មកដឹងរឿងរ៉ាវប្រវត្តិសាស្រ្ត ចៃដន្យទាំង១១ កើតឡើងគួរឲ្យភ្ញាក់ផ្អើលបំផុត

  • 2017-08-24 04:26:17
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ជីវិត​របស់​យើង​ពោរពេញ​ទៅ​ដោយ​ព្រឹត្តិការណ៍​ដ៏​អស្ចារ្យ​ជាច្រើន ដែល​ជួនកាល​មិន​អាច​ពន្យល់​ដោយ​ហេតុផល​សមរម្យ​ណា​មួយ​បាន​ឡើយ។ អ្នក​ខ្លះ​គិត​ថា​វា​គឺ​ជា​ប្រផ្នូល ខណៈ​អ្នក​ខ្លះ​ទៀត​និយាយ​ថា វា​គ្រាន់តែ​ជា​រឿង​ចៃដន្យ​ប៉ុណ្ណោះ។

នៅ​ក្នុង​ថ្ងៃ​នេះ​យើង​នឹង​ណែនាំ​ប្រិយមិត្ត​ទាំង​អស់​គ្នា ឲ្យ​បាន​ដឹង​នូវ​រឿងរ៉ាវ​ប្រវត្តិសាស្ត្រ​ចៃដន្យ​ទាំង ១១ ដែល​កើតឡើង​គួរ​ឲ្យ​ភ្ញាក់ផ្អើល​បំផុត។

#១ កប៉ាល់ Olympic, Titanic និង Britannic

នៅ​ក្នុង​ឆ្នាំ​១៩០៧ ក្រុមហ៊ុន White Star Line បាន​ផលិត​កប៉ាល់​ស្រដៀង​គ្នា ចំនួន ៣ គ្រឿង គឺ កប៉ាល់ Olympic, Titanic និង Britannic ហើយ​ពួក​វា​ទាំង ៣ សុទ្ធតែ​មាន​ជោគ​វាសនា​ស្រដៀង​គ្នា។ កប៉ាល់ Britannic បាន​ផ្ទុះ​នៅ​លើ​អណ្ដូង​រ៉ែ​មួយ ឯ​កប៉ាល់ Titanic បាន​បុក​ជាមួយ​ផ្ទាំង​ទឹកកក​បណ្ដាល​ឲ្យ​លិច និង កប៉ាល់ Olympic បាន​បុក​ជាមួយ​កប៉ាល់​ដទៃ​ទៀត។

#២ កញ្ញា​កំពូល​សំណាង

គិលានុបដ្ឋាយិកា​ម្នាក់ មាន​ឈ្មោះ​ថា Violet Jessop គឺ​ជា​សមាជិក​នាវិក​នៅ​លើ​កប៉ាល់​ទាំង ៣ គ្រឿង​ខាងលើ (Olympic, Titanic និង Britannic) ហើយ​នាង​បាន​រួច​ផុត​ជីវិត​ពី​គ្រោះថ្នាក់​ទាំង ៣ លើក​តែម្ដង។

#៣ លោក Mark Twain និង​ផ្កាយ​ដុះ​កន្ទុយ Halley’s Comet

លោក Mark Twain បាន​កើត​នៅ​ក្នុង​ឆ្នាំ​១៨៣៥ នៅ​ពេល​ដែល​ផ្កាយ​ដុះ​កន្ទុយ Halley’s Comet ស្ថិត​នៅ​ជិត​ព្រះអាទិត្យ​បំផុត ដែល​យើង​អាច​មើល​ឃើញ​ដោយ​មិន​ចាំ​បាច់​ប្រើ​កែវយឹត។ ក្រោយមក អ្នក​និពន្ធ​ជនជាតិ​អាមេរិក​រូប​នេះ បាន​ទស្សន៍ទាយ​ពី​ការ​ស្លាប់​របស់​ខ្លួន នៅ​ថ្ងៃ​ដែល​ផ្កាយ​ដុះ​កន្ទុយ​បង្ហាញ​ខ្លួន​ម្ដង​ទៀត ហើយ​វា​ពិត​ជា​បាន​កើតឡើង​មែន ពោល​គឺ​នៅ​ក្នុង​ឆ្នាំ​១៩១០។

#៤ ស្លាក​លេខ​ឡាន​របស់​លោក Archduke Franz Ferdinand

ហេតុផល​ផ្លូវការ​មួយ ដែល​បង្ក​ឲ្យ​កើត​មាន​សង្គ្រាម​លោក​លើក​ទី​១ គឺ​ការ​ធ្វើ​ឃាត​អធិរាជ​នៃ​ប្រទេស​អូទ្រីស លោក Franz Ferdinand (Archduke of Austria-Este) នៅ​ក្នុង​ឆ្នាំ​១៩១៤ នៅ Sarajevo។ លោក និង​ភរិយា ត្រូវ​បាន​ឃាតក​បាញ់​សម្លាប់​នៅ​ក្នុង​ឡាន​មួយ​គ្រឿង ដែល​មាន​ស្លាក​លេខ A III-118 ខណៈ​វា​គឺ​ជា​ថ្ងៃ​បញ្ចប់​នៃ​សង្គ្រាម​លោក​លើក​ទី​១ (ថ្ងៃ​ទី​១១ ខែ​វិច្ឆិកា ឆ្នាំ​១៩១៨ ឬ 11.11.18)។

#៥ ទាហាន​អង់គ្លេស​ដែល​បាន​ស្លាប់​ដំបូង និង​ចុងក្រោយ​បង្អស់ នៅ​ក្នុង​សង្គ្រាម​លោក​លើក​ទី​១

លោក John Parr និង​លោក George Ellison ជា​ទាហាន​អង់គ្លេស​ដែល​បាន​ស្លាប់​ដំបូង និង​ចុងក្រោយ​គេ​បង្អស់ នៅ​ក្នុង​សង្គ្រាម​លោក​លើក​ទី​១ ត្រូវ​បាន​គេ​បញ្ចុះ​សព​នៅ​ទល់​មុខ​គ្នា យ៉ាង​ចៃដន្យ​បំផុត។

#៦ សៀវភៅ​រូប​ត្លុក Dennis the Menace របស់​ចក្រភពអង់គ្លេស និង​សហរដ្ឋអាមេរិក

នៅ​ថ្ងៃ​ទី​១៧ ខែ​មីនា ឆ្នាំ​១៩៥១ សិល្បករ​មក​ពី​ចក្រភពអង់គ្លេស និង​សហរដ្ឋអាមេរិក បាន​ចេញ​ផ្សាយ​សៀវភៅ​រូប​ត្លុក​ស្រដៀង​គ្នា មាន​ឈ្មោះ​ថា Dennis the Menace។ រឿង​ដែល​ចម្លែក​នោះ​គឺ ពួកគេ​បង្កើត​សៀវភៅ​ទាំង​នេះ​ឡើង ដោយ​ឡែក​ពី​គ្នា។ ដើម្បី​ជៀសវាង​ការ​ភ័ន្តច្រឡំ សៀវភៅ​រូប​ត្លុក​របស់​ចក្រភពអង់គ្លេស បាន​ដាក់​លក់​នៅ​ក្រោម​ឈ្មោះ​ថា Dennis and Gnasher វិញ។

#៧ ឡាន Porsche ត្រូវ​បណ្ដាសា​របស់​លោក James Dean

ឡាន Porsche 550 Spyder របស់​អតីត​តារា​សម្ដែង​អាមេរិក James Dean ត្រូវ​បាន​គេ​ហៅ​ថា «Little Bastard» ហើយ​ឈ្មោះ​នេះ មិនមែន​គេ​ចេះ​តែ​ដាក់​ឡើយ។

បន្ទាប់​ពី​លោក James បាន​ជួប​គ្រោះថ្នាក់​ចរាចរ​ស្លាប់​នៅ​ក្នុង​ឡាន​នោះ​រួច វា​ត្រូវ​អ្នក​ច្នៃ​ម៉ូដ​ម្នាក់​មាន​ឈ្មោះ​ថា George Barris ទិញ​យក។ ក្នុង​អំឡុង​ពេល​កំពុង​លើក​ឡើង​ដើម្បី​ដឹក វា​បាន​ធ្លាក់​លើ​ជាង​មេកានិច​ម្នាក់ បណ្ដាល​ឲ្យ​បាក់ជើង​ទាំង ២ តែម្ដង។

បន្ទាប់​មក យានដ្ឋាន​ដែល​ឡាន Porsche នោះ​បាន​ទុក ត្រូវ​ភ្លើង​ឆេះ​ខ្ទេច​ម៉ត់ ប៉ុន្តែ​ឡាន​មួយ​គ្រឿង​នោះ​បែរ​ជា​មិន​អី​ទៅ​វិញ។ ក្រោយ​មក​ទៀត សារមន្ទីរ​មួយ​បាន​យក​វា​ទៅ​ដាក់​តាំង​បង្ហាញ ហើយ​រថយន្ត Porsche ខាងលើ ក៏​បាន​ធ្លាក់​ម្ដង​ទៀត បណ្ដាល​ឲ្យ​ក្មេង​ជំទង់​ម្នាក់​បាក់​ជើង​ម្ខាង។

#៨ ក្លិប២៧ (27 Club)

ក្លឹប​នេះ​មាន​តន្ត្រីករ និង​តួ​អង្គ​ល្បីៗ ដែល​បាន​ស្លាប់​នៅ​អាយុ ២៧ ឆ្នាំ ដោយ​គ្មាន​បុព្វហេតុ​ច្បាស់លាស់។ សមាជិក​ដំបូងបង្អស់​នៃ​ក្លឹប​ដ៏​ចម្លែក​នេះ គឺ​អ្នក​តាក់តែង​កម្មវិធី លោក Alexandre Levy។ បន្ទាប់​មក​មាន​ដូច​ជា Jimi Hendrix, Janis Joplin, Jim Morrison និង​ចុងក្រោយ​គេ​បង្អស់​គឺ Anton Yelchin ដែល​បាន​ស្លាប់​នៅ​ក្នុង​ឆ្នាំ​២០១៦។

#៩ កូន​ភ្លោះ​បែក​គ្នា ៣៩ ឆ្នាំ

កូនភ្លោះ​មួយ​គូ មាន​ឈ្មោះ​ថា Jim Lewis និង Jim Springer បាន​បែក​គ្នា​ក្រោយ​ពេល​កើត ដោយ​ត្រូវ​ឲ្យ​ទៅ​គ្រួសារ ២ ផ្សេង​គ្នា​យក​ទៅ​ចិញ្ចឹម។ រយៈពេល ៣៩ ឆ្នាំ​ក្រោយ​មក ពួកគេ​ក៏​មាន​ឱកាស​ជួប​គ្នា​វិញ ហើយ​មាន​ការ​ភ្ញាក់ផ្អើល​យ៉ាង​ខ្លាំង ដោយសារ​តែ​ជីវិត​រស់នៅ​ស្រដៀង​គ្នា​របស់​ពួកគេ។

  • ពួកគេ​ចិញ្ចឹម​ឆ្កែ​ដូច​គ្នា និង​ដាក់​ឈ្មោះ​ឲ្យ​វា​ថា Toy ដូចគ្នា
  • ពួកគេ​បាន​រៀបការ​ជាមួយ​ស្ត្រី​ឈ្មោះ Linda ដូចគ្នា រួច​បាន​លែងលះ​គ្នា​វិញ​ដូចគ្នា និង​បាន​រៀបការ​ម្ដង​ទៀត​ជា​មួយ​ស្ត្រី​ឈ្មោះ Betty ដូចគ្នា
  • ពួកគេ​បើក​ឡាន និង​ជក់បារី​ម៉ាក​តែមួយ
  • ពួកគេ​ធ្វើ​ការ​ប៉ូលិស , ចូលចិត្ត​សម្រាក​នៅ​ឆ្នេរ​សមុទ្រ​នៅ​រដ្ឋ Florida , មាន​ជំងឺ​ឈឺក្បាល​ប្រកាំង (ឈឺ​មួយ​ចំហៀង​ក្បាល) និង មាន​ទម្លាប់​ខាំ​ក្រចក​ដៃ​ដូច​គ្នា

#១០ ប្រធានាធិបតី​រុស្ស៊ី

ទាហាន​រុស្ស៊ី​ម្នាក់​នៅ​ក្នុង​ឆ្នាំ១៩២០ និង​ម្នាក់​ទៀត​នៅ​ក្នុង​ឆ្នាំ១៩៤១ ស្លៀកពាក់​ឯកសណ្ឋាន​យោធា ដែល​មើល​ទៅ​ស្រដៀង​នឹង ប្រធានាធិបតី​រុស្ស៊ី​បច្ចុប្បន្ន គឺ លោក Vladimir Putin ខ្លាំង​ណាស់។

#១១ រឿង​តុក្កតា The Simpsons និង ប្រធានាធិបតី​អាមេរិក Donald Trump

ឈុត​មួយ​នៅ​ក្នុង​រឿង​តុក្កតា The Simpsons កាល​ពី​ឆ្នាំ​២០០០ បង្ហាញ​ឲ្យ​ឃើញ​ថា លោក Donald Trump បាន​ក្លាយ​ជា​ប្រធានាធិបតី​អាមេរិក ហើយ​វា​ពិត​ជា​បាន​កើតឡើង​មែន នៅ​ឆ្នាំ​២០១៧​នេះ៕

ចុច​អាន៖

ប្រភព៖ Brightside   ប្រែ​សម្រួល៖ សេង ឡុង