អ្នកវិទ្យាសាស្ត្ររកឃើញភ្នំភ្លើងជិត១០០ នៅក្រោមទឹកកកអង់តាកទិចគួរឲ្យភ្ញាក់ផ្អើល

2017-08-15 04:32:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ភ្នំភ្លើងជិត ១០០ ត្រូវបានគេរកឃើញនៅក្រោមទឹកកកក្នុងទ្វីបអង់តាកទិច ដែលមានសមត្ថភាពអាចបំផ្លាញជីវិតមនុស្សជាតិនៅលើផែនដីបាន បើវាផ្ទុះព្រមគ្នា។ នេះបើតាមក្រុមអ្នកស្រាវជ្រាវព្រមាន។

គម្រោងសិក្សាមួយធ្វើឡើងដោយអ្នកស្រាវជ្រាវនៅអង់គ្លេសបានបង្ហើបឲ្យដឹងថា ពួកគេបានរកឃើញភ្នំភ្លើងចំនួន ៩១នៅក្រោមផ្ទៃទឹកកកនៅទ្វីបអង់តាកទិចផ្នែកខាងលិច។

ភ្នំភ្លើងចំនួន ៩១ ខាងលើ មានកម្ពស់ចាប់ពី ១០០ម៉ែត្រ ដល់ ៣ ៨៥០ម៉ែត្រ ស្ថិតនៅតំបន់ដ៏ធំសម្បើមត្រូវគេស្គាល់ឈ្មោះថា West Antarctic Rift System។ ប្រសិនបើភ្នំភ្លើងនោះជាភ្នំភ្លើងសកម្ម វាអាចផ្ទុះពេលណាក៏បាន និងបណ្ដាលឲ្យផ្ទាំងទឹកកកដ៏ធំមហិមាបាក់ និងរលាយចូលសមុទ្រ ធ្វើឲ្យកម្រិតទឹកឡើងកម្ពស់បង្កជាគ្រោះថ្នាក់ដល់អ្នករស់នៅមាត់សមុទ្រនានានៅជុំវិញពិភពលោក។ ក្រុមអ្នកវិទ្យាសាស្ត្រកំពុងបង្កើនល្បឿនសិក្សាថា វាជាភ្នំភ្លើងសកម្មកម្រិតណា។

បណ្ឌិត Robert Bingham នៃសាកលវិទ្យាល័យ Edinburgh's School of GeoSciences បានប្រាប់ថា “ប្រសិនបើភ្នំភ្លើងមួយក្នុងចំណោមភ្នំភ្លើងទាំងអស់ផ្ទុះ វាអាចធ្វើឲ្យផ្ទាំងទឹកកកអង់តាកទិចរង្គើមិនអាចទប់លំនឹងបានឡើយ"។

អ្នកវិទ្យាសាស្ត្ររកឃើញភ្នំភ្លើងដោយប្រើប្រាស់ទម្រង់វាយតម្លៃឌីជីថលដែលគេស្គាល់ថា Bedmap 2DEM និងប្រមូលព័ត៌មានពាក់ព័ន្ធនានា អមជាមួយការសិក្សាដោយប្រើប្រព័ន្ធរ៉ាដាបង្កប់ក្រោមដី និងទឹកកកថែមទៀត៕