បើ​មាន​លុយ​ត្រឹម ៣០០ ដុល្លារ​ចុះ​ក្រោមអី អាច​ទិញ Smartphone ប្រើ​បាន​ដែរ តែ​រាង​តឹង​ចិត្ត​បន្តិច​រឿង​អេក្រង់ កាមេរ៉ា ក្រាហ្វិក ល្បឿន បច្ចេកវិទ្យា និយាយ​ទៅ​អត់​គ្រប់​គ្រឿង ដូច​រថយន្ត​អត់ Full Options អ៊ីចឹង។

បើ​ចង់​បាន​ល្អ​ប្រើ​កប់​ស៊េរី​ដូច​គេ ខើច​លុយ​ពេក ព្រោះ​អី​ទាល់​តែ ៥០០ ដុល្លារ​អី​ឡើង​ទៅ បាន​ប្រើ​រាង​ស្រួល​ចិត្ត ជា​ពិសេស​ថត​រូប​ស្អាត​នឹង​គេ។ ចុះ​ធ្វើ​ម៉េច បើ​មាន​ត្រឹម​ល្បាក់ ៣០០ ដុល្លារ?

មាន​អី​ពិបាក Sabay នឹង​ណែនាំ Smartphone ស៊េរី ២០១៧ មួយ​ចំនួន​តម្លៃ​ខ្ទង់ ៣០០ ដុល្លារ ហើយ​ល្អ​ប្រើ៖

• Samsung Galaxy J7 Pro 2017 តម្លៃ ៣១៩ ដុល្លារ
• Huawei GR5 Premium តម្លៃ ៣២៩ ដុល្លារ
• Oppo F3 តម្លៃ ៣១៩ ដុល្លារ

១. រូបរាង

និយាយ​ពី​រូបរាង​ឌី​ហ្សា​ញ Smartphone ទាំង ៣ ម៉ូ​ដែល​នេះ កាលីប​ប្រហាក់​ប្រហែល​គ្នា ដោយ​តួ​ទូរសព្ទ​ទាំង​មូល​ស្រោប​ដោយ​លោហៈ​រលោង។ Galaxy J7 Pro 2017 និង Oppo F3 មាន​ប៊ូតុង​ស្កែន​ខ្ចៅ​ដៃ​នៅ​ខាង​មុខ ខណៈ Huawei GR5 Premium បំពាក់​ប៊ូតុង​ស្កែន​ខ្ចៅដៃ​នៅ​ខាងក្រោយ​ទូរ​សព្ទ​វិញ ស្រដៀង Galaxy S8 ដែរ។

សន្និដ្ឋាន៖ ប្រហាក់​ប្រហែល​គ្នា

២. អេក្រង់ (Display)​

ទាំង ៣ គ្រឿង មាន​អេក្រង់​ទំហំ ៥,៥ អ៊ីញ កម្រិត FHD ដូចគ្នា តែ Galaxy J7 Pro 2017 បំពាក់​អេក្រង់​ប្រភេទ Super AMOLED ខណៈ​ពីរ​ម៉ូដែល​ទៀត ប្រើ IPS LCD វិញ។ ប្រភេទ​អេក្រង់​ទាំង​ពីរ​នេះ ខុស​គ្នា​ត្រង់ Super AMOLED ផ្ដល់​គុណភាព​ពណ៌​ដិត ខណៈ IPS LCD ផ្ដល់​គុណភាព​ពណ៌​បែប​ធម្មជាតិ។ បច្ចេកវិទ្យា Super AMOLED ធ្វើ​ឲ្យ​ថ្ម​មិន​សូវ​ស៊ី ឯ IPS LCD ស៊ី​ថ្ម​ជាង។​

សន្និដ្ឋាន៖ ម្យ៉ាង​ម្នាក់ អា​ស្រ័យ​លើ​អ្នក​ចូលចិត្ត តែ Super AMOLED ផ្ដល់​អាយុ​កាល​ថ្ម​យូរ​ជាង។

៣. គ្រឿងក្នុង (Hardware)

• Samsung Galaxy J7 Pro 2017៖ មាន RAM 3 GB, ទំហំ​ម៉ាស៊ីន 32 GB បំពាក់ដោយ CPU ឈ្មោះ Exynos 7870 ប្រភេទ Octa-core ល្បឿន 1.6 GHz​
• Huawei GR5 Premium៖ មាន RAM 4 GB, ទំហំ​ម៉ាស៊ីន 64 GB បំពាក់ដោយ CPU ឈ្មោះ Kirin 655 ប្រភេទ Octa-core ល្បឿន 1.7 GHz និង 2.1 GHz​
• Oppo F3៖ មាន RAM 4 GB, ទំហំ​ម៉ាស៊ីន 64 GB បំពាក់ដោយ CPU ឈ្មោះ Mediatek MT6750T ប្រភេទ Octa-core ល្បឿន 1.5 GHz​

សន្និដ្ឋាន៖ CPU Kirin និង Mediatek តែង​បំពាក់​លើ​ទូរសព្ទ​តម្លៃ​ធូរ (Budget Phone) តែ Samsung ហ៊ាន​បំពាក់ CPU Exynos សមត្ថភាព​ប្រហាក់​ប្រហែល​នឹង Snapdragon ដែល​កាលីប​លើស និង​ខ្លាំង​ជាង Kirin ឬ Mediatek។

៤. កាមេរ៉ា

Galaxy J7 Pro 2017 ថ្លើម​ធំ​មែន​ទែន ហ៊ាន​បំពាក់​ក្រោយ​ទំហំ 13 MP កម្រិត​ចាប់​រូបភាព f/1.7 aperture ដែល​មាន​តែ​លើ Galaxy S7/S8 ប៉ុណ្ណោះ។ ឯ​កាមេរ៉ា​មុខ​វិញ ទំហំ 13 MP ដូចគ្នា wide angle ដល់ ១១០ ដឺក្រេ ចាប់​ផ្ទៃ​រូបភាព​ទូលាយ​ឃើញ​គ្នា​ច្រើន ជាមួយ​នឹង​កម្រិត​ចាប់​រូបភាព f/1.9 aperture។ មាន​ន័យ​ថា កាមេរ៉ា​ទាំង​មុខ​ក្រោយ អាច​ថត​នៅ​កន្លែង​ខ្សោយ​ពន្លឺ​បាន ស្អាត។

Oppo F3 មាន​កាមេរ៉ា​ក្រោយ 13 MP តែ​កម្រិត​ចាប់​រូបភាព f/2.2 មិន​អាច​ថត​ស្អាត ពេល​ខ្សោយ​ពន្លឺ (ងងឹត)។ ឡូយ​ត្រង់ កាមេរ៉ា​មុខ​ពីរ​គ្រាប់ dual selfie មាន 16 MP (f/2.0) និង 8 MP (f2.4) ជាមួយ wide angle ១២០ ដឺក្រេ​ឯណោះ។ គួរ​ឲ្យ​ស្ដាយ មិន​អាច​ចាប់​រូបភាព​ស្អាត ពេល​ខ្សោយ​ពន្លឺ។

Huawei GR5 Premium ឡូយ​ត្រង់​បំពាក់​កាមេរ៉ា​ភ្លោះ​ខាង​ក្រោយ​ទំហំ 12MP និង 2MP តែ​ស្ដាយ​មិន​មែន Leica អ៊ីចឹង។ ឯ​កាមេរ៉ា​មុខ 8 MP។ កាមេរ៉ា​មុខ​ក្រោយ​ទាំង​នេះ អាច​ថត​បានល្អ ពេល​មាន​ពន្លឺ​គ្រប់​គ្រាន់​ប៉ុណ្ណោះ។

សន្និដ្ឋាន​៖ Galaxy J7 Pro 2017 ស៊ីដាច់​

៥. ថាមពល​ថ្ម​

• Samsung Galaxy J7 Pro 2017 មាន​កម្រិត​ថាមពល​ថ្ម 3600 mAh​
• Huawei GR5 Premium មាន​កម្រិត​ថាមពល​ថ្ម 3340 mAh​
• Oppo F3 មាន​កម្រិត​ថាមពល​ថ្ម 3200 mAh​

សន្និដ្ឋាន​៖ ឃើញច្បាស់​នឹង​ភ្នែក គឺ Galaxy J7 Pro 2017 ល្អ​ជាង​។​

គួរ​រើស​មួយណា (Editor's Choice)​

ពិចារណា​លើ​តម្លៃ Galaxy J7 Pro 2017 និង Oppo F3 តម្លៃ​ដូចគ្នា តែ Huawei GR5 Premium ថ្លៃ​ជាង ១០ ដុល្លារ​។ ទូរ​សព្ទ​ទាំង ៣ មាន​សមត្ថភាព​ប្រហាក់​ប្រហែល​គ្នា​លើ​រូបរាង​ឌី​ហ្សា​ញ និង​ប្រភេទ​អេក្រង់។ តែ​គ្រឿង​ក្នុង កាមេរ៉ា និង​ថាមពល​ថ្ម ចាញ់ Galaxy J7 Pro 2017។ ដូច្នេះ គួរ​ពិចារណា​ទិញ Galaxy J7 Pro 2017 បើ​មាន​លុយ​ត្រឹម​ជាង ៣០០ ដុល្លារ​ស្ដើង តែ​មាន​ត្រឹម ២៨០ ដុល្លារ យក Galaxy J5 Pro 2017 (២៧៩ ដុល្លារ) តែ​ម្ដង​ទៅ ដែល​ខុស​ពី J7 Pro 2017 ត្រង់​អេក្រង់ ៥,២ អ៊ីញ, ថាមពល​ថ្ម 3000 mAh៕

អត្ថបទ៖ លី សុផាត