ប្រទះឃើញកំពូលតារាហុងកុងរូបនេះ ដើររើសមែកឈើនិងសំរាមលើផ្លូវ

2017-08-24 09:54:13
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីម្សិលមិញ ហេតុការណ៍តក់ស្លុតមួយកើតឡើងនៅទីក្រុង ហុងកុងខណៈព្យុះទីហ្វុងមួយឈ្មោះថា Hato បានបំផ្លាញអចលនទ្រព្យជាច្រើនត្រូវខូចខាត ហើយបើតាមការប៉ាន់ស្មានគឺខ្ទង់ចន្លោះពី ៤ ប៊ីលាន (ប្រហែល ៥០០លានដុល្លារ) ទៅ ៨ប៊ីលានដុល្លារហុងកុង (ប្រហែល ១ពាន់លានដុល្លារ) ឯណោះ។

ក្រោយព្យុះនេះបានស្ងប់ទៅវិញ ភ្លាមៗកម្មករក៏បានចេញមកសម្អាតទីក្រុងនោះឲ្យមានរបៀបរៀបរយឡើងវិញ។ កិច្ចការនេះជាការងារដ៏គួរឲ្យគោរព តើអ្នកណាជាអ្នកដឹកនាំទៅ? ចម្លើយគឺគ្មានអ្នកណាទេ ក្រៅពីតារាសម្ដែងហុងកុង Chow Yun Fat។

កាលពី រសៀលថ្ងៃទី ២៣ ខែសីហាម្សិលមិញនេះ លោក Chow Yun Fat តារាប្រុសជើងចាស់ហុងកុង បានធ្វើសកម្មភាពដ៏ប្រពៃមួយ គឺបានសម្អាតសំរាមកម្ទេចកំទីរាយប៉ាយ លើផ្លូវក្នុងតំបន់ Kowloon។ ពេលឃើញកាយវិការរបស់ លោក Chow អ្នកដំណើរតាមផ្លូវម្នាក់បានថតទុក ហើយបង្ហោះលើគណនី Instagram។

រង្វង់តូចនោះ ជាសកម្មភាពលោក Chow ដើរសម្អាតផ្លូវ

និយាយប្រាប់វិបសាយ Apple Daily តារាប្រុសវ័យ ៦២ឆ្នាំរូបនេះ បានទទួលស្គាល់ថា ខ្លួនពិតជាបានសម្អាតតំបន់នោះ ក្រោយព្យុះបោកបក់មែន ដោយថែមទាំងបានរៀបរាប់ដំណើររឿង ពេលលោកបើកឡានមកផ្ទះវិញ ផ្លូវនៅតំបន់ Kowloon ត្រូវដើមឈើរលំរប៉ាត់រប៉ាយពេញផ្លូវ ជាហេតុធ្វើឲ្យមិនឲ្យឆ្លងកាត់បាន។ ឃើញដូចនេះ លោកក៏បានចុះពីឡាន ហើយដើររើសមែកឈើ និងសម្អាតកម្ទេចកំទីលើផ្លូវ ដើម្បីសម្រួលឲ្យអ្នកដំណើរដទៃទៀតអាចធ្វើដំណើរទៅលំនៅឋានបានស្រួលប្រកបដោយសុវត្ថិភាព។

នេះមិនមែនជាលើកទី ១ទេ ដែលកំពូលតារាហុងកុងរូបនេះ បង្ហាញនូវកាយវិការគួរឲ្យគោរពនេះ យ៉ាងណាមិញ កន្លងទៅមហាជនក៏សរសើរចរិតឫកពារបស់លោកពេលតម្រង់ជួរទិញសំបុត្រចូលមើលរឿងខ្លួនសម្ដែង។

ភាពជាមនុស្សធម៌ដែលមានពីធម្មជាតិរបស់លោកតែងធ្វើឲ្យមហាជនមានការកោតសរសើរជាខ្លាំងមួយទៀត គឺកាលពីឆ្នាំ ២០១៤ លោកបានប្រកាសចង់បរិច្ចាគទឹកប្រាក់ ១ប៊ីលានដុល្លារហុងកុង (ប្រហែល ១៦៤លានដុល្លារ) ជូនវិស័យមនុស្សធម៌ ក្រោយលោកបាត់បង់ជីវិត៕

ចុចអាន៖

ប្រភព៖ Shanghaiist ប្រែសម្រួល៖ យី សុធារី