ប្រទះឃើញបុរសម្នាក់កាន់ iPhone ម្ដងពីរគ្រឿង ពេលកំពុងបើកឡាន

  • 2017-08-13 01:59:48
  • ចំនួនមតិ

ចន្លោះមិនឃើញ

ការប្រើប្រាស់ស្មាតហ្វូនមួយជាមួយនឹងការបើកបរដោយប្រើដៃម្ខាងមិនជារឿង​គ្រោះថ្នាក់ពេកនោះទេសម្រាប់អ្នក​បើក តែដោយឡែកចំពោះបុរសម្នាក់នៅក្នុងរូបនេះ មិនមែនកាន់ស្មាតហ្វូនតែមួយគ្រឿងនោះទេ ពោលគឺប្រើដៃទាំងទ្វេកាន់ iPhone ដល់ទៅពីរគ្រឿងឯណោះ ខណៈពេលកំពុងតែបើកបរក្នុង​រយៈ​ចំងាយ​ប្រមាណជា ១០០ ម៉ែត្រ។

សកម្មភាព​បុរសម្នាក់ប្រើទូរសព្ទម្ដងពីរ​ដែលគេលួចថតបាន

កាលពីចុងសប្តាហ៍កន្លងទៅ គណនី Twitter របស់ភ្នាក់ងារប៉ូលីសចក្រភពអង់គ្លេសមួយឈ្មោះ Surrey Police បានថតរូបមួយសន្លឹកពីសកម្មភាពបុរសម្នាក់នេះកំពុងកាន់ iPhone ដោយដៃទាំងពីរដោយមិនបានកាន់ចង្កូតរថយន្ត រួចបង្ហោះហើយសរសេរ captions យ៉ាងចាស់ដៃថា៖ "អ្នកបើកបរម្នាក់នេះមានការសំខាន់ខ្លាំងណាស់ហើយបានជាកាន់ iPhone ម្ដងពីរពេលកំពុងបើកបរ"។

ត្បិតថា ថតបានសកម្មភាពបុរសដែលជាអ្នកបើកបរមិនគោរពច្បាប់ខាងលើនេះមែន តែអាជ្ញាធរមិនបានចុះទៅផាកពិន័យដកប័ណ្ណបើកបរបុរសនោះភ្លាមៗទេ ផ្ទុយទៅវិញ អាជ្ញាធរក្នុងតំបន់នោះបានចេញធ្វើប្រតិបត្តិការតាមប្រមាញ់និងស្វែងរកឡានបុរសនោះទាល់តែឃើញ ហើយអំឡុងពេលស្ទាក់ចាប់ បុរសនោះព្យាយាមលាក់បាំងទូរសព្ទរបស់ខ្លួន តែសមត្ថភាពបានឆែកឆេររកឃើញ បានដាក់ពិន័យរួចថតបង្ហោះជាសាធារណៈលើ Twitter ។

លោក Chris Moon ដែលជាមេបញ្ជាការក្នុងតំបន់នោះបាននិយាយថា "បច្ចុប្បន្នស្មាតហ្វូនជាផ្នែកសំខាន់ណាស់ក្នុងជីវិតប្រចាំថ្ងៃរបស់ពួកគេ ហើយការប្រើប្រាស់ស្មាតហ្វូនពេលកំពុងបើកបរ ក៏ជាផ្នែកដ៏ធំមួយនៃគ្រោះថ្នាក់ចរាចរណ៍លើដងវិថីរបស់ពួកគេដែរ"។

ជាក់ស្ដែងដូចករណីខាងលើនេះ លោកបន្តថាមិនមែនជាករណីទីមួយទេ ដែលប្រើទូរសព្ទម្ដងពីរពេលកំពុងបើកបរ វាមានច្រើនករណីរួចមកហើយ ហើយការចាប់ខ្លួនបុរសនោះដើម្បីឲ្យអ្នកដទៃទៀតកុំយកគម្រូតាម។

ដូចដែលប្រិយមិត្តបានអានរឿងហេតុខាងលើហើយ​ថា នៅក្នុងប្រទេសកម្ពុជាករណីគ្រោះថ្នាក់ដែលបណ្ដាលមកពីការប្រើទូរសព្ទពេលកំពុងបើកបរបានកើតឡើងច្រើនករណីមែនទែន ដូចនេះសង្ឃឹមថាអ្នកទាំងអស់គ្នានឹងសម្រាកប្រើពេលកំពុងបើកបរ ជៀសវាងមានគ្រោះថ្នាក់ដល់ខ្លួនឯងនិងអ្នកដទៃ៕


ប្រភព៖ idropnews ប្រែ​សម្រួល៖ រក្សា