មិនយូរទេ Alibaba របស់ Jack Ma នឹងវ៉ាដាច់ Amazon
- 2017-08-18 11:54:18
- ចំនួនមតិ 0 | ចំនួនចែករំលែក 0
មិនយូរទេ Alibaba របស់ Jack Ma នឹងវ៉ាដាច់ Amazon
ចន្លោះមិនឃើញ
មិនយូរទេអាជីវកម្មលក់ទំនិញតាមអនឡាញដ៏ធំរបស់ចិន Alibaba នឹងវ៉ាដាច់ Amazon ខណៈភាគហ៊ុនរបស់ Alibaba បានកើនឡើងជិត ៥០% កាលពីថ្ងៃព្រហស្បតិ៍បន្ទាប់ពីប្រតិបត្តិការលក់ និងប្រាក់ចំណេញក្នុងត្រីមាសទី២របស់ខ្លួនកើនឡើងខ្ពស់ជាងព្យាករណ៍ Wall Street ទៅទៀត ។
ភាគហ៊ុនរបស់ Alibaba បានកើនឡើងច្រើនជាង ៩០% ក្នុងឆ្នាំនេះ ហើយឥឡូវក្រុមហ៊ុនមានតម្លៃប្រហែល ៤២០ ប៊ីលានដុល្លារឯណោះ ។ ដោយឡែកប្រតិបតិ្តការរបស់ Amazon ក៏ហ៊ុចផលវិជ្ជមានដែរ ខណៈក្រុមហ៊ុនមានតម្លៃ ៤៦៥ប៊ីលានដុល្លារ ។ ប្រតិបត្តិការ Alibaba ដំណើរការល្អជាង Amazon ដោយសារតែតម្រូវការទីផ្សារក្នុងស្រុកខ្លាំង ។
ក្រុមហ៊ុន Alibaba បានលើកឡើងថា ប្រាក់ចំណូលសរុបកើនឡើង ៥៦% បើប្រៀបធៀបកាលពីឆ្នាំមុន ហើយកំណើននេះដែរគឺមានសន្ទុះអ្នកប្រើប្រាស់ស្មាតហ្វូន។ បើសិនភាគហ៊ុនរបស់ Alibaba បន្តកើនឡើងនោះ វានឹងវ៉ាដាច់ Amazon ហើយនឹងក្លាយជាក្រុមហ៊ុនលក់ទំនិញតាមអនឡាញមានតម្លៃថ្លៃជាងគេក្នុងលោកជាមិនខាន ។
រំឭកថា ភាគហ៊ុនទីផ្សាររបស់ Alibaba មានតម្លៃ ២៣០ប៊ីលានដុល្លារនៅពេលក្រុមហ៊ុនបើកជាសាធារណៈនៅឆ្នាំ ២០១៤ ។ ចំណែក Amazon មានតម្លៃត្រឹមតែ ១៣០ ប៊ីលានដុល្លារប៉ុណ្ណោះ។ តែនៅឆ្នាំ ២០១៥ ក្រុមហ៊ុន Alibaba ជួបហានិភ័យដោយទំនិញក្លែងក្លាយចរាចរពាសពេញវិបសាយ ។ ដោយឡែក Amazon កើនឡើងជាបន្តបន្ទាប់ ៕