អ្នករកស៊ីរៀបចំបុណ្យខ្មោចនៅជប៉ុនប្រកួតប្រជែងគ្នាស្លៀកពាក់ឱ្យសាកសព

2017-08-27 04:22:54
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកទទួលរៀបចំបុណ្យសពវ័យ ២៣ ឆ្នាំម្នាក់បានឈ្នះការប្រកួតនៅឯពិព័រណ៍បុណ្យសពដ៏ធំបំផុតរបស់ជប៉ុនកាលពីថ្ងៃព្រហស្បតិ៍ទី២៤សីហា ដែលសាកល្បងជំនាញបុរាណនៅក្នុងការស្លៀកពាក់តាមបែបសាសនាដល់សាកសព។

នាង រីណូ ថេរ៉ៃ បាននិយាយទាំងញញឹមថា “ខ្ញុំបានហ្វឹកហាត់រាល់ថ្ងៃដើម្បីត្រៀមសម្រាប់ការប្រកួតនេះ។ ខ្ញុំបានថតវីដេអូនិងកែលម្អ ដោយសួរខ្លួនឯងថាតើនេះមើលទៅស្រស់ស្អាតទេ? តើខ្ញុំកំពុងយកចិត្តទុកដាក់ចំពោះអ្នកស្លាប់បានល្អទេ?”។

សាសនាស៊ិនតូរបស់ជប៉ុនជឿថាព្រលឹងគឺមិនស្អាតបរិសុទ្ធភ្លាមៗទេបន្ទាប់ពីស្លាប់ ហើយដំណើរការនៃការស្លៀកពាក់ឱ្យសាកសព ជាធម្មតាគឺធ្វើនៅចំពោះមុខសាច់ញាតិជិតស្និទ្ធតែប៉ុណ្ណោះ ដើម្បីបន្សុទ្ធវិញ្ញាណអ្នកស្លាប់ មុនពេលសាកសពត្រូវបានបញ្ជូនទៅកាន់ “ពិភពផ្សេងទៀត”។

លោក គីមូរ៉ា គូគី ប្រធានបណ្ឌិត្យសភាអូគូរីប៊ីតូ បាននិយាយថា សង្គមចាស់ជរារបស់ជប៉ុនបានបង្កើនតម្រូវការសម្រាប់អ្នករៀបចំបុណ្យសពដែលមានជំនាញពិសេស។

លោកនិយាយថា “មានអ្នកធ្វើការងារនេះប្រហែល ២.០០០ នាក់ដែលមានជំនាញក្នុងការស្លៀកពាក់ឱ្យសាកសព ប៉ុន្តែជំនាញរបស់ពួកគេមានលក្ខណៈខុសៗគ្នា។ ខ្ញុំចង់ឱ្យការប្រកួតប្រជែងនេះក្លាយទៅជាមធ្យោបាយមួយដើម្បីជំរុញអ្នករៀបចំបុណ្យសពទាំងអស់ឱ្យមានភាពប្រសើរឡើងនូវជំនាញរបស់ពួកគេ”។

បេក្ខជនចំនួន ៤ នាក់បានស្លៀកពាក់ឱ្យអ្នកស្ម័គ្រចិត្តជាមនុស្សរស់ ដែលកំពុងដេកលើពូក ដែលគេរៀបចំនៅលើឆាក។ ពួកគេត្រូវបានអង្កេតដោយចៅក្រមបីនាក់ ខណៈភ្លេងនៃពិធីបុណ្យសពត្រូវបានចាក់បន្លឺឡើងយ៉ាងស្រទន់។

អ្នកទាំង ៤នាក់ត្រូវបានគេវិនិច្ឆ័យលើភាពថ្លៃថ្នូរនៃចលនារបស់ពួកគេនិងសមត្ថភាពរបស់ពួកគេក្នុងការស្លៀកពាក់ឱ្យសាកសពដោយមិនបង្ហាញសាច់សាកសពច្រើនពេកទេ។

បន្ទាប់ពីទស្សនាការប្រកួតប្រជែងនេះ លោក អាកាណេ ម៉ាត់ស៊ូដា បាននិយាយថា “ចលនាដៃរបស់ពួកគេពិតជាអស្ចារ្យខ្លាំងណាស់”៕