មិនធម្មតា! iPhone X ថតរូប Blur បានទាំងកាមេរ៉ាមុខ ទាំងកាមេរ៉ាក្រោយ

2017-09-13 02:26:30
ចំនួនមតិ 0 | ចំនួនចែករំលែក 0

ចន្លោះមិនឃើញ

យប់មិញនេះ Apple បានប្រកាសចេញ iPhone ដល់ទៅបីម៉ូដែលរួមមាន iPhone 8, 8 Plus និង iPhone X (អានថា iPhone Ten)។ ចំណោម iPhone ទាំងបី iPhone X ទទួលបានការចាប់អារម្មណ៍ជាខ្លាំង ព្រោះតែចំណុចពិសេសៗជាច្រើន។

ក្រឡេកទៅ iPhone X ភ្លាម ចាប់អារម្មណ៍ខ្លាំងជាងគេគឺផ្នែកខាងមុខ ដែលមានបំពាក់អេក្រង់ស្ទើរពេញមួយផ្ទៃទូរសព្ទទៅហើយ។ អេក្រង់ iPhone X ជាប្រភេទអេក្រង់ OLED មានទំហំ ៥,៨ អ៊ីញ មានបច្ចេកវិទ្យាបង្ហាញរូប Super Retina Display មានកម្រិត Resolution 2436x1125 ដែលមានដង់ស៊ីតេរូបភាពដល់ ៤៥៨ ភីកសែលក្នុងមួយអ៊ីញ។ អេក្រង់នេះក៏មានបំពាក់បច្ចេកវិទ្យា True Tone Display ដែលអាចបង្ហាញរូបភាពផ្អែកទៅតាមបរិយាកាសជុំវិញ។

ក្រឡេកមើលផ្នែកខាងក្រោយរបស់ iPhone X វិញមានភាពរលោងចិញ្ចែងចិញ្ចាចដោយសារធ្វើពីសារធាតុកញ្ចក់ ហើយការរចនាតួខ្លួនពីកញ្ចក់នេះអាចឲ្យ iPhone X ទ្រាំទ្រនឹងបច្ចេកវិទ្យាសាកថ្មឥតប្រើខ្សែបានផងដែរ។

អ្នកប្រហែលជាបានឃើញហើយថាលើ iPhone X មិនមានប៊ូតុង Home នោះទេ ហើយទ្រនាប់ស្កេនខ្ចៅដៃ (Touch ID) ក៏លែងមានទៀតដែរ។ របារខ្លីមួយនៅផ្នែកខាងក្រោយនឹងចូលមកជំនួសប៊ូតុង Home សម្រាប់ការចូលទៅកាន់ទីតាំង Multitasking និងសម្រាប់មុខងារដទៃទៀតជាច្រើន។

ចំណែកការដោះសោដែលពីមុនត្រូវពឹងផ្អែកលើ Touch ID ពេលនេះនឹងត្រូវពឹងផ្អែកលើមុខងារស្កេនមុនដែល Apple ហៅថាមុខងារ FaceID វិញម្ដង។ Apple អះអាងថា FaceID នេះមានសុវត្ថិភាពខ្ពស់ជាង Touch ID ហើយមុខងារនេះក៏អាចប្រើសម្រាប់ការទូទាត់សាច់ប្រាក់ ឬ ជាមួយកម្មវិធីដទៃទៀតដែលអាចដំណើរការ Touch ID បាន។

កាមេរ៉ាភ្លោះលើ iPhone X មានទំហំ ១២ MP ដដែល ដោយមានបំពាក់មុខងាររក្សាលំនឹងនៅលើឡេនកាមេរ៉ាទាំងពីរ ដូចជា Galaxy Note 8 ដែរ។ ចំពោះកាមេរ៉ាមេមាន Aperture f/1.8 និងកាមេរ៉ាប្រភេទ Telephoto មានកម្រិត f/2.4។ នៅចន្លោះកណ្ដាលនៃកាមេរ៉ាទាំងពីរគ្រាប់មានភ្លើង LED True Tone Flash ចំនួន ៤ គ្រាប់ដែលអាចជះពន្លឺបានប្រសើរជាងមុន។ ចំពោះកាមេរ៉ាខាងមុខវិញមានកម្រិត ៧ MP ហើយគួបផ្សំជាមួយប្រព័ន្ធកាមេរ៉ា True Depth អាចឲ្យកាមេរ៉ាខាងមុខថតរូបភាពប្រភេទ Portrait Mode (ព្រាលក្រោយច្បាស់មុខ) បានដូចកាមេរ៉ាភ្លោះនៅខាងក្រោយដែរ។

រូបភាព Portrait Mode ថតដោយកាមេរ៉ាមុខ

ទាំង iPhone X និង iPhone 8, 8 Plus មានបំពាក់បន្ទះឈីប A11 Bionic ដែលមាន CPU កម្លាំងខ្លាំង ២ គ្រាប់ និងកម្លាំងខ្សោយ ៤ គ្រាប់។ ជាមួយបន្ទះឈីបនេះអាចឲ្យ iPhone ទាំងបីដំណើរការជាមួយនឹងកម្មវិធីដែលប្រើបច្ចេកវិទ្យា AR បានយ៉ាងរលូន។ ដូចសព្វដង Apple មិនបានបញ្ជាក់ពីទំហំ RAM និង ទំហំថ្មលើ iPhone X ឡើយ ប៉ុន្តែអះអាងថាថាមពលថ្ម iPhone X ប្រើបានយូរជាង iPhone 7 ពីរម៉ោង។

iPhone X នឹងបើកទទួលការកុម្ម៉ង់ទិញនៅថ្ងៃទី ២៧ ខែតុលា ដោយទំហំ ៦៤ GB តម្លៃ ៩៩៩ ដុល្លារ និង ទំហំ ២៥៦ GB តម្លៃ ១ ១៤៩ ដុល្លារ ហើយការបញ្ចេញលក់ជាផ្លូវការលើទីផ្សារបរទេសនឹងធ្វើឡើងនាថ្ងៃទី ៣ ខែវិច្ឆិកា៕