រឿងទាំង ៧ មិននឹកស្មានថា Siri លើ iPhone អាចធ្វើបាន

2017-08-28 07:03:43
ចំនួនមតិ 0 | ចំនួនចែករំលែក 0

ចន្លោះមិនឃើញ

Siri ជាប្រព័ន្ធជំនួយការឆ្លាតវៃមួយ ដែលក្រុមហ៊ុន Apple បានប្រកាសឲ្យប្រើប្រាស់លើទូរសព្ទ iPhone នាថ្ងៃទី ៤ តុលា ឆ្នាំ ២០១១។ ដោយទោះបីអ្នកប្រើប្រាស់ក្នុងស្រុក មិនសូវចាប់អារម្មណ៍លើមុខងារមួយនេះក្ដី ប៉ុន្តែ Sabay បង្ហាញឲ្យប្រិយមិត្តបានដឹងពីរឿងរ៉ាវចម្លែក ៧ យ៉ាងដែល Siri អាចធ្វើបានយ៉ាងល្អ។

១.បញ្ជាឲ្យបិទទ្វារផ្ទះ

ប្រសិនបើក្នុងគេហដ្ឋានរបស់អ្នក មានប្រើប្រាស់នូវគ្រឿងបរិក្ខារទំនើបគាំទ្រជាមួយកម្មវិធី Home របស់ Apple អ្នកអាចប្រើ Siri ក្នុងការគ្រប់គ្រងនិងបញ្ជាឲ្យឧបករណ៍ស្វ័យប្រវត្តិណាមួយបិទបើកទៅបាន។

ឧបមា អ្នកនិយាយថា "Turn on the porch light” ឬសួរ Siri ថា "is the front dor unlocked?” បើទ្វារនោះបើកចោល អ្នកក៏អាចបញ្ជាឲ្យវាបិទបានតាមរយៈសំឡេងនិយាយរបស់អ្នក។

២.ស្វែងរកជើងហោះហើរដែលហោះមកតំបន់អ្នក

អ្វីដែលកាន់តែអស្ចារ្យ Siri អាចប្រាប់ឲ្យអ្នកដឹងពីជើងហោះហើរណាមួយដែលកំពុងហោះចូលមកកាន់តំបន់របស់អ្នក។ សំណួរទូទៅយើងអាចសួរ Siri ថា "What flights are above me?” ពេលនោះវានឹងបង្ហាញឈ្មោះជើងហោះហើរ, ក្រុមហ៊ុនអាកាសចរ, កម្ពស់នៃការហោះជាដើមត្រលប់មកអ្នកវិញ។

៣.ស្វែងរករូបភាពតាមរយៈពេលវេលានិងទីតាំង

Siri ក៏អាចធ្វើការបង្ហាញនូវរូបភាពផ្សេងៗតាមរយៈការសួរជាពេលវេលាឬទីតាំង ឧបមាអ្នកនិយាយថា "show me photos taken in July” ភ្លាមនោះជំនួយការឆ្លាតវៃ Siri នឹងនាំអ្នកចូលទៅកាន់ទំព័រមួយ ដែលបណ្ដុំដោយរូបភាពអ្នកបានថតនៅអំឡុងខែកក្កដា។

៤.រកចំណងជើងបទចម្រៀងដែលកំពុងចាក់

ដំណើរការបែបនេះ ទំនងស្របបានតែជាមួយបទបែបអឺរ៉ុបប៉ុណ្ណោះ ឧបមាអ្នកកំពុងចាក់ស្ដាប់ចម្រៀងណាមួយ តែអ្នកមិនចាំច្បាស់ពីចំណងជើងរបស់វា អ្នកអាចសួរ Siri បានថា "What song is playing.” នោះវានឹងបង្ហាញទិន្នន័យចំណងជើងពិតតាមដែលអាចធ្វើទៅរួច។

៥.ចាំឈ្មោះសមាជិកគ្រួសារអ្នក

អ្នកអាចបង្រៀនឲ្យ Siri ចងចាំឈ្មោះសមាជិកគ្រួសារអ្នក ដោយចូលទៅកាន់ Settings > General > Siri ហើយកំណត់ការនិយាយ ឧទាហរណ៍ថា "John Doe is my father” ឬ "Jane Doe is my boss” ហើយពេលក្រោយទៀតអ្នកអាចទំនាក់ទំនងទៅបុគ្គលទាំងនោះបានយ៉ាងរហ័សតាម Siri ដោយមិនបាច់ហៅឈ្មោះសម្គាល់ឡើយ។

៦.ធ្វើការកក់នៅភោជនីយដ្ឋាន

ដំណើរការជាមួយទិន្នន័យគេហទំព័រ Yelp ប្រព័ន្ធ Siri អាចធ្វើការណែនាំឲ្យស្គាល់ពីភោជនីយដ្ឋានល្បីៗប្រចាំតំបន់បាន ឬម្យ៉ាងទៀតអ្នកក៏អាចធ្វើការកក់តុបរិភោគអាហារនៅទីតាំងណាមួយ ដោយអាចនិយាយថា "Make me a reservation at yang sing restaurant” ប៉ុន្តែត្រូវដំឡើងកម្មវិធី OpenTable ជំនួយជាមុនសិន។

៧.រកម្ចាស់ទូរសព្ទពិតប្រាកដ

អ្នកត្រូវធ្វើការកំណត់ Contact មួយនៃឈ្មោះនិងអាសយដ្ឋានរបស់អ្នកក្នុងទូរសព្ទ ហើយបើកាលណាជ្រុះបាត់ទូរសព្ទដោយចៃដន្យ ហើយបុគ្គលដែលរើសបានសួរទៅកាន់ Siri ថា "Who does this iPhone (or iPad) belong to?” នោះវានឹងបង្ហាញនូវទិន្នន័យនៃ Contact ដែលអ្នកបាន Save បង្ហាញលើអេក្រង់ស្មាតហ្វូន ដើម្បីងាយស្រួលទំនាក់ទំនងយកឲ្យម្ចាស់ដើមវិញ។

ប្រភព៖ idropnews ប្រែសម្រួល៖ កៅ រក្សា