El Clasico យប់នេះ តើ Barcelona ឬ Real Madrid ជាអ្នកទឹកភ្នែក?
- 2017-08-13 03:54:31
- ចំនួនមតិ 0 | ចំនួនចែករំលែក 0
El Clasico យប់នេះ តើ Barcelona ឬ Real Madrid ជាអ្នកទឹកភ្នែក?
ចន្លោះមិនឃើញ
បើកឆាករដូវកាលថ្មីនៅអេស្ប៉ាញ ក្រុម Barcelona និង Real Madrid ត្រូវប៉ះគ្នាក្នុងពានរង្វាន់ Spanish Super Cup ជើងទី១នៅម៉ោង៣ទាបភ្លឺព្រឹកស្អែកនេះហើយ។
ម្ចាស់ផ្ទះ Barcelona នឹងត្រូវលេងប្រកួតនេះ ដោយគ្មានវត្តមានកីឡាករថ្មីជំនួសតំណែងរបស់ Neymar នោះទេ ត្បិតអីពួកគេមិនទាន់រកបាននៅឡើយ។ ក្រុមអ្នកមានបុណ្យមួយនេះ នឹងលេងក្រោមបច្ចេកទេសថ្មីរបស់លោក Ernesto Valverde ហើយកីឡាករសំខាន់ៗដូចជា Lionel Messi និង Suarez ជាដើមនោះ សុទ្ធតែអាចចូលលេងបានទាំងអស់។ ខណៈដែលតំណែងរបស់ Neymar ត្រូវបានគេមើលឃើញថាអាចនឹង Paco Alcacer ឬ Gerard Deulofeu ជាអ្នកជំនួសសិន។
លោក Ernesto Valverde និយាយចំពោះទម្រង់លេងរបស់ Real Madrid ថា៖ “នរណាក៏ដឹងថា Madrid ជាក្រុមល្អ ពួកគេមានកីឡាករល្អច្រើន។ ពួកគេទើបតែឈ្នះពាន European Super Cup ដែលលេងបានយ៉ាងល្អ ប៉ុន្តែយើងត្រូវតែមានទំនុកចិត្តលើខ្លួនឯង ដើម្បីឈ្នះពួកគេ។ ខ្ញុំមិនផ្ដោតលើប្រកួតមិត្តភាពឡើយ ព្រោះវាខុសគ្នាជាមួយការប្រកួតពេលនេះ”។
ចំពោះក្រុម Real Madrid វិញ ក្នុងប្រកួតនេះដែរ ពួកគេនឹងអវត្តមានខ្សែបម្រើសំខាន់ម្នាក់ Luka Modric ដោយសារតែរូបគេជាប់បម្រាមកាតក្រហម។ ដូច្នេះក្រុមរបស់លោក Zidane អាចនឹង Mateo Kovacic មកជំនួស។ ស្របពេល Cristiano Ronaldo វិញ ចូលហ្វឹកហាត់ជាមួយក្រុមធម្មតា ប៉ុន្តែមិនច្បាស់ថាអាចចូលលេងបានឬអត់នោះទេ ព្រោះរូបគេសម្រាកលំហែកាយយូរពេក ត្រូវការពេលហ្វឹកហាត់ប្រមូលកម្លាំងមកវិញ។
លោក Zidane បាននិយាយចំពោះការប្រកួតដែរថា៖ “ពួកគេបានផ្លាស់ប្ដូរច្រើន ប៉ុន្តែ Barcleona គឺនៅតែ Barcelona ដដែល។ ពួកគេគ្មានចំណុចខ្សោយទេ យើងដឹងពីរបៀបដែលពួកគេលេង។ យើងលេងប្រកួតនេះ២ប្រកួត នៅដីគេ១ប្រកួតនិងដីយើង១ប្រកួត។ អ្វីដែលខ្ញុំចង់បាន គឺខ្ញុំចង់លេងពានរង្វាន់នេះតែ១ជើងប៉ុណ្ណោះ យកឈ្នះចាញ់តែម្ដង”។
ចំពោះជម្រើស១១នាក់ដំបូងវិញអាចជា៖
FC Barcelona ៖ Ter Stegen, Semedo, Pique, Umtiti, Alba; Busquets, Rakitic, Sergi Roberto; Deulofeu, Suarez, Messi ។
Real Madrid ៖ Navas; Carvajal, Varane, Ramos, Theo; Casemiro, Kroos, Kovacic; Isco, Benzema, Bale ៕