ប្រឈមជាប់គុក ២ឆ្នាំ និងពិន័យរាប់ម៉ឺនដុល្លារ ក្រោយសម្លាប់កង់ហ្គូរូមួយក្បាល

2017-09-01 01:59:28
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជនជាតិអូស្ត្រាលីម្នាក់ ត្រូវបានចាប់ខ្លួននៅទីក្រុងម៉ែលប៊ន បន្ទាប់ពីវីដេអូមួយបង្ហាញពីបុរសរូបនេះអាបំពង់.កកង់ហ្គូរូកំពុងរងរបួសស្រាប់ ត្រូវបានចែកចាយលើអ៊ីនធឺណិត។

បុរសវ័យ ៤៣ឆ្នាំ ត្រូវបានចោទប្រកាន់ករណីបំផ្លិចបំផ្លាញសត្វព្រៃស្ថិតនៅក្រោមការការពាររបស់រដ្ឋ។ មន្ត្រីក៏បានរឹបអូសកាំបិត និងកាំភ្លើងពីផ្ទះរបស់គាត់ដែរ។ នេះបើតាមការអះអាងរបស់អាជ្ញាធររដ្ឋវីតូរីយ៉ា ។

មន្ត្រីបរិស្ថានបានចាត់ទុកឧបទ្ទវហេតុនេះ ជារឿងគួរឲ្យស្អប់ខ្ពើមបំផុត។ ប្រសិនបើរកឃើញថាមានទោសក្រោមច្បាប់រដ្ឋវីតូរីយ៉ា បុរសខាងលើប្រឈមជាប់ពន្ធនាគាររហូតដល់ ២ឆ្នាំ និងពិន័យជាប្រាក់ ៣៨ ០៥៦ដុល្លារអូស្ត្រាលី ឬប្រមាណ ៣០ ០០០ដុល្លារអាមេរិក។

វីដេអូធ្វើទារុណកម្មសត្វ ត្រូវបានចែកចាយដំបូងនៅលើបណ្ដាញសង្គមចិន WeChat ដោយបុរសជាជនសង្ស័យបានដើរសំដៅទៅរកកង់ហ្គូរូ មួយក្បាលកំពុងដេកឈឺនៅលើទួលមួយ។ កង់ហ្គូរូ ត្រូវបានទាត់ជាច្រើនដង និងស្រែកគំហកដាក់ រួចបុរសដដែលបានលបទៅពីក្រោយ។ បន្ទាប់មក គាត់ចាប់កន្ទុយកង់ហ្គូរូ រួចជាន់លើខ្នង និងយកកាំបិតអារកពីក្រោយ រហូតវាងាប់តែម្ដង។ ឯនៅពីក្រោយវីដេអូ គេឮសំឡេងមនុស្សសើចផងដែរ៕