យុវតីកូរ៉េ ត្រូវស្រីៗមួយក្រុមព្រួតវាយប៉ោងមុខដូចឃ្មុំទិច កំពុងល្បី

2017-09-12 07:45:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្មេងស្រីជនជាតិកូរ៉េខាងត្បូងអាយុ ១៤ឆ្នាំម្នាក់ រស់នៅទីក្រុងភូសាន ត្រូវបានយុវតីមួយក្រុមព្រួតវាយធ្វើបាបស្ទើរបាត់បង់ជីវិត ព្រោះតែពួកគេមិនចូលចិត្តអាកប្បកិរិយា និងការនិយាយស្ដីរបស់នារីរងគ្រោះ។

ក្រុមយុវតីជាជនដៃដល់បានបបួលគ្នាវាយ និងធ្វើទារុណកម្មទៅលើក្មេងស្រីរៀនថ្នាក់អនុវិទ្យាល័យនេះរយៈពេលជាង ១ម៉ោង កាលពីប៉ុន្មានថ្ងៃមុនដោយប្រើកៅអី ដំបងដែកវាយសំពង និងអុជបារីលើរាងកាយ មុខរហូតដល់នាងសន្លប់។

ក្មេងស្រីរងគ្រោះត្រូវគេប្រទះឃើញដេកស្ដូកស្ដឹង រួចហើយក៏គេបញ្ជូនទៅកាន់មន្ទីរពេទ្យទាំងមុខហើមប៉ោង ឈាមហូរតាមត្រចៀក និងរយះក្បាលជ្រៅ។ លើសពីនេះ ជនដៃដល់ម្នាក់ក្នុងចំណោមជនដៃដល់ទាំង ៥នាក់បានថតរូបនារីរងគ្រោះផ្ញើឲ្យមិត្តរួមថ្នាក់មើល ដោយអួតអាងសកម្មភាពពួកគេបានប្រព្រឹត្តទៀតផង។

តាមប្រភពគេហទំព័រ Koreaboo បានរាយការណ៍ថា ជនសង្ស័យទាំងអស់សម្រេចប្រគល់ខ្លួនឲ្យប៉ូលិសបន្ទាប់ពីធ្វើសកម្មភាពបាន ២ម៉ោង ប៉ុន្តែមិនបានចាប់ខ្លួនទេដោយសារតែច្បាប់អនីតិជនការពារអ្នកអាយុក្រោម១៨ឆ្នាំ។

ទោះយ៉ាងណា ម្ដាយរបស់កុមារីរងគ្រោះបានទទូចឲ្យជនសង្ស័យគួរតែត្រូវបាននាំទៅតុលាការដោយចោទប្រកាន់ករណីប៉ុនប៉ងមនុស្សឃាត តែអាជ្ញាធរចាត់ទុកករណីនេះមិនមែនជារឿងធ្ងន់ធ្ងរទៅវិញ។

ហេតុការណ៍ខាងលើ បានធ្វើឲ្យអ្នកប្រើប្រាស់អ៊ីនធឺណិតរាប់សែននាក់សម្ដែងការប្រឆាំងតវ៉ាចំពោះការមិនមានចំណាត់ការលើជនដៃដល់ រហូតប្រមូលញត្តិតាមអនឡាញបានជាង ១២ម៉ឺននាក់ដើម្បីឲ្យមានច្បាប់ដាក់ទោសដល់អនីតិជនទៀតផង។

ចំណែកឪពុករបស់ជនដៃដល់ម្នាក់បានសម្ដែងអារម្មណ៍សោកស្ដាយចំពោះទង្វើកូនខ្លួន និងចាត់ទុកជាបទឧក្រិដ្ឋមិនអាចលើកលែងឲ្យបាន។ លោកបានសន្យាបង់ប្រាក់ឲ្យគ្រួសារកុមារីរងគ្រោះ និងឲ្យអាជ្ញាធរដាក់ទណ្ឌកម្មកូនខ្លួនផងដែរ។ ឪពុកដដែលបានសារភាពថា គ្រួសាររបស់លោកបានទទួលទូរសព្ទរាប់ពាន់ដងពីមហាជនដោយប្រាប់ឲ្យក្រុមគ្រួសារលោកទៅធ្វើអត្តឃាតតែម្ដង។ យ៉ាងណា លោកបានសន្យាលុតជង្គង់សុំទោសសាធារណជននៅថ្ងៃខាងមុខជំនួសកូន៕