ឥណ្ឌាបរាជ័យបាញ់បង្ហោះផ្កាយរណប ដោយសារបញ្ហាបច្ចេកទេស

2017-09-01 12:40:16
ចំនួនមតិ 0 | ចំនួនចែករំលែក 0

ចន្លោះមិនឃើញ

អង្គការស្រាវជ្រាវអវកាសឥណ្ឌាគ្រប់គ្រងដោយរដ្ឋហៅកាត់ថា ISRO ឱ្យដឹងថា ផ្កាយរណប រុករកជំនាន់ទី៨របស់ឥណ្ឌា IRNSS-1H បានធ្លាក់ភ្លាមៗក្រោយបាញ់ចេញពីទីតាំងមជ្ឈមណ្ឌលអវកាស Satish Dhawan Space Center ភាគអាគ្នេយ៍ប្រទេសឥណ្ឌាកាលពីម្សិលមិញ។

ផ្កាយរណប IRNSS-1H ត្រូវគេរំពឹងថានឹងទៅចូលរួមជាមួយបណ្តាផ្កាយរណបចំនួន ៧ផ្សេងទៀតគឺ IRNSS-1A, IRNSS-1B, IRNSS-1C, IRNSS-1D, IRNSS-1E, IRNSS-1Fនិង IRNSS-1G ក្នុងប្រព័ន្ធផ្កាយរណបរុករកតំបន់ឥណ្ឌា Indian Regional Navigational Satellite System (IRNSS) ដើម្បីបន្ថែមការអភិវឌ្ឍប្រព័ន្ធកំណត់ទីតាំងសកលផ្ទាល់ខ្លួនក្នុងបេសកកម្ម ១០ឆ្នាំ។ យ៉ាងណាក្ដី ការបាញ់បង្ហោះផ្កាយរណបជំនាន់ទី៨នេះបរាជ័យក្នុងដំណាក់កាលទី៤ បន្ទាប់ពីហោះចេញទីកន្លែងបាញ់ជាង១០នាទីក្រោយមកក៏ធ្លាក់តែម្តង ។

ពាក់ព័ន្ធនឹងបញ្ហាខុសបច្ចេកទេសនេះដែរ ប្រធានជាន់ខ្ពស់របស់ ISRO លោក A.S Kiran Kumarប្រាប់អ្នកការសែតថា ផ្កាយរណប RNSS-1H បានផ្ទុះបែកខ្ញែកពីគ្នាពីខាងក្នុងនិងធ្លាក់មកជាមួយខែលកម្ដៅ (heat Shield) ដែលការពារផ្កាយរណបពីកម្ដៅកកិតនឹងបរិយាកាសអំឡុងពេលបាញ់បង្ហោះ ។

គួរបញ្ជាក់ថា ផ្កាយរណប IRNSS ជួយរុករកទីតាំងផ្លូវអាកាស និងសមុទ្រ គ្រប់គ្រងគ្រោះមហន្តរាយព្រមទាំងតាមដានរថយន្តរហូតដល់ ១.៥០០គីឡូម៉ែត្រការ៉េនៅទូទាំងប្រទេស ក៏ប៉ុន្តែឥណ្ឌានៅខ្សោយនៅឡើយរឿងផ្កាយរណបកំណត់ទីតាំងសកល ខណៈផ្កាយរណប GPS របស់អាមេរិក GLONASS របស់រុស្ស៊ី Galileo របស់អឺរ៉ុបនិងផ្កាយរណប Beidou របស់ចិន មាន១២ផ្កាយរណបដើម្បីផ្ដល់ព័ត៌មានទូទាំងសកលលោក ៕

ប្រភព៖ Reuters ប្រែសម្រួល៖ សិរីបុទ្រ