Taeyeon ទ្រហ៊ោយំពេលត្រូវអ្នកគាំទ្ររុញដួល និងនាំគ្នាលូកលាន់ពេញរាងកាយ (វីដេអូ)

2017-08-18 02:26:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះមានព័ត៌មានភ្ញាក់ផ្អើលមួយពាក់ព័ន្ធនឹង Taeyeon តារាចម្រៀងមេក្រុម Girls' Generation ដែលបានជួបរឿងនឹកស្មានមិនដល់នៅព្រលានយន្តហោះ។

តារាចម្រៀង Taeyeon បានជួបហេតុការណ៍ភិតភ័យមួយ ជាមួយអ្នកគាំទ្រមួយចំនួនរបស់នាង នៅក្នុងប្រទេសឥណ្ឌូណេស៊ី។ ក្នុងពេលនោះ នាងត្រូវអ្នកគាំទ្រជាច្រើនកុះករ ចោមរោមឡោមព័ទ្ធ នៅពេលដែលនាងមកដល់អាកាសយានដ្ឋាន Soekarno Hatta Airport ក្នុងប្រទេសឥណ្ឌូណេស៊ី កាលពីថ្ងៃទី ១៧ ខែសីហាម្សិលមិញនេះ។

ហេតុការណ៍ជ្រួលច្របល់នេះបានកើតឡើង ហើយត្រូវថតជាប់ ដោយអ្នកគាំទ្រផ្សេងទៀត ព្រមទាំងបានបង្ហោះលើអនឡាញ ដែលនាំឲ្យអ្នកប្រើប្រាស់បណ្ដាញអ៊ីនធឺណិតមានការខឹងសម្បារ ចំពោះទង្វើមិនសមរម្យដាក់តារាស្រី Taeyeon ហើយថែមទាំងធ្វើឲ្យនាងដួលទៀត។

ប៉ុន្មានម៉ោងក្រោយ មេក្រុមចម្រៀង Girls' Generation រូបនេះបានបង្ហាញក្ដីព្រួយបារម្ភពីសុវត្ថិភាពខ្លួនទាក់ទងនឹងរឿងនេះលើគណនី Instagram ថា៖ "នៅប្រលានយន្តហោះ ចាកាតា មានមនុស្សជាច្រើនមកចោមរោមទាំងអស់គ្នា ហើយខ្លះជាន់ជើងគ្នាទៀត។ វាជាស្ថានភាពដ៏គ្រោះថ្នាក់ រហូតធ្វើឲ្យខ្ញុំដួលលើដី និងយំមិនឈប់។ កងការពារក្នុងប្រទេសក៏បានជួយគ្រាខ្ញុំឡើងដែរពេលនោះ ហើយនេះពិតជាគួរឲ្យភ័យ និងភ្ញាក់ផ្អើលខ្លាំងណាស់”។ នាងបន្ថែមថា៖ "ស្ថិតក្នុងកាលៈទេសៈនោះ ខ្ញុំពិតជាមានភាពតានតឹងណាស់ ដោយសារមានមនុស្សរោមជុំជិតពីក្រោយផង ទាំងសងខាងផង ហើយពេលនោះអ្នកគាំទ្រខ្ញុំដទៃទៀត ក៏បានដួលឈឺខ្លួនមួយចំនួនដែរ ឃើញបែបនេះបេះដូងខ្ញុំក៏ឈឺតាមនោះដែរ។ មួយវិញទៀត ខ្ញុំគិតថាវាក៏មិនមែនជាចេតនាពីមនុស្សទាំងនោះដែរ ប៉ុន្តែផ្នែកនៃរាងកាយរបស់ខ្ញុំដូចជា គូទ និងទ្រូងត្រូវពួកគេប៉ះរហូត ខ្លះទាញ ខ្លះរុញ... អារម្មណ៍បែបនេះ ធ្វើឲ្យខ្ញុំខ្មាសណាស់ ហើយបាត់បង់ស្មារតីអស់ហើយ”។

Taeyeon ពេលដួលក្នុងចំណោមមនុស្សយ៉ាងកកកុញ

រូបនេះពេលនាងត្រូវកាមេរ៉ាបោកត្រូវក្បាល

ក្នុងសំណេរនោះផងដែរ Taeyeon ក៏បានសុំទោសទៅកាន់អ្នកគាំទ្រដែលខំរង់ចាំនាង ប៉ុន្តែនាងពិតជាមិនចង់ឲ្យនរណាម្នាក់មានភាពភិតភ័យ ហើយរងរបួស ឫមានគ្រោះថ្នាក់ឡើយ ព្រមទាំងបានផ្ដាំផ្ញើទៅកាន់អ្នកទាំងនោះ សូមឲ្យចេះយល់ពីគ្នាឲ្យបានច្រើនជាងនេះ។

គួរបញ្ជាក់ថា តារាស្រីវ័យ ២៨ឆ្នាំរូបនេះ ត្រូវធ្វើដំណើរទៅកាន់ទីក្រុងចាកាតា ប្រទេសឥណ្ឌូណេស៊ី ដើម្បីចូលរួមព្រឹត្តិការណ៍ "Asian Games 2018 Countdown” ជាមួយសមាជិករួមក្រុម Hyoyeon ប៉ុន្តែជាអកុសលបែរជាជួបរឿងរ៉ាវភ្ញាក់ផ្អើលនេះទៅវិញ៕

ប្រភព៖ Koreaboo ប្រែសម្រួល៖ យី សុធារី