បាសចាក់ចម្រៀង ៧ ប្រភេទ មានមួយកំពុងត្រូវប៉ាន់ទីផ្សារយុវវ័យ

2017-08-18 23:19:00
ចំនួនមតិ 0 | ចំនួនចែករំលែក 0

ចន្លោះមិនឃើញ

រាល់ការសម្រេចចិត្តទិញ Speakers ណាមួយ ជាដំបូងអ្នកច្រើនផ្ដោតសំខាន់ទៅលើស្លាកយីហោ, រូបរាងនិងគុណភាពសំឡេង។ ប៉ុន្តែតាមការពិត Speaker មិនមែនមានតែ ១ ប្រភេទឡើយ វាមានដល់ ៧ ប្រភេទឯណោះ។ ផ្អែកលើទីតាំងនៃការប្រើប្រាស់ ប្រភេទនៃ Speaker នីមួយៗជារឿងដែលអ្នកត្រូវស្វែងយល់ជាចាំបាច់។

១.Portable Speaker

ប្រភេទ Speaker ខ្នាតតូចនេះកំពុងមានការពេញនិយមមែនទែនសម្រាប់អ្នកប្រើប្រាស់ក្មេងៗ។ គេហៅវាថា Portable Speaker ដោយសារវាជាប្រភេទឧបករណ៍បំពងសំឡេងម្យ៉ាង ដែលយើងអាចយកទុកដាក់តាមខ្លួនងាយស្រួលនិងប្រភេទខ្លះអាចប្រើប្រាស់បច្ចេកវិទ្យា Wireless មិនចាំបាច់ប្រើប្រាស់ខ្សែតភ្ជាប់ទៅមជ្ឈដ្ឋានណាមួយឡើយ។

ប្រភេទ Portable Speaker កំពុងត្រូវប៉ាន់មានដូចជា JBL, Bose, SONY, Beats ជាដើម។

២.Floorstanding Speakers

ជាប្រភេទ Speaker ដែលគេនិយមដាក់ប្រើប្រាស់ក្នុងបន្ទប់។ វាមានជើងជាប់នៅឥដ្ឋ រចនារូបរាងតួខ្លួនធំ កម្ពស់ខ្ពស់។ គុណសម្បត្តិ វាអាចយកដាក់បាននៅគ្រប់កន្លែងទៅតាមចិត្ត មិនថាក្បែរធ្នើរដាក់សៀវភៅ, ទូខោអាវ និងអាចបន្លាស់ទីប្ដូរទីតាំងបានងាយស្រួល។ ផ្អែកលើលក្ខណៈសម្បត្តិទាំងនេះហើយ ទើបគេរមែងជ្រើសរើសនូវ Floorstanding Speakers មកប្រើប្រាស់ក្នុងគេហដ្ឋាន។

៣.Bookshelf Speakers

ត្រកូលតែមួយនឹង Floorstanding Speaker ប៉ុន្តែខុសត្រង់ពពួក Bookshelf រចនាតួខ្លួនតូច។ វាមិនត្រូវការទីតាំងធំនោះទេ អាចត្រឹមធ្នើរដាក់សៀវភៅទំហំតូចល្មមក៏អាចប្រើបាន។ Bookshelf Speakers គេច្រើនដាក់មួយគូ ហើយដាក់ Subwoofer មួយគ្រាប់ ដើម្បីឲ្យសំឡេងអុកល្អ។

៤.In-Wall Speakers

ជាប្រភេទ Speakers ដែលបំពាក់ជាប់ជញ្ជាំងហើយលៀនចេញមកក្រៅមើលឃើញតិចតួចបំផុត។ វាល្អសម្រាប់ដាក់ក្នុងបន្ទប់ចង្អៀតព្រោះវាមិនត្រូវការទីតាំងធំឡើយ។ ជួនកាលបើ Speaker នោះមានពណ៌ដូចនឹងពណ៌ជញ្ជាំង រូបរាងរបស់វានឹងលេចបាត់ធ្វើឲ្យយើងមើលសឹងតែមិនឃើញ។

បញ្ជាក់ថា ការដំឡើង Speaker ប្រភេទនេះ ត្រូវការអ្នកដែលមានជំនាញខ្ពស់និងការជួសជុល ព្រោះការដោះដូរជាងល្មមៗមិនអាចធ្វើបានឡើយ។

៥.On-Wall Speakers

ជាប្រភេទ Speaker ដែលបំពាក់ជាប់ជញ្ជាំងដូចគ្នា តែលៀនចេញមកក្រៅឃើញធំ។ និយមបំពាក់ស្របគ្នាជាមួយប្រភេទទូរទស្សន៍ធំៗជាប់ជញ្ជាំង ដើម្បីមើលទៅឃើញស្អាត សាកសមគ្នា។ គុណភាពសំឡេងបាសនេះមិនចាញ់ Floorstanding ប៉ុន្មានឡើយ។

៦.In-ceiling Speakers

ស្រដៀងគ្នាទៅនឹង In-Wall ប៉ុន្តែ In-ceiling Speaker បំពាក់នៅក្នុងផ្នែកពិដាន។ វាអាចបញ្ចេញសំឡេងបានច្បាស់ល្អមិនខុសពីពពួកបាសដទៃ សម្រាប់គេហដ្ឋានដែលមានជាន់តិច។ ជុំវិញការដំឡើងគឺតម្រូវអ្នកដែលមានជំនាញខ្ពស់ដូចគ្នា។

៧.Satellite/Subwoofer Combination

ជាប្រភេទ Speaker តូចៗដែលគេរៀបចំក្នុងទម្រង់ពពួក Satellite Speaker បញ្ចូលជាមួយពពួក Subwoofer។ ទាមទារទីតាំងផ្ទុកតូច ប៉ុន្តែអាចបញ្ចេញគុណភាពសំឡេងច្បាស់ល្អ។ ងាយស្រួលរៀបដំឡើងដោយខ្លួនឯង ដែលយើងរមែងឃើញពពួក Speaker នេះ និយមដាក់ជាមួយឈុតកុំព្យូទ័រ។

បញ្ជាក់ថា ប្រភេទ Speaker ទាំងនេះប្រើប្រាស់ដើម្បីចាក់ចម្រៀងតែប៉ុណ្ណោះ បើទាក់ទងនឹងឧបករណ៍បំពងសំឡេងសុទ្ធសាធគឺនៅមានច្រើនជាងនេះទៀត។

ប្រភព៖ lifewire ប្រែសម្រួល៖ កៅ រក្សា