មិននឹកស្មានថា ចង់ក្លាយជា កងកម្លាំងពិសេសដាណឺម៉ាក ត្រូវហ្វឹកហាត់ច្រើន និងលំបាកយ៉ាងនេះ

2017-08-18 03:36:05
ចំនួនមតិ 0 | ចំនួនចែករំលែក 0

ចន្លោះមិនឃើញ

កងកម្លាំងពិសេស Fromandskorpset ឬ Frogman Corps របស់ប្រទេសដាណឺម៉ាក គឺជាកងកម្លាំងដ៏ខ្លាំងក្លាបំផុតមួយនៅលើពិភពលោក និងជាអង្គភាពប្រតិបត្តិការពិសេស ដែលបានយកគំរូតាម កងកម្លាំងពិសេសអង់គ្លេស British Special Boat Squadron ឬហៅកាត់ថា S.B.S. ។ វាចាប់ផ្ដើមសកម្ម នៅថ្ងៃទី១៧ ខែមិថុនា ឆ្នាំ១៩៥៧។ វាគឺជាកងកម្លាំងពិសេសដំបូងបង្អស់របស់ប្រទេស បន្ទាប់ពីបានក្លាយជាផ្នែកមួយនៃកងទ័ពជើងទឹកដាណឺម៉ាក។

ទោះបីជាយ៉ាងណា ចាប់តាំងពីឆ្នាំ១៩៧០ មក វាបានក្លាយជាអង្គភាពប្រតិបត្តិឯករាជ្យដំបូងបង្អស់មួយ ដែលធ្វើការជាមួយនាវាចម្បាំង នាវាមុជទឹក និងជាផ្នែកនៃបញ្ជាការប្រតិបត្តិការ របស់កងនាវាចរដាណឺម៉ាក។ ពួកគេបម្រើបានទាំងការវាយប្រហារក្នុងទឹក និងលើគោក ហើយមានសមត្ថភាពធ្វើការស៊ើបអង្កេតរយៈចម្ងាយឆ្ងាយ , ធ្វើសកម្មភាពដោយផ្ទាល់ និង កិច្ចការផ្សេងទៀត ដែលស្រដៀងនឹងវិសាលភាព នៃក្រុម U.S Navy SEAL Teams របស់សហរដ្ឋអាមេរិកដែរ។

ជារៀងរាល់ឆ្នាំ មានអ្នកដាក់ពាក្យស្នើសុំចូលបម្រើកងកម្លាំងពិសេសនេះ ពី ៥០០ ទៅ ៦០០ នាក់ ប៉ុន្តែបេក្ខជនមិនដល់ ១០ នាក់ឡើយ ដែលអាចឆ្លងផុតការហ្វឹកហាត់ រយៈពេល ៩ ខែ របស់ Frogman Corps បាន។

យ៉ាងណាមិញ អ្នកដែលមានបំណងចង់បម្រើការនៅក្នុងកងកម្លាំងពិសេសខាងលើ ត្រូវបំពេញតាមលក្ខខណ្ឌដូចខាងក្រោម៖

ត្រូវមានអាយុចន្លោះពី ១៩ ដល់ ៣០ ឆ្នាំ ហើយមិនមានជាប់ទោស

ត្រូវឆ្លងកាត់ការប្រឡងជ្រើសរើស ដែលមានរយៈពេល ២ ថ្ងៃ (ភាគច្រើនធ្វើឡើងក្នុងខែសីហា)

ការធ្វើលំហាត់ប្រាណមួយចំនួន ក្នុងនោះរួមមាន ការរត់ចម្ងាយឲ្យបានយ៉ាងហោចណាស់ ២ ៨០០ ម៉ែត្រ ក្នុងរយៈពេល ១២ នាទីផងដែរ

ការធ្វើតេស្តសរសេរ , ផ្នែកវិញ្ញាណ , ទិសដៅ និងការអនុវត្តការងារក្រោមសម្ពាធ

ប្រសិនបើពួកគេអាចឆ្លងផុតការប្រឡងខាងលើ នោះត្រូវបន្តទៅធ្វើការប្រឡង ដែលមានរយៈពេល ៩២ ម៉ោងទៀតដូចជា៖

ការស៊ូទ្រាំសាច់ដុំ
ការធ្វើតេស្តមុជទឹក
ដើរចម្ងាយ ៧០ គីឡូម៉ែត្រ ជាមួយកញ្ចប់ទម្ងន់ ១០ គីឡូ
ជិះទូកកៅស៊ូ
ជ្រមុជទឹក
រត់ប្រណាំង ១៥ គីឡូម៉ែត្រ
ហែលទឹកចម្ងាយ ៣០០ ម៉ែត្រ ក្នុងរយៈពេល ៨ នាទី ឬតិចជាងនេះ
ហែលទឹកនៅជម្រៅ ២៥ ម៉ែត្រ
ការស៊ាំនឹងទឹក
ការហាត់សមក្រោមទឹក
ការហាត់ភាពជឿជាក់

ក្រោយពីបានបញ្ចប់ការប្រឡងទាំងនេះ បេក្ខជនត្រូវបានអញ្ជើញឲ្យចូលរៀនថ្នាក់ឯកទេសសិក្សាមួយថ្ងៃ នៅទីក្រុងកូប៉េនហាហ្គេន (Copenhagen) ប្រទេសដាណឺម៉ាក។ បន្ទាប់មក ប្រសិនបើត្រូវបានគេជ្រើសរើស បេក្ខជនត្រូវចុះកុងត្រា នៅក្នុងខែធ្នូ និងចាប់ផ្ដើមហ្វឹកហាត់កាន់តែខ្លាំងបន្ថែមទៀត ដូចជា៖

ខែមករា៖ វគ្គបណ្ដុះបណ្ដាលមូលដ្ឋានកងទ័ពជើងទឹក (៥ សប្ដាហ៍)
ខែកុម្ភៈ៖ វគ្គបណ្ដុះបណ្ដាលមូលដ្ឋាន នៃកងកម្លាំងពិសេស Frogman Corps (១៨ សប្ដាហ៍)
ខែមិថុនា៖ វគ្គបណ្ដុះបណ្ដាលមូលដ្ឋាន នៃកងកម្លាំងពិសេស Frogman Corps (១៦ សប្ដាហ៍)
ខែតុលា៖ តែងតាំងជាកងកម្លាំងពិសេស Frogman Corps ដើម្បីចូលបម្រើការងារ យ៉ាងហោចណាស់ ២ ឆ្នាំ៕