ហង់ជួន ណារ៉ុន សុំតែម្យ៉ាងគត់ពីអត្តពលិកកម្ពុជាទាំងអស់មកស៊ីហ្គេមលើកនេះ
- 2017-08-19 05:36:56
- ចំនួនមតិ 0 | ចំនួនចែករំលែក 0
ហង់ជួន ណារ៉ុន សុំតែម្យ៉ាងគត់ពីអត្តពលិកកម្ពុជាទាំងអស់មកស៊ីហ្គេមលើកនេះ
ចន្លោះមិនឃើញ
ឯកឧត្តមបណ្ឌិត ថោង ខុន រដ្ឋមន្រ្តីក្រសួងទេសចរ និងជាប្រធានគណៈកម្មាធិការជាតិអូឡាំពិកកម្ពុជា និង ឯកឧត្ដម បណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានអញ្ជើញមកសំណេះសំណាលសួរសុខទុក្ខ ផ្តាំផ្ញើរដល់ប្រតិភូកីឡាករ កីឡាការិនីកម្ពុជាដែលចូលរួមការប្រកួតកីឡាស៊ីហ្គេមនៅប្រទេសម៉ាឡេស៊ីកាលពីព្រឹកមិញនេះ។
ក្នុងឱកាសនេះដែរ ឯកឧត្ដម បណ្ឌិតសភាចារ្យ ហង់ជួន ណារ៉ុន បានផ្ដាំទៅអត្តពលិកទាំងអស់ថាធ្វើយ៉ាងណារក្សាចំណាត់ថ្នាក់មេដាយក្នុងតារាងលេខ៨ កាលពីស៊ីហ្គេមលើកមុនឱ្យបាន កុំឱ្យធ្លាក់ទៅក្រោមនេះទៀត។ អ្វីដែលកាន់តែល្អទៀតនោះ ប្រសិនបើអាចឡើងចំណាត់ថ្នាក់ រកមេដាយបានកាន់តែច្រើនគឺកាន់តែល្អប្រសើរ ព្រោះកម្ពុជាកាន់តែកៀកដល់ពេលធ្វើជាម្ចាស់ផ្ទះទៅហើយ។ ការរៀបចំខ្លួនធ្វើជាម្ចាស់ផ្ទះ និងការរៀបចំប្រភេទកីឡាដើម្បីឱ្យបានមេដាយច្រើនគឺជារឿងចាំបាច់បំផុតសម្រាប់កម្ពុជា។
ដោយឡែកចំពោះឯកឧត្តមបណ្ឌិត ថោង ខុន រដ្ឋមន្រ្តីក្រសួងទេសចរ និងជាប្រធានគណៈកម្មាធិការជាតិអូឡាំពិកកម្ពុជាបានលើកឡើងដែរថា កម្ពុជាមកស៊ីហ្គេមលើកនេះដើម្បីរៀនពីគេ រៀបចំយ៉ាងណាឱ្យល្អសម្រាប់ពេលធ្វើជាម្ចាស់ផ្ទះម្ដង។ មួយវិញទៀត ឯកឧត្តមក៏បានផ្ដាំផ្ញើទៅកីឡាករ ថ្នាក់ដឹកនាំទាំងអស់ដែរថា ប្រសិនបើឃើញចំណុចខ្វះខាតអ្វី សូមរាយការណ៍ទៅថ្នាក់លើរបស់ខ្លួនដើម្បីសម្រួល កុំយករឿងអាក្រក់អ្វីមួយទៅបង្ហោះតាមបណ្ដាញសង្គម។ ការបង្ហោះរឿងទាំងនោះ វាមិនមែនជាការល្អឡើយ ព្រោះម្ចាស់ផ្ទះគេចមិនផុតពីការខ្វះខាត ឬការរៀបចំមិនបានទាន់ពេលឡើយ។
សូមបញ្ជាក់ថាព្រឹត្តិការណ៍ស៊ីហ្គេមនៅម៉ាឡេស៊ី នឹងប្រារព្ធពិធីបើកនៅល្ងាចនេះហើយ ដោយមានការចូលរួមពីសំណាក់តំណាងកីឡាករ និងប្រតិភូគ្រប់ប្រទេសទាំងអស់ដែលចូលរួម។ ចំពោះការប្រកួតវិញ ប្រភេទកីឡាខ្លះក៏បានដំណើរការជាច្រើនថ្ងៃមុនមកហើយដែរ ព្រោះពួកគេមានវិញ្ញាសាច្រើនត្រូវប្រកួតបន្ដបន្ទាប់៕
ស្រាបៀរអង្គរមានមោទនភាពគាំទ្រអត្តពលិកជាតិចូលរួមប្រកួតកីឡាស៊ីហ្គេម ២០១៧ #ឆន្ទៈយើងបេះដូងយើង៕