មិននឹកស្មានថា ឧបករណ៍ភ្លេងបុរាណច្នៃពីដើមខ្នុរ មានលក្ខណៈពិសេសយ៉ាងនេះសោះ!

2017-09-09 00:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រជាជនកម្ពុជាស្គាល់ច្បាស់ពីរសជាតិផ្លែដ៏ផ្អែមឆ្ងាញ់របស់ផ្លែខ្នុរ តែប្រហែលជាមានមនុស្សមិនច្រើនទេដែលបានដឹងថាដើមនេះ គេអាចយកទៅច្នៃធ្វើជាឧបករណ៍ភ្លេងបានយ៉ាងពីរោះរណ្ដំចិត្ត។

គ្រូភ្លេង និងជាជាងធ្វើឧបករណ៍ភ្លេងបុរាណ លោក យិន វណ្ណា បានឱ្យដឹងថា ដើមខ្នុរជាប្រភេទឈើល្អបំផុត ដែលអាចធ្វើឧបករណ៍ភ្លេងបុរាណបានច្រើនប្រភេទ។ លោកថាដើមខ្នុរអាចយកទៅធ្វើឧបករណ៍ភ្លេងដូចជា ស្គរតូច ស្គរឆៃយ៉ាំ ស្គររមនា តាខេ ស្នូកចាប៉ីដងវែង ឃឹម ពិណ ស្នូករនាត រលាទ្រអ៊ូ និងទ្រសោ ជាដើម។ ថ្វីត្បិតឧបករណ៍ទាំងនេះមានធាតុផ្សំពីដើមខ្នុរដូចគ្នាមែន តែគុណភាពសំឡេងពីរោះប្លែកគ្នាទាំងអស់។

"បើនិយាយពីឈើមួយនេះធ្វើបានច្រើនណាស់ សឹងតែគ្រប់ឧបករណ៍ភ្លេងទាំងអស់ តែអាស្រ័យទៅតាមចំណូលចិត្តអ្នកធ្វើឧបករណ៍នីមួយៗដែរ ថាគេចង់យកវាទៅធ្វើអត់។ ពីដើមគេនិយមយកឈើនេះធ្វើឧបករណ៍ភ្លេងណាស់ សូម្បីស្គរធំៗនៅតាមវត្តក៏គេយកវាធ្វើដែរ ព្រោះវាស្រាល ពណ៌ស្អាត ជាពិសេសនោះវាមានសំឡេងល្អហើយឮខ្លាំង"។

ដូចគ្នានេះដែរសាស្ត្រាចារ្យនៅសាលាភូមិន្ទវិចិត្រសិល្បៈ ស្ថិតក្នុងត្រកូលអ្នកភ្លេង៥ជំនាន់ និងជាជាងធ្វើឧបករណ៍ពិណផងនោះ លោក កែវ សុនន្ទកវី បានប្រាប់ Sabay ថា ដើមខ្នុរយកទៅធ្វើឧបករណ៍ពិណមានគុណភាពសំឡេងល្អលេខ១។ លោកថាឈើផ្សេងៗក៏អាចយកធ្វើពិណបានដែរ តែគុណភាពសំឡេងមិនដល់ដើមខ្នុរឡើយ។

បើយោងតាមសៀវភៅ "តន្ត្រីនៅប្រទេសកម្ពុជា” រៀបរៀងដោយអ្នកស្រី កែវ ណារុំ ក៏បានបញ្ជាក់ដែរថា ដើមឈើមួយប្រភេទនេះ អាចយកទៅធ្វើឧបករណ៍ភ្លេងខ្មែរបុរាណបានច្រើនប្រភេទ៕

អត្ថបទៈ ប៉ូ សាគុន