៣ឈុតពីកញ្ញាឯកផែនដីកម្ពុជាស្អាតកប់ តែបើដឹងពីអត្ថន័យនៃឈុតនីមួយៗវិញអេមហ្មង

2017-09-06 07:49:42
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីម្សិលមិញនេះទំព័រហ្វេសប៊ុកផ្លូវការរបស់កញ្ញាឯកផែនដីដំណាងកម្ពុជា អែម គុនថង បានបង្ហោះរូបភាពជាច្រើនសន្លឹកក្នុងឈុតសំលៀកបំពាក់ដែលផលិតពីក្រដាសកាសែត និងប្លាស្ទិក បង្កប់ជាមួយអត្ថន័យយ៉ាងជ្រាលជ្រៅលើប្រធានបទបរិស្ថាន ព្រមទាំងមានការរចនាឡើងដោយក្រុមឡាឈូក (La Chhouk) មកពីសាកលវិទ្យាល័យភូមិន្ទវិចិត្រសិល្បៈ។

ក្នុងនោះ លោក អ៊ិត សុវណ្ណរាជ ស្ថាបនិកក្រុមខាងលើ បានឲ្យដឹងថា ឈុតទាំងនេះមិនមែនជាឈុតតំណាងជាតិ សម្រាប់កញ្ញាឯក អែម គុនថង ចេញទៅប្រកួតប្រទេសហ្វីលីពីន ក្នុងខែវិច្ឆិកានេះទេ។ នេះគ្រាន់ជាការសហការថតរូបបង្ហាញពីប្រធានបទ Eco Fashion ប៉ុណ្ណោះ។

លោកក៏បានបញ្ជាក់ពីអត្ថន័យនៃឈុតនីមួយដែរថា៖

១ ឈុតតំណាងស្ដេចខ្យងសមុទ្ទ៖

ឈុតនេះច្នៃឡើងពីកំប៉ុងប្លាស្ទិក និងថង់ប្លាស្ទិកពណ៌ទឹកក្រូច។ វាតំណាងឲ្យសត្វខ្យងមួយប្រភេទដែលរស់នៅលើដីកោះមួយកន្លែងក្នុងព្រះរាជាណាចក្រកម្ពុជា។

២ ឈុតតំណាងឲ្យរុក្ខជាតិ៖

ឈុតនេះច្នៃឡើងប្លាស្ទិកសុទ្ធ វាបំផុសអត្ថន័យនៃការស្រឡាញ់បរិស្ថានជាពិសេសរុក្ខជាតិនានានៅលើពិភពលោក។ អ្វីដែលកាន់តែពិសេសនោះគឺ ឈុតនេះធ្លាប់បានស្លៀកបង្ហាញដោយកញ្ញាឯកពិភពលោកថៃ Thunchanok Moouninta ក្នុងកម្មវិធី Keep Bangkok Clean កាលពីខែតុលាឆ្នាំ២០១៦កន្លងទៅ ដោយកាលនោះក្រុមរបស់លោកមានភារកិច្ចរៀបចំសំលៀកបំពាក់សម្រាប់កញ្ញាឯកមកពី២ប្រទេសគឺ ថៃ និងជប៉ុន។

៣ ឈុតស្បៃធំ៖

ឈុតនេះ ច្នៃឡើងដោយក្រដាសកាសែតកាច់ជារូបផ្កាជាង៩០០ផ្កា និងមានប្រវែង៤.៥ម៉ែត្រ ក្នុងទម្រង់ ស្បៃធំ ដែលជាម៉ូដចំណាស់មួយ និងមិនសូវនិយមប្រើប្រាស់ក្នុងទម្រង់ល្ខោននានាឡើយនាពេលបច្ចុប្បន្ន។ វាត្រូវបានបង្កើតឡើងសម្រាប់ដាក់តាំងក្នុងកម្មវិធី "ខួប១០០ឆ្នាំ" របស់សាលារចនា។ ជាមួយពណ៌ប្រផេះដ៏ស្រគត់ស្រគំនេះ សុវណ្ណរាជ បានឲ្យដឹងថា នេះគឺជាសារមួយដែលបង្ហាញភាពសោកសៅ របស់និស្សិតទៅដល់សាលាចំណាស់មួយ ដែលរដ្ឋាភិបាលធ្លាប់មានគម្រោងផ្លាស់ប្ដូរទីតាំងក្នុងគ្រានោះ។

គួររលឹកថា កញ្ញាឯក អែម គុនថង មានអាយុ១៨ឆ្នាំ ជាជយលាភីកញ្ញាឯកកម្ពុជាចំណាត់ថ្នាក់២ ឆ្នាំ២០១៦។ នាងនឹងតំណាងកម្ពុជាចូលរួមប្រកួតកម្មវិធី "កញ្ញាឯកផែនដីឆ្នាំ២០១៧" ដែលជាព្រឹត្តិការណ៍បរិស្ថានអន្តរជាតិដ៏ល្បី និងជាបេសកកម្មប្រកួតសម្រស់ ដើម្បីជំរុញសកម្មភាពអភិរក្សបរិស្ថាន ដែលនឹងប្រព្រឹត្តិឡើងក្នុងខែតុលា ឆ្នាំ២០១៧នេះ នៅប្រទេសហ្វីលីពីន៕

អត្ថបទ៖ សុខណា

រូបភាពផ្ដល់ឲ្យដោយ អែម គុនថង