិមិត្តរូបយ៉ាងសំខាន់របស់ក្លឹប ព្រោះវាត្រូវបានពាក់ដោយវីរបុរសក្លឹបល្បីៗ និងកីឡាករល្អ និងឆ្នើមៗជាច្រើនដូចជាកីឡាករ Alessandro Del Piero, Michel Platini, Carlos Tevez និង Paul Pogba ជាដើម។ លេខអាវនេះត្រូវបានទុកឲ្យទំនេរកាលពីរដូវកាលមុន បន្ទាប់ពីខ្សែបម្រើសញ្ជាតិបារាំង Paul Pogba បានចាកចេញពីក្លឹបសេះបង្កង់ ទៅក្លឹបបិសាចក្រហម Manchester United ក្នុងតម្លៃថ្លៃបំផុតនាពេលនោះ។ ការដូរលេខប្រៀបបីដូចជាការបញ្ជាក់ពីភាពសំខាន់នៃកីឡាករវ័យក្មេងរូបនេះចំពោះក្លឹប Juventus ហើយក្លឹបនេះក៏ចង់បញ្ចប់ពីពាក្យចចាមអារាមដែលថាកីឡាករនឹងទៅជំនួស Neymar ដែលទើបនឹងចាកចេញនៅ Barca ផងដែរ។
តាំងពីក្លាយជាកីឡាកររបស់ក្លឹបជើងឯកអ៊ីតាលីតាំងពីឆ្នាំ ២០១៥មក Dybala បានអភិវឌ្ឍន៍ខ្លួនយ៉ាងខ្លាំង រហូតក្លាយជាកីឡាករដ៏ឆ្នើម និងសំខាន់បំផុតសម្រាប់ក្លឹបយក្សអ៊ីតាលីមួយនេះ។ ចំណែកឯក្លឹបអ្នកមានបុណ្យ Barcelona វិញកំពុងមមាញឹកតាមរកអ្នកជំនួសកន្លែងរបស់ Neymar បន្ទាប់ពីកីឡាករសញ្ជាតិប្រេស៊ីលរូបនេះបានចាកចេញទៅក្លឹបមហាសេដ្ឋី PSGក្នុងការផ្ទេរដ៏ធំសម្បើមបំផុតក្នុងកំណត់ត្រាបាល់ទាត់ជាមួយនឹងទំហំទឹកប្រាក់ ២២២លាន អឺរ៉ូ កាលពីសប្ដាហ៍មុន៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
