តុលាការថៃប្រកាសចាប់ខ្លួនលោកស្រី យីង ឡាក់ ក្រោយមិនបង្ហាញខ្លួនថ្ងៃប្រកាសសាលដីកា

2017-08-25 03:44:54
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅថ្ងៃទី ២៥សីហានេះ ជាថ្ងៃតុលាការកំពូលថៃប្រកាសសាលដីកាសំណុំរឿងរបស់អតីតនាយករដ្ឋមន្ត្រីថៃលោកស្រីយីងឡាក់ ពាក់ព័ន្ធនឹងអំពើពុករលួយគម្រោងទិញស្រូវអង្ករ ប៉ុន្តែលោកស្រីមិនបានមកបង្ហាញខ្លួនឡើយ។

តុលាការកំពូលថៃសម្រេចលើកពេលប្រកាសសាលដីកាទៅថ្ងៃទី ២៧ខែកញ្ញាវិញ និងចេញដីកាចាប់ខ្លួនលោកស្រីទៀតផង។ លោកស្រី យីងឡាក់ ស៊ីណាវ៉ាត្រា ធ្លាប់បដិសេធការប្រព្រឹត្តិខុសក្នុងគម្រោងទិញស្រូវអង្កររបស់ខ្លួនដែលមានតម្លៃរាប់ពាន់លានដុល្លារ។

ប្រសិនបើលោកស្រីរកឃើញថា មានទោសមែន លោកស្រីប្រឈមនឹងការជាប់ពន្ធនាគាររយៈពេលជាង ១០ឆ្នាំ ហាមឃាត់សកម្មភាពនយោបាយមួយជីវិត និងរឹបអូសទ្រព្យសម្បត្តិ។ យ៉ាងណាក្ដី នៅព្រឹកនេះ លោកស្រី យីងឡាក់ មិនបានមកបង្ហាញខ្លួនឡើយ ដោយលើកហេតុផលថាឈឺ តែតុលាការមិនទទួលហេតុផលនោះ។

លោកស្រី យីងឡាក់ ដែលជាប្អូនស្រីរបស់អតីតនាយករដ្ឋមន្ត្រីថៃ ថាក់ ស៊ីនស៊ីណាវ៉ាត្រា គឺជានាយករដ្ឋមន្ត្រីថៃស្រីដំបូងគេក្នុងប្រវត្តិសាស្ត្រ បានឡើងកាន់អំណាចក្នុងឆ្នាំ ២០១១ និងត្រូវដកហូតតំណែងក្នុងឆ្នាំ ២០១៥។ យ៉ាងណា លោកស្រីនៅតែមានប្រជាប្រិយភាពក្នុងចំណោមអ្នកគាំទ្រអាវក្រហម។ មុនពេលប្រកាសសាលដីកា អ្នកគាំទ្រលោកស្រីរាប់រយនាក់ក៏បានប្រមូលផ្ដុំនៅខាងក្រៅអគារតុលាការកំពូលនៅក្រុងបាងកកផងដែរ៕