អាវុធខ្លាំងរបស់ Nokia ប្រើសម្រាប់ផ្ដួល iPhone 8 និង Note 8 បង្ហាញខ្លួនហើយ

2017-08-17 02:04:46
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីយប់មិញនេះក្រុមហ៊ុន HMD Global ដែលទទួលបានសិទ្ធផលិតទូរសព្ទម៉ាក Nokia បានបង្ហាញចេញស្មាតហ្វូនស៊េរីខ្ពស់របស់ខ្លួនគឺ Nokia 8 ដែលប្រើសម្រាប់ប្រជែងនឹង iPhone 8 និង Note 8។

Nokia 8 នឹងបញ្ចេញលក់លើទីផ្សារបរទេសនាដើមខែកញ្ញាក្នុងតម្លៃ ៥៩៩ អឺរ៉ូ ប្រហែល ៧០៥ ដុល្លារ ។ ចំពោះលក្ខណៈសម្បត្តិរបស់ Nokia 8 នេះមានដូចជាអេក្រង់ទំហំ ៥,៣ អ៊ីញកម្រិត Quad HD 2560 x 1440 ភីកសែល, ដំណើរការដោយបន្ទះឈីបថ្មីបំផុត Snapdragon 835, RAM ទំហំ ៤ GB និងមានអង្គផ្ទុកទិន្នន័យ ៦៤ GB អាចបន្ថែមទំហំបាន។

ត្បិតថាបច្ចុប្បន្នក្រុមហ៊ុនផលិតស្មាតហ្វូនភាគច្រើនមានទំនោរផលិតស្មាតហ្វូនមិនមានប៊ូតុង Home និងមានស៊ុមអេក្រង់ស្ដើង ប៉ុន្តែ Nokia 8 ហាក់មិនបានដើរតាមទំនោរនេះឡើយ ដោយនៅតែបំពាក់ប៊ូតុង Home អមដោយគ្រាប់ចុច និង មានស៊ុមអេក្រង់ធំ។ និយាយពីការឌីហ្សាញ Nokia 8 មានកម្រាស់ ៧,៣ ម.ម, មានតួខ្លួនរាងកោង, មានខ្សែអង់តែននៅគែមទូរសព្ទលើ/ក្រោម និងមានសម្បកធ្វើពីអាលុយមីញ៉ូម។ ជម្រើសពណ៌មានដូចជាពណ៌ខៀវរលោង, ខៀវគ្រើម, ទង់ដែង និង ពណ៌ប្រផេះ។

ចំណុចខ្លាំងរបស់ Nokia 8 គឺនៅត្រង់ប្រព័ន្ធកាមេរ៉ាដោយវាជាស្មាតហ្វូន Android ម៉ាក Nokia ដំបូងដែលប្រើ Sensor របស់ Zeiss ទាំងនៅលើកាមេរ៉ាមុខ និង ក្រោយ មិនតែប៉ុណ្ណោះមានប្រព័ន្ធកាមេរ៉ាភ្លោះនៅផ្នែកខាងក្រោយទៀតផង។ កាមេរ៉ាទាំង ៣ គ្រាប់សុទ្ធតែមានទំហំ ១៣ MP ដោយប្រព័ន្ធកាមេរ៉ាខាងក្រោយមានកាមេរ៉ាមេជាកាមេរ៉ាថតរូបពណ៌, មានបច្ចេកវិទ្យារក្សាលំនឹង OIS និងមួយទៀតជាកាមេរ៉ាថតរូប ស-ខ្មៅ មាន Aperture f/2.0 ដូចគ្នា។ កាមេរ៉ាខាងមុខវិញក៏មាន Aperture f/2.0 ដែរដោយប្រើភ្លើងអេក្រង់ជំនួយជាភ្លើង Flash ពេលថតរូបទៀតផង។

Software នៃការថតរូបហាក់មិនមានអ្វីអស្ចារ្យនោះទេ ប៉ុន្តែក្រុមហ៊ុន HMD បានបន្ថែមមុខងារមួយឈ្មោះថា “Bothie Mode”។ មុខងារនេះស្រដៀងទៅនឹងអ្វីដែល Samsung និង LG ប្រើពីមុនមកដែរ ដោយអាចថតវីដេអូ ឬ រូបភាពដោយប្រើកាមេរ៉ាមុខ និង ក្រោយក្នុងពេលតែមួយ ប៉ុន្តែ Nokia 8 ពិសេសត្រង់ថាអាចផ្សាយផ្ទាល់វីដេអូទៅ Facebook ឬ YouTube បាន។

Nokia 8 មានថ្មទំហំ ៣០៩០ mAh ដែលអាចទ្រាំទ្រនឹងបច្ចេកវិទ្យា Quick Charge 3.0 បាន ហើយមុខងារផ្សេងទៀតរួមមានទ្រនាប់ស្កេនខ្ចៅដៃលើប៊ូតុង Home។ បើមើលលើចំណុចពិសេសដែលបានបង្ហាញខាងលើ Nokia 8 ហាក់មិនអាចប្រជែងនឹង iPhone 8 ឬ Note 8 បានឡើយ ដោយសារកង្វះខាតមុខងារសាកថ្មឥតប្រើខ្សែ, មិនមានការរចនាដែលអាចធន់នឹងទឹក និង ការរចនារូបរាងនៅមិនទាន់សម័យ៕

ប្រភព៖ theverge ប្រែសម្រួល៖ សុខហេង