មីស៊ីលកូរ៉េខាងជើង កំពុងរំកិលទៅទីតាំងត្រៀមបាញ់
- 2017-08-15 02:32:32
- ចំនួនមតិ 0 | ចំនួនចែករំលែក 0
មីស៊ីលកូរ៉េខាងជើង កំពុងរំកិលទៅទីតាំងត្រៀមបាញ់
ចន្លោះមិនឃើញ
ផ្កាយរណបចារកម្មរបស់សហរដ្ឋអាមេរិក បានសង្កេតឃើញថាមីស៊ីលកូរ៉េខាងជើងកំពុងរំកិលទៅកាន់ទីតាំងសម្រាប់ត្រៀមបាញ់កោះ Guam នាពេលណាមួយ ខណៈដែលកងកម្លាំងសហរដ្ឋអាមេរិកកំពុងស្ថិតក្នុងការប្រុងប្រយ័ត្នខ្ពស់បំផុត។
ព័ត៌មានចុងក្រោយនេះ ចាប់ផ្ដើមបង្ហោះលើប្រព័ន្ធផ្សព្វផ្សាយនានា បន្ទាប់ពីរដ្ឋមន្ត្រីក្រសួងការពារជាតិអាមេរិកJames Mattis បានលើកឡើងថា ការប្រឈមមុខគ្នាកាន់តែខ្លាំង អាចឈានដល់ការផ្ទុះសង្គ្រាម។ ភាពតានតឹងបានកើនកម្ដៅតាំងពីថ្ងៃទី៩ ខែសីហា បន្ទាប់ពីប្រធានាធិបតីទី៤៥ របស់សហរដ្ឋអាមេរិក ដូណាល់ ត្រាំ គំរាមវាយប្រហារក្រុងព្យុងយ៉ាង ឯកូរ៉េខាងជើងក្រោមរបប គីម ជុងអ៊ុន គំរាមបាញ់មីស៊ីលទៅកាន់កោះ Guam។
មុននេះបន្តិច សារព័ត៌មានរដ្ឋកូរ៉េ បានផ្សាយថា ប្រធានាធិបតីវ័យក្មេង គីម ជុងអ៊ុន កំពុងរៀបចំយុទ្ធសាស្ត្រយ៉ាងប្រុងប្រយ័ត្នបំផុត ដើម្បីត្រៀមកម្ទេច Guam ឲ្យឆាបឆួលក្នុងភ្លើង។ មេដឹកនាំវ័យ ៣៣ឆ្នាំ បាននិយាយថា លោកនៅចាំមើលអាកប្បកិរិយារដ្ឋាភិបាលក្រុងវ៉ាស៊ីងតោនបន្តិចទៀត តែការសម្រេចចិត្តនឹងធ្វើឡើងភ្លាមៗ បើអាមេរិកនៅតែបង្កសកម្មភាពដ៏គ្រោះថ្នាក់របស់ខ្លួន។
មីស៊ីលដែលកូរ៉េខាងជើងកំពុងប្រកាសក្ដែងៗសម្ញែងពិភពលោក អាចជា Hwasong HS-12 ប៉ុន្តែវាគ្មានសមត្ថភាពហោះដល់ដែនដីគោករបស់សហរដ្ឋអាមេរិកឡើយ។ យ៉ាងណាក្ដី មូលដ្ឋានទ័ពនៅកោះ Guam និងជប៉ុន គឺជាទីតាំងកំពុងរងការគំរាមកំហែងខ្លាំងបំផុត ហើយជាគោលដៅដែលកូរ៉េខាងជើងគំរាមវាយប្រហារពាក់កណ្ដាលខែនេះ៕