ស្រីស្អាត តួឯករឿងដំបូងរបស់ផលិតកម្ម អ្នកនាង ចន ច័ន្ទលក្ខិណា ជានរណា?

2017-08-16 06:32:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្ត រឿង"បន្តោងឆ្នាំងដី" ដែលជាវណ្ណកម្មដំបូងរបស់ផលិតកម្ម"សិល្បៈខ្មែរភាពយន្ត" ដែលមានអ្នកនាងចន ច័ន្ទលក្ខិណា ជាចាងហ្វាងបានប្រកាសចេញថតនៅថ្ងៃ១៨ ខែ សីហា ឆ្នាំ ២០១៧នេះហើយ។ តួឯកស្រីក្នុងរឿងនេះ គឺកញ្ញា ហេង ចន្ថា តើតួឯកស្រីរូបនេះ មានប្រភពចេញពីណាមក?

តាមឲ្យរៀបរាប់ពីសាមីខ្លួន កញ្ញា ហេង ចន្ថា គឺជាកញ្ញាឯក Miss Grand Cambodia ឆ្នាំ២០១៦ ស្រីស្អាតរូបនេះមានស្រុកកំណើត នៅខេត្តកំពង់ចាម អាយុ២២ឆ្នាំ គឺជាកូនពៅក្នុងចំណោមបងប្អូន២នាក់ស្រីទាំង២ ឪពុកម្ដាយគឺជាម្ចាស់ចម្ការកៅស៊ូ។

កញ្ញា ហេង ចន្ថា បានប្រាប់ថា ការសម្រេចឲ្យនាងសម្ដែងតួឯកនេះ អ្នកនាងចន ច័ន្ទលក្ខិណា ជាអ្នកជ្រើសរើស ប៉ុន្តែមិនបានឆ្លងកាត់ការធ្វើតេស្តឡើយ ព្រោះថ្នាក់ដឹកនាំក្នុងផលិតកម្មបានស្គាល់សមត្ថភាពនាងច្បាស់រួចមកហើយ។ "បងមុំគាត់អ្នករើស មិនមែនបងពែកមីទេ គាត់ដឹងសមត្ថភាពខ្ញុំហើយព្រោះខ្ញុំធ្លាប់ថតច្រើនរឿងហើយដែរ" ហេង ចន្ថា លើកឡើង។

ស្រីស្អាតខាងលើ មិនទាន់ដឹងសាច់រឿងទាំងស្រុងឡើយ ប៉ុន្តែនាងដឹងថា នាងធ្វើតួឯកជាមួយ នាយពែកមី ជាមនុស្សស្លូតបូត សុភាពរាបសារ។ រឿង"បន្តោងឆ្នាំងដី" ជាប្រទេសរឿងបែបកំប្លែងភ័យខ្លាច មានតួឯករហូតដល់ទៅ២គូ គឺគូនាយពែកមី ជាមួយ កញ្ញា ហេង ចន្ថា និង គូលោកប៉ែន ចំរ៉ុងជាមួយតួស្រីម្នាក់ទៀត។

តារាស្រីវ័យ២២ឆ្នាំរូបនេះបានប្រាប់ថា ភាពយន្តខាងលើគឺជារឿងទី៤ហើយ បន្ទាបពីនាងបានប្រលូកលើវិថីសិល្បជាង១ឆ្នាំមកនេះ។ Miss Grand Cambodia ឆ្នាំ២០១៦រៀបរាប់"រឿងទី១ ខ្ញុំភ្លេចចំណងជើង រឿងទី២ ឱកូនសំលាញ់ ធ្វើតួឯក រឿងទី៣ សន្យាជាតិមុន ធ្វើតួឯក និង រឿងទី៤ គឺរឿង"បន្តោងឆ្នាំងដី ហើយចំពោះស្ប៉តថតបាន៥ហើយ "។

ក្រៅពីអាជីពសិល្ប តារាស្រីវ័យក្មេងរូបនេះ ក៏ជាថៅកែហាងលក់សម្លៀកបំពាក់មួយផងដែរ ចំពោះការសិក្សាវិញនាងរៀនបានត្រឹមជំនាញគណនេយ្យ ឆ្នាំទី១ ។ នាងថា កន្លងមកផលិតមួយចំនួនបានទាក់ទងឲ្យសម្ដែងភាពយន្តបន្តបន្ទាប់ ប៉ុន្តែដោយជាប់រវល់មើលមុខជំនួញនាងបានបដិសេធមួយរយៈ ទើបតែចាប់ផ្ដើមទទួលការថតវិញថ្មីៗនេះ។ គ្រងតំណែងតួឯក ដែលដឹកនាំសម្ដែងដោយ នាយពែកមី កញ្ញា ហេង ចន្ថា បានរំពឹងយ៉ាងមុតមាំថា នឹងជួយបង្កើនប្រជាប្រិយភាពធ្វើឲ្យទស្សនិកជនកាន់តែចាប់អារម្មណ៍នាងជាក់ជាមុនខាន៕

អត្ថបទៈ ស៊ុនហួត